• Fri. Nov 20th, 2026

24×7 Live News

Apdin News

‘റഫറിമാരുടെ സഹായത്താലാണ് മെസ്സി ജയിച്ചതെന്ന് കരുതുന്നുണ്ടോ?’; നെഗ്രേര കേസിൽ ബാഴ്‌സലോണയ്ക്ക് പിന്തുണയുമായി മുൻ റയൽ മാഡ്രിഡ് താരം

Byadmin

Nov 20, 2026


മാഡ്രിഡ്: സ്പാനിഷ് ഫുട്ബോളിനെ പിടിച്ചുകുലക്കിയ ‘നെഗ്രേര കേസിൽ’ (Negreira Case) എഫ്.സി. ബാഴ്‌സലോണയെയും ഇതിഹാസ താരം ലയണൽ മെസ്സിയെയും ന്യായീകരിച്ച് മുൻ റയൽ മാഡ്രിഡ് സ്ട്രൈക്കർ ജോർജ് ലോപ്പസ് മാർക്കോ (ടോട്ടെ). റഫറിമാരുടെ സ്വാധീനം കൊണ്ടല്ല ബാഴ്‌സലോണയും മെസ്സിയും വിജയിച്ചതെന്നും, ഈ വിഷയത്തിൽ യഥാർത്ഥത്തിൽ വഞ്ചിക്കപ്പെട്ടത് ബാഴ്‌സലോണയാണെന്നുമാണ് ടോട്ടെ വ്യക്തമാക്കുന്നത്.

സ്പാനിഷ് മാധ്യമമായ ‘മാർക്ക’യുടെ ‘സെഡ എൽ പാസോ’യ്ക്ക് നൽകിയ അഭിമുഖത്തിലാണ് ടോട്ടെ നിലപാട് വ്യക്തമാക്കിയത്.

തട്ടിപ്പിനിരയായത് ബാഴ്‌സലോണ

പണമടയ്ക്കലുമായി ബന്ധപ്പെട്ട് രേഖകൾ നിലവിലുള്ളതിനാൽ എന്തോ ക്രമക്കേട് നടന്നിട്ടുണ്ടെന്ന് ടോട്ടെ സമ്മതിക്കുന്നു.

എന്നാൽ ആ പണം മത്സരഫലങ്ങളെ സ്വാധീനിച്ചിട്ടില്ലെന്നും, ചിലർ ചേർന്ന് ബാഴ്‌സലോണയെ കബളിപ്പിക്കുകയായിരുന്നുവെന്നുമാണ് അദ്ദേഹം വാദിക്കുന്നത്.

“അതൊന്നും മത്സരഫലങ്ങളെ സ്വാധീനിച്ചിട്ടില്ല. രേഖകൾ ഉള്ളതിനാൽ അവിടെ എന്തോ സംഭവിച്ചിട്ടുണ്ടെന്ന് വ്യക്തമാണ്.

എന്നാൽ ബാഴ്‌സലോണയെ വഞ്ചിച്ച് പണം തട്ടിയെടുക്കുകയാണ് ചെയ്തതെന്നാണ് ഞാൻ കരുതുന്നത്. ബാഴ്‌സയെ വഞ്ചിച്ചു, അവരിൽ നിന്ന് എല്ലാം തട്ടിയെടുത്തു, അത് കുറച്ച് ആളുകൾക്കിടയിൽ വിഭജിച്ചു.” എന്നാണ് ടോട്ടെ പറയുന്നത്.

മെസ്സിയും സാവിയും ഇനിയേസ്റ്റയും

ബാഴ്‌സലോണയുടെ അക്കാലത്തെ താരനിരയുടെ മികവ് ചൂണ്ടിക്കാട്ടിയ ടോട്ടെ, റഫറിമാരുടെ സഹായമില്ലാതെ തന്നെ വിജയിക്കാൻ ശേഷിയുള്ള ടീമായിരുന്നു അതെന്നും ഓർമ്മിപ്പിച്ചു.

“ജീവിതകാലം മുഴുവൻ ഞാൻ ബാഴ്‌സലോണയ്ക്കെതിരെ കളിച്ചതാണ്. സാവിയെയും ഇനിയേസ്റ്റയെയും പോലെയുള്ളവരുടെ കാര്യമെടുത്താൽ… അങ്ങനെ 50 താരങ്ങളുടെ പേരുകൾ എനിക്ക് പറയാനാകും.

റഫറിമാരുടെ സ്വാധീനം കൊണ്ടാണ് അവർ ജയിച്ചതെന്ന് പറഞ്ഞാൽ അവർ ചിരിച്ചുതള്ളും. റഫറിമാരുടെ പിന്തുണ കൊണ്ടാണോ ലയണൽ മെസ്സി ജയിച്ചതെന്ന് നിങ്ങൾ കരുതുന്നുണ്ടോ?” ടോട്ടെ ചോദിച്ചു.

നെഗ്രേര കേസ്: നിലവിലെ സ്ഥിതി

സ്പാനിഷ് റഫറി കമ്മിറ്റി മുൻ വൈസ് പ്രസിഡന്റ് ജോസ് മരിയ എൻറിക്വസ് നെഗ്രേരയ്ക്കും മകനും ബാഴ്‌സലോണ ഏകദേശം 7.3 മില്യൺ യൂറോ നൽകിയതുമായി ബന്ധപ്പെട്ടതാണ് കേസ്.

സാങ്കേതിക റിപ്പോർട്ടുകൾക്കാണ് പണം നൽകിയതെന്നാണ് ബാഴ്‌സയുടെ വിശദീകരണമെങ്കിലും, സ്പോർട്സ് അഴിമതി ആരോപിച്ചാണ് പ്രോസിക്യൂഷൻ നീങ്ങുന്നത്.

അവസാന സാക്ഷികളുടെയും മൊഴിയെടുപ്പ് പൂർത്തിയായതോടെ അന്വേഷണ ഘട്ടം ഔപചാരികമായി അവസാനിച്ചിട്ടുണ്ട്. കേസ് വിചാരണയ്ക്ക് വിടണോ എന്ന് ഇനി കോടതിയാണ് തീരുമാനിക്കേണ്ടത്; 2027-ന് മുമ്പ് വിധി വരാൻ സാധ്യതയില്ലെന്നാണ് റിപ്പോർട്ടുകൾ.







By admin