ആലത്തൂര്‍: ആലത്തൂര്‍ സബ്.ആര്‍ടി ഓഫീസില്‍ വിജിലന്‍സിന്റെ മിന്നല്‍ പരിശോധന. സിപിഎം മുന്‍ ബ്രാഞ്ച് സെക്രട്ടറിയായ ഏജന്റില്‍ നിന്നും 59,110 രൂപ പിടിച്ചെടുത്തു. കൂടാതെ ഓഫീസ് പരിശോധിച്ചതില്‍ കൈക്കൂലി പിരിക്കുന്നതിന് വേണ്ടി തയ്യാറാക്കിയ ലിസ്റ്റ് കമ്പ്യൂട്ടറില്‍ നിന്നും കണ്ടെത്തി.

സബ് ആര്‍ ടി ഓഫീസില്‍ പൊതുജനങ്ങള്‍ക്ക് നല്‍കുന്ന സേവനത്തിന് ഏജന്റുമാര്‍ മുഖേന കൈക്കൂലി വാങ്ങുന്നു എന്ന ആരോപണത്തിന്റെ അടിസ്ഥാനത്തിലായിരുന്നു പരിശോധന.
ഉച്ചയ്‌ക്ക് രണ്ട് മണിക്ക് തുടങ്ങിയ മിന്നല്‍ പരിശോധനയില്‍ സിവില്‍ സ്റ്റേഷന്‍ പരിസരത്ത് നിന്നും ഇടനിലക്കാരില്‍ നിന്നും ജോയിന്റ് ആര്‍ടിഒയ്‌ക്ക് നല്‍കനായി മറ്റ് ഏജന്റുമാരില്‍ നിന്ന് ശേഖരിച്ച 59,910 രൂപയും, ലിസ്റ്റും ഏജന്റായ കോട്ടായി സ്വദേശിയും സിപിഎം മുന്‍ ബ്രാഞ്ച് സെക്രട്ടറിയായ ഗിരീഷിന്റെ കൈയില്‍ നിന്നും കണ്ടെത്തി.

രണ്ടാഴ്ചയില്‍ ഒരിക്കല്‍ മറ്റ് ഏജന്റുമാരില്‍ നിന്നും ജീവനക്കാര്‍ക്ക് വീതം വയ്‌ക്കാനായി കൊണ്ടുവന്ന തുകയാണ് വിജിലന്‍സ് പിടികൂടിയത്. ആരില്‍ നിന്നെല്ലാം എത്ര രൂപ കൈപ്പറ്റണമെന്നും ഈ തുക ആര്‍ക്കെല്ലാം വീതം വയ്‌ക്കണമെന്നും ലിസ്റ്റില്‍ വിവരമുണ്ടായിരുന്നു.

ഗിരീഷ് ആര്‍ടി ഓഫീസിലെ താല്‍ക്കാലിക ഡ്രൈവറായി എംപ്ലോയ്‌മെന്റ് എക്സ്‌ചേഞ്ച് മുഖാന്തിരം വന്നയാളാണ്. 15 വര്‍ഷം കഴിഞ്ഞ വാഹനങ്ങള്‍ ഉപയോഗിക്കാന്‍ പാടില്ല എന്ന കേന്ദ്ര നിയമത്തിന്റെ അടിസ്ഥാനത്തില്‍ നിയമനം നടന്നില്ല. ഇതേ തുടര്‍ന്നാണ് ഇയാള്‍ ഏജന്റായി പ്രവര്‍ത്തിക്കാന്‍ തുടങ്ങിയത്.

പരിശോധനയിലെ തെളിവുകളുടെ അടിസ്ഥാനത്തില്‍ സര്‍ക്കാരിലേക്ക് റിപ്പോര്‍ട്ട് കൈമാറുമെന്നും ഉത്തരവ് ലഭിക്കുന്ന മുറയ്‌ക്ക് ഇവര്‍ക്കെതിരെ കേസേടുക്കുമെന്നും വിജിലന്‍സ് ഡിവൈഎസ്പി പറഞ്ഞു.

ഉച്ചയ്‌ക്ക് രണ്ട് മണിക്ക് ആരംഭിച്ച പരിശോധന രാത്രി എട്ടുമണി വരെ നീണ്ടു.
പാലക്കാട് വിജിലന്‍സ് യൂണിറ്റിന്റെ ചാര്‍ജുള്ള തൃശൂര്‍ വിജിലന്‍സ് യൂണിറ്റ് ഡിവൈഎസ്പി ബിജുകുമാറിന്റെ നിര്‍ദേശപ്രകാരം പാലക്കാട് വിജിലന്‍സ് യൂണിറ്റ് ഇന്‍സ്‌പെക്ടര്‍ ഷിജു എബ്രഹാമിന്റെ നേതൃത്വത്തില്‍ പാലക്കാട് ഇക്കണോമിക്‌സ് ആന്‍ഡ് സ്റ്റാറ്റിസ്റ്റിക്‌സ് ഡിപ്പാര്‍ട്ട്‌മെന്റിലെ റിസര്‍ച്ച് ഓഫീസര്‍ ജസ്റ്റിനാണ് പരിശോധന നടത്തിയത്. പാലക്കാട് വിജിലന്‍സ് യൂണിറ്റിലെ എഎസ്‌ഐ ഹരിഹരന്‍, സീനിയര്‍ സിപിഒമാരായ സുഭാഷ്, രാജേഷ്, വിനോദ്, രഞ്ജിത്ത്, ബാലകൃഷ്ണന്‍, സുജിത്, സിപിഒമാരായ വീണ, ഡ്രൈവര്‍ ഷംസുദ്ദീന്‍, സൈബര്‍ ഉദ്യോഗസ്ഥന്‍ ഷിബിന്‍ എന്നിവരും പങ്കെടുത്തു.