കൊല്ലം: ഗോവയില്‍ നടക്കാനിരിക്കുന്ന ‘വേള്‍ഡ് മാസ്റ്റേഴ്‌സ് പവര്‍ ലിഫ്റ്റിംഗ് ഗെയിംസ് 2026ല്‍ ഭാരതത്തെ പ്രതിനിധീകരിക്കാന്‍ കൊല്ലം സ്വദേശികളായ മൂന്ന് കായികതാരങ്ങള്‍ അര്‍ഹത നേടി. കെഎസ് ജിംനേഷ്യത്തില്‍ പരിശീലനം നേടുന്ന മേവറം സ്വദേശി നിസാര്‍ (74 കിലോ വിഭാഗം), ഇരവിപുരം സ്വദേശിയായ അനീഷ് എം.ആര്‍. (59 കിലോ വിഭാഗം), മേവറം സ്വദേശി അശ്വനി സൂരജ് (84 കിലോ വിഭാഗം) എന്നിവരാണ് ലോകവേദിയില്‍ കരുത്ത് തെളിയിക്കാന്‍ ഒരുങ്ങുന്നത്.

ദേശീയ-അന്തര്‍ദേശീയ തലത്തില്‍ നിരവധി കായികതാരങ്ങളെ വാര്‍ത്തെടുത്ത കെഎസ് ജിംനേഷ്യത്തിന്റെ പാരമ്പര്യം കാത്തുസൂക്ഷിച്ചാണ് ഈ യുവതാരങ്ങള്‍ അന്താരാഷ്‌ട്ര തലത്തിലേക്ക് തെരഞ്ഞെടുക്കപ്പെട്ടത്. പ്രശസ്ത പരിശീലകനും ഇതേ മത്സരത്തില്‍ ഒഫീഷ്യലായി തെരഞ്ഞെടുക്കപ്പെടുകയും ചെയ്ത വേണുമാധവന്റെ ശിക്ഷണത്തിലാണ് ഇവര്‍ പരിശീലനം പൂര്‍ത്തിയാക്കിയത്.

ലോകവേദിയിലേക്ക് തെരഞ്ഞെടുക്കപ്പെട്ട താരങ്ങളെ ഇരവിപുരം മണ്ഡലം പ്രതിനിധി വിഷ്ണുമോഹന്‍ തട്ടാമല കെഎസ് ജിംനേഷ്യത്തില്‍ വച്ച് ആദരിച്ചു. 13 മുതല്‍ 16 വരെ ഗോവയിലെ മഡ്ഗാവിലാണ് വേള്‍ഡ് മാസ്റ്റേഴ്‌സ് പവര്‍ ഗെയിംസ് നടക്കുന്നത്. ലോകത്തിന്റെ വിവിധ ഭാഗങ്ങളില്‍ നിന്നുള്ള കരുത്തര്‍ അണിനിരക്കുന്ന വേദിയില്‍ വിജയം കൊയ്യാമെന്ന ആത്മവിശ്വാസത്തിലാണ് ഈ താരങ്ങള്‍. ചടങ്ങില്‍ ജിംനേഷ്യം ഭാരവാഹികളും നാട്ടുകാരും പങ്കെടുത്തു. ഇരവിപുരം മണ്ഡലത്തിലെ നിയുക്ത എംഎല്‍എ വിഷ്ണു മോഹന്‍ തട്ടാമല താരങ്ങളെ പൊന്നാട അണിയിച്ച് ആദരിച്ചു.