10

இங்கிலாந்தின் முன்னணி தபால் சேவை நிறுவனமான ரோயல் மெயில், தனது தலைமை அலுவலகம் மற்றும் ஆதரவுச் சேவைப் பிரிவுகளிலிருந்து 2,500 உத்தியோகங்களை 2027ஆம் ஆண்டின் இறுதிக்குள் நீக்கத் திட்டமிட்டுள்ளதாக உத்தியோகபூர்வமாக அறிவித்துள்ளது.

எனினும், களப்பணியில் ஈடுபட்டுள்ள அஞ்சல் விநியோகத்தர்கள் மற்றும் சாரதிகள் உள்ளிட்ட நேரடிச் சேவை ஊழியர்கள் எவரும் இந்த ஆட்குறைப்பு நடவடிக்கைக்குள் உள்ளடக்கப்பட மாட்டார்கள் என நிறுவனம் தெளிவுபடுத்தியுள்ளது.

நிறுவனத்தின் மொத்தப் பணியாளர்களான 131,000 பேரில், இந்த உத்தியோக நீக்கமானது சுமார் 2 சதவீதத்தை பிரதிபலிக்கின்றது.

நிறுவனத்தின் செயற்பாட்டுத் திறனை அதிகரிக்கும் நோக்கில் முன்னெடுக்கப்படும் இந்த ஆட்குறைப்பு, கட்டாயப் பணிநீக்கங்கள் இன்றி, சுயவிருப்ப ஓய்வுபெறல் திட்டம் மற்றும் நிறுவனத்தை விட்டு சுயமாக வெளியேறுபவர்கள் மூலமாகவே மேற்கொள்ளப்படும் எனத் தெரிவிக்கப்பட்டுள்ளது.

அத்துடன், தமது திட்டங்கள் தொடர்பில் தொடர்பு பணியாளர் சங்கம் மற்றும் யுனைட் சி.எம்.ஏ ஆகிய தொழிற்சங்கங்களுடன் முறையான பேச்சுவார்த்தைகள் முன்னெடுக்கப்பட்டு வருவதாகவும் ரோயல் மெயில் குறிப்பிட்டுள்ளது.

முன்மொழியப்பட்டுள்ள இந்த மாற்றங்கள் நிறுவனத்தில் தேவையற்ற பணி இரட்டிப்புகளை அகற்றி, வாடிக்கையாளர்களுக்கு சிறந்த சேவையை வழங்குவதற்கான மேலதிக முதலீடுகளை மேற்கொள்ள வழிவகுக்கும் என்று நிறுவனத்தின் பிரதம நிறைவேற்று அதிகாரி அலிஸ்டயர் கொக்ரேன் தெரிவித்துள்ளார்.

இந்த மாற்றங்களை நடைமுறைப்படுத்துவது எளிதானதல்ல என்றபோதிலும், வாடிக்கையாளர்களுக்கும் ஊழியர்களுக்கும் பலமான, எளிமையான மற்றும் எதிர்கால சவால்களுக்குத் தயாரான நிறுவனத்தைக் கட்டியெழுப்புவதற்கு இது மிகவும் இன்றியமையாதது எனவும் அவர் சுட்டிக்காட்டியுள்ளார்.

கடந்த சில வருடங்களாக முதலாம் மற்றும் இரண்டாம் தர அஞ்சல்களை குறித்த நேரத்திற்குள் விநியோகிக்கும் இலக்குகளை அடைவதில் ரோயல் மெயில் பெரும் பின்னடைவைச் சந்தித்து வருகின்றதுடன், ஒழுங்குமுறை அதிகார சபையினால் அபராதங்களுக்கும் உள்ளாகியுள்ளது. மார்ச் மாத இறுதி வரையான காலப்பகுதியில், முதலாம் தர கடிதங்களில் 75 சதவீதத்திற்கும் சற்று அதிகமானவையே உரிய நேரத்தில் விநியோகிக்கப்பட்டுள்ளன. இது நிறுவனத்தின் 93 சதவீத இலக்கிலிருந்து மிகக் குறைந்த மட்டமாகும்.

கடிதங்களை அனுப்புவோரின் எண்ணிக்கை வீழ்ச்சியடைந்து வரும் பின்னணியில், இங்கிலாந்தில் உள்ள அனைத்து முகவரிகளுக்கும் வாரத்தில் ஆறு நாட்கள் கடிதங்களை விநியோகிக்க வேண்டும் என்ற உலகளாவிய சேவை கடப்பாடு தற்காலத்திற்குப் பொருந்தாதது எனவும், அதில் சீர்திருத்தங்கள் அவசியம் எனவும் நிறுவனம் தொடர்ச்சியாக வலியுறுத்தி வருகின்றது.