പോർച്ചുഗൽ പരിശീലകൻ ജോർജ് ജീസസും ഇതിഹാസതാരം ക്രിസ്റ്റ്യാനോ റൊണാൾഡോയും തമ്മിലുള്ള അഭിപ്രായവ്യത്യാങ്ങളെ കുറിച്ച് ക്രൊയേഷ്യൻ ഇതിഹാസം ലൂക്ക മോഡ്രിച്ച് സംസാരിച്ചു. പോർച്ചുഗൽ ദേശീയ ടീമിനൊപ്പം റൊണാൾഡോയ്ക്ക് മികച്ച ഒരു വിടവാങ്ങലും അവസാനവും വേണമെന്നാണ് മോഡ്രിച്ച് പറഞ്ഞത്.
‘ഇല്ല ഞാൻ അവനുമായി ഇതിനെക്കുറിച്ച് സംസാരിച്ചിട്ടില്ല. എന്താണ് സംഭവിച്ചത് എന്ന് എനിക്ക് കൃത്യമായി അറിയാത്തതുകൊണ്ട് ഇതിനെക്കുറിച്ച് പറയാൻ എനിക്ക് ബുദ്ധിമുട്ടാണ്. എനിക്ക് ഇവിടെ എന്റേതായ ചില പ്രശ്നങ്ങളുള്ളതിനാൽ ഈ സാഹചര്യം ഞാൻ ശ്രദ്ധിച്ചിട്ടില്ല. സ്വന്തം രാജ്യത്ത് അദ്ദേഹത്തിന് ഇങ്ങനെ സംഭവിക്കുന്നത് കാണുമ്പോൾ സങ്കടമുണ്ട്.
എന്താണ് സംഭവിച്ചതെന്ന് എനിക്ക് അറിയില്ല. പക്ഷേ ഈ പ്രശ്നം പരിഹരിക്കപ്പെടുമെന്നാണ് ഞാൻ പ്രതീക്ഷിക്കുന്നത്. കാരണം റൊണാൾഡോ പോർച്ചുഗലിന്റെ ചരിത്രത്തിലെ ഏറ്റവും മികച്ച താരമാണ്. അതുകൊണ്ട് ദേശീയ ടീമിനൊപ്പം അദ്ദേഹത്തിന് നല്ലൊരു വിടവാങ്ങലും അവസാനവും ലഭിക്കണം’ മോഡ്രിച്ച് സ്പെയിനിനെതിരെയുള്ള മത്സരത്തിനുശേഷം മാധ്യമങ്ങളോട് പറഞ്ഞു.
ആദ്യ ഇലവനിൽ അവസരം നൽകില്ലെന്ന് മുഖ്യ പരിശീലകൻ ജോർജ് ജീസസ് വ്യക്തമാക്കിയതിനെ തുടർന്നാണ് റൊണാൾഡോ പരിശീലന ക്യാമ്പ് വിട്ടു മടങ്ങി. കോപ്പൻഹേഗനിലെ പാർക്കൻ സ്റ്റേഡിയത്തിൽ നടന്ന വാർത്താസമ്മേളനത്തിൽ, വരാനിരിക്കുന്ന മത്സരത്തിൽ 41-കാരനായ റൊണാൾഡോയെ ആദ്യ ഇലവനിൽ ഉൾപ്പെടുത്തില്ലെന്നും ആവശ്യമായി വന്നാൽ മാത്രം സബ്സ്റ്റിറ്റ്യൂട്ടായി ഇറക്കുമെന്നും ജീസസ് മാധ്യമങ്ങളോട് സ്ഥിരീകരിച്ചിരുന്നു. ഇതിന് പിന്നാലെയാണ് താരം ടീം വിടാൻ തീരുമാനിച്ചത്.
കഴിഞ്ഞ ഞായറാഴ്ച ഓസ്ലോയിൽ നോർവേയ്‌ക്കെതിരെ പോർച്ചുഗൽ 2-1 ന് വിജയിച്ച മത്സരത്തിൽ റൊണാൾഡോയ്ക്ക് കളിക്കാൻ അവസരം ലഭിച്ചിരുന്നില്ല. സബ്സ്റ്റിറ്റ്യൂട്ട് ബെഞ്ചിലായിരുന്ന താരം മത്സരശേഷം ആരാധകരെ അഭിവാദ്യം ചെയ്യാതെ നേരിട്ട് ഡ്രസ്സിംഗ് റൂമിലേക്ക് മടങ്ങിയത് വലിയ ചർച്ചയായിരുന്നു. ഇതിന് പിന്നാലെയാണ് പരിശീലകനുമായുള്ള ഭിന്നത രൂക്ഷമായത്.