അസന്‍സിയോന്‍: പരാഗ്വേയിലെ ജനസംഖ്യയുടെ പകുതിയോളം പേർക്ക് സേവനം നൽകിയിരുന്ന ഒരു ബാങ്ക് തകർന്നതോടെ, ലക്ഷക്കണക്കിന് ഉപഭോക്താക്കൾക്ക് തങ്ങളുടെ സമ്പാദ്യം പിൻവലിക്കാൻ കഴിയാത്ത അവസ്ഥയിലാണ്. കൂടാതെ, പൊതുഖജനാവിലെ പണവും വലിയ പ്രതിസന്ധിയിലായി. മുൻ ഐഎംഎഫ് (IMF) സാമ്പത്തിക വിദഗ്ധനും നിലവിലെ പ്രസിഡന്റുമായ സാന്റിയാഗോ പെനയെ സെനറ്റ് പുറത്താക്കുകയും (impeachment), അദ്ദേഹത്തെ വീട്ടുതടങ്കലിലാക്കുകയും ചെയ്തു.
അതിവേഗം വളരുകയായിരുന്ന ഈ ബാങ്കിന്റെ തകർച്ച പരാഗ്വേയെ കടുത്ത സാമ്പത്തിക, രാഷ്‌ട്രീയ പ്രതിസന്ധിയിലേക്ക് തള്ളിവിട്ടിരിക്കുകയാണ്. 65 ലക്ഷം ജനസംഖ്യയുള്ള രാജ്യത്ത്, ഏകദേശം 30 ലക്ഷത്തോളം ഉപഭോക്താക്കൾ ആശ്രയിച്ചിരുന്ന ബാങ്കാണ് പൊളിഞ്ഞത്. ഇത്രയും പേര്‍ തങ്ങളുടെ പണം എടുക്കാൻ കഴിയാത്ത സാഹചര്യത്തിലാണ് ഇപ്പോള്‍.
‘ഗ്രൂപോ വാസ്ക്വസ്’ (Grupo Vazquez) എന്ന ബിസിനസ് ഗ്രൂപ്പിന്റെ നിയന്ത്രണത്തിലുള്ള ‘ഉയെനോ ബാങ്ക്’ (Ueno Bank) എന്ന ഡിജിറ്റൽ ബാങ്കാണ് ഈ പ്രതിസന്ധിയുടെ കേന്ദ്രബിന്ദു. ബാങ്കിന്റെ സാമ്പത്തിക സ്ഥിതി വഷളായതായി കണ്ടെത്തിയതിനെത്തുടർന്ന്, നവംബർ 3-ന് പരാഗ്വേയുടെ സെൻട്രൽ ബാങ്ക് ഇതിന്റെ നിയന്ത്രണം ഏറ്റെടുത്തിരുന്നു.
കോടിക്കണക്കിന് ഡോളർ വരുന്ന പൊതുഫണ്ട് അപകടത്തിലായതോടെ, മുൻ ഐഎംഎഫ് സാമ്പത്തിക വിദഗ്ധനും യുഎസ് പ്രസിഡന്റ് ഡൊണാൾഡ് ട്രംപിന്റെ അടുത്ത അനുയായിയുമായ പ്രസിഡന്റ് സാന്റിയാഗോ പെനയ്‌ക്ക് രാജിവെക്കേണ്ടി വന്നു. ഔദ്യോഗിക കൃത്യനിർവ്വഹണത്തിൽ വീഴ്ച വരുത്തിയെന്നാരോപിച്ച് പരാഗ്വേൻ സെനറ്റ് പെനയെ പുറത്താക്കി; അദ്ദേഹത്തിന് പകരമായി പെഡ്രോ അലിയാന പുതിയ പ്രസിഡന്റായി സത്യപ്രതിജ്ഞ ചെയ്തു. പുറത്താക്കപ്പെട്ടതിന് തൊട്ടുപിന്നാലെ പെനയെ കസ്റ്റഡിയിലെടുക്കുകയും വീട്ടുതടങ്കലിലാക്കുകയും ചെയ്തു.
ഈ നടപടി വലിയ പ്രതിഷേധങ്ങൾക്കും ക്രിമിനൽ അന്വേഷണങ്ങൾക്കും വഴിവെച്ചു. മുൻപ് ‘ഗ്രൂപോ വാസ്ക്വസിൽ’ ഓഹരി പങ്കാളിത്തമുണ്ടായിരുന്ന പ്രസിഡന്റ് പെനയ്‌ക്കെതിരെ സെനറ്റ് നടപടികൾ ആരംഭിച്ചു. അധികാരത്തിലിരുന്ന കാലയളവിൽ, തന്റെ രാഷ്‌ട്രീയ സ്വാധീനം ഉപയോഗിച്ച് ഈ ബാങ്കിന്റെ വളർച്ചയ്‌ക്ക് പെന സഹായിച്ചുവെന്നാണ് ആരോപണം.
പരാഗ്വേയുടെ സ്ഥിരതയും ജനാധിപത്യ സ്ഥാപനങ്ങളും സംരക്ഷിക്കുന്നതിനായി താൻ രാജിവെക്കുകയാണെന്ന് നവംബർ 5-ന് പെന പ്രഖ്യാപിച്ചു. എന്നാൽ, നിയമനിർമ്മാതാക്കൾ അദ്ദേഹത്തിന്റെ രാജി സ്വീകരിക്കാൻ തയ്യാറായില്ല. തുടർന്ന് വെള്ളിയാഴ്ച (നവംബർ 7), സെനറ്റ് അദ്ദേഹത്തെ പുറത്താക്കുകയും വീട്ടുതടങ്കലിലാക്കുകയും ചെയ്തു.