ഹാമിൽട്ടൺ:കിവീസിനെതിരായ ടി-20 പരമ്പര വിജയത്തിന് പിന്നാലെ ടീമിന്റെ ആക്രമണാത്മക ശൈലിയെ പിന്തുണച്ച് ഇന്ത്യന്‍ മുഖ്യ പരിശീലകൻ ഗൗതം ഗംഭീർ.

കളിയോടുള്ള സമീപനത്തിൽ ഭയത്തിന് യാതൊരു സ്ഥാനവുമില്ലെന്നും സാഹചര്യങ്ങളോ തോൽവിയുടെ സാധ്യതയോ നോക്കാതെ ഉയർന്ന റിസ്കുള്ളതും ഉയർന്ന പ്രതിഫലം നൽകുന്നതുമായ ക്രിക്കറ്റ് ബ്രാൻഡ് തുടരുമെന്നും ഗംഭീർ വ്യക്തമാക്കി.

ന്യൂസിലൻഡിനെതിരായ അഞ്ച് മത്സരങ്ങളുടെ പരമ്പര 3-2 ന് ഇന്ത്യ സ്വന്തമാക്കിയെങ്കിലും, സെഡൺ പാർക്കിൽ നടന്ന അവസാന മത്സരത്തിൽ ഇന്ത്യ 7 വിക്കറ്റിന്റെ തോൽവി വഴങ്ങിയിരുന്നു.മത്സരത്തിന് ശേഷമുള്ള പത്രസമ്മേളനത്തിൽ സംസാരിക്കുകയായിരുന്നു അദ്ദേഹം.

ഒഴികഴിവുകളിൽ വിശ്വസിക്കുന്നില്ല

പരമ്പരയ്ക്ക് മുന്നോടിയായി ഒരു പരിശീലന സെഷൻ മാത്രം ലഭിച്ചതിനെക്കുറിച്ചുള്ള ചോദ്യത്തിന്, താൻ ഒഴികഴിവുകളിൽ വിശ്വസിക്കുന്നില്ലെന്നായിരുന്നു ഗംഭീറിന്റെ മറുപടി.

“എനിക്ക് ഒന്നിനോടും ഭയമില്ല. എന്റെ നിഘണ്ടുവിലോ പ്രത്യയശാസ്ത്രത്തിലോ ഭയത്തിന് സ്ഥാനമില്ല. ഞങ്ങൾ പ്രൊഫഷണലുകളാണ്, ഒഴികഴിവുകളില്ലെന്ന് ഞാൻ എപ്പോഴും വിശ്വസിച്ചിട്ടുണ്ട്.

ഏത് സാഹചര്യം ലഭിച്ചാലും അതിൽ നിന്ന് പരമാവധി പ്രയോജനം നേടുക എന്നതാണ് ലക്ഷ്യം,” ഗംഭീർ വ്യക്തമാക്കി.

ആദ്യ മൂന്ന് മത്സരങ്ങളിൽ യുവതാരങ്ങൾ സമ്മർദ്ദത്തെ അതിജീവിച്ച് 220 റൺസ് വരെ വിജയകരമായി പിന്തുടർന്നതും, ഒരു പരിശീലന സെഷനുശേഷം ഇറങ്ങി വിജയം കണ്ടതും ടീമിന്റെ ക്രൂരമായ ആത്മവിശ്വാസത്തെയാണ് കാണിക്കുന്നതെന്നും അദ്ദേഹം കൂട്ടിച്ചേർത്തു.

തത്വശാസ്ത്രം മാറില്ല

കഴിഞ്ഞ രണ്ടര വർഷമായി ഇന്ത്യൻ ടീം ഉയർന്ന റിസ്കുള്ള ക്രിക്കറ്റാണ് കളിക്കുന്നതെന്നും, ചില മത്സരങ്ങളിൽ ഏകപക്ഷീയമായ തോൽവികൾ ഉണ്ടായാലും ഈ ശൈലിയിൽ മാറ്റമുണ്ടാകില്ലെന്നും ഗംഭീർ തുറന്നടിച്ചു.

“ചില ദിവസങ്ങളിൽ നിങ്ങൾ 100 റൺസിന് തോറ്റേക്കാം, എന്നാൽ മറ്റു ചില ദിവസങ്ങളിൽ 10 ഓവറിൽ 150 റൺസ് പിന്തുടർന്ന് ജയിക്കും. ഇംഗ്ലണ്ടായാലും ഓസ്ട്രേലിയയായാലും ഇന്ത്യയായാലും ഞങ്ങൾ കളിക്കാൻ ആഗ്രഹിക്കുന്ന ശൈലി ഇതാണ്,” അദ്ദേഹം പറഞ്ഞു.

ജനപ്രിയ തീരുമാനങ്ങളേക്കാൾ ശരിയായ തീരുമാനങ്ങൾ

പ്ലെയിംഗ് ഇലവനിൽ അവസരം ലഭിക്കാത്ത താരങ്ങളോട് സംസാരിക്കുന്നതിലെ വെല്ലുവിളിയെക്കുറിച്ച് സംസാരിച്ച ഗംഭീർ, ഡ്രസ്സിംഗ് റൂമിൽ ഇരുന്നുള്ള ജനപ്രിയ തീരുമാനങ്ങളേക്കാൾ പ്രധാനം ശരിയായ തീരുമാനങ്ങൾ എടുക്കുന്നതാണെന്ന് വ്യക്തമാക്കി.

മുഖ്യ പരിശീലകനെന്ന നിലയിൽ സത്യസന്ധതയും സുതാര്യതയുമാണ് തനിക്ക് പ്രധാനമെന്നും അദ്ദേഹം പറഞ്ഞു.

തുടർച്ചയായ മത്സരങ്ങളും ഫോർമാറ്റുകളും കൈകാര്യം ചെയ്യുന്നത് ചിലപ്പോഴൊക്കെ മാനസികമായി തളർത്തിയിട്ടുണ്ടെങ്കിലും, ആ സമ്മർദ്ദം താങ്ങാനുള്ള ശേഷി തനിക്കിsലെയുണ്ടെന്നും ഗംഭീർ കൂട്ടിച്ചേർത്തു.