ന്യൂസിലൻഡിനെതിരായ നാലാം ഏകദിനത്തിൽ ഇന്ത്യയ്ക്ക് വമ്പൻ തോൽവി. മൗണ്ട് മൗംഗനുയിയിലെ ബേ ഓവലിൽ നടന്ന മത്സരത്തിൽ 244 റൺസിന്റെ കൂറ്റൻ പരാജയമാണ് ഇന്ത്യ നേരിട്ടത്.

334 റൺസ് വിജയലക്ഷ്യം പിന്തുടർന്നിറങ്ങിയ ഇന്ത്യൻ ബാറ്റിംഗ് നിര, മാറ്റ് ഹെന്റിയുടെ മാരക ബൗളിംഗിന് മുന്നിൽ തകർന്ന് വെറും 26.4 ഓവറിൽ 89 റൺസിന് പുറത്തായി.

മത്സരത്തിൽ കിവികൾക്കായി ഹെൻറി ആറ് വിക്കറ്റ് നേടിയാണ് ഇന്ത്യയെ വീഴ്ത്തിയത്. രോഹിത് ശർമ്മ, വിരാട് കോലി, ശ്രേയസ് അയ്യർ എന്നിവരെ ആദ്യ ഓവറിൽ തന്നെ പുറത്താക്കിയ ഹെന്റി മത്സരത്തിന്റെ ഗതി പൂർണ്ണമായും മാറ്റിമറിച്ചു. പിന്നീട് ഇഷാൻ കിഷൻ, കുൽദീപ് യാദവ്, ഗൂർനൂർ ബ്രാർ എന്നിവരെക്കൂടി വീഴ്ത്തിയ ഹെൻറി കിവീസിന് വിജയം സമ്മാനിച്ചു.

മത്സരത്തിൽ ആദ്യ റൺസ് നേടുന്നതിന് മുമ്പ് തന്നെ ഇന്ത്യയുടെ മൂന്ന് വിക്കറ്റുകൾ വീണു. ഏകദിനത്തിൽ ഒരു മത്സരത്തിലെ ഇന്ത്യയുടെ ഏറ്റവും മോശം തുടക്കമായിരുന്നു ഇത്.

ചരിത്രത്തിൽ ആദ്യമായാണ് ഇന്ത്യ ഈ ഫോർമാറ്റിൽ ഒറ്റ റൺസ് നേടുന്നതിന് മുമ്പ് തന്നെ മൂന്ന് വിക്കറ്റുകൾ നഷ്ടമാവുന്നത്. 2023ൽ ഓസ്‌ട്രേലിയക്കെതിരെ നടന്ന മത്സരത്തിൽ രണ്ട് റണ്സിനിടെ മൂന്ന് വിക്കറ്റുകൾ നഷ്ടമായതായിരുന്നു ഇതിന് മുമ്പ് ഇന്ത്യയുടെ ഏറ്റവും മോശം തുടക്കമായി രേഖപ്പെടുത്തിയിരുന്നത്.

അതേസമയം ആദ്യം ബാറ്റ് ചെയ്ത ന്യൂസിലൻഡ് 108 പന്തിൽ 125 റൺസ് നേടിയ വിൽ യങ്, 58 റൺസ് നേടിയ ടീം സീഫെർട്ട് എന്നിവരുടെ മികവിലാണ് 50 ഓവറിൽ 334 റൺസെന്ന ശക്തമായ സ്കോർ പടുത്തുയർത്തിയത്.

നവംബർ 17നാണ് പരമ്പരയിലെ അവസാന പോരാട്ടം. നിലവിൽ 2-1ന് ഇന്ത്യ പരമ്പരയിൽ മുന്നിലാണെങ്കിലും അവസാന മത്സരം വിജയിച്ചാൽ ന്യൂസിലാൻഡിന് പരമ്പര സമനിലക്കാൻ സാധിക്കും.