மற்றொரு வகை சுனாமி திறந்த கடலில் உருவாகிறது. இவை நிலநடுக்கங்களால் அல்லது சில நேரங்களில் நீருக்கடியில் ஏற்படும் எரிமலை வெடிப்பு போன்ற சக்திவாய்ந்த நிகழ்வுகளால் நேரடியாகத் தூண்டப்படுகின்றன.

இவை 2011 ஜப்பான் சுனாமி போல ஆயிரக்கணக்கான மைல்கள் பயணம் செய்து, மக்கள் வசிக்கும் பகுதிகளைத் தாக்கி பெரும் அழிவையும் உயிர் இழப்பையும் ஏற்படுத்தக்கூடியவை.

மிகப்பெரிய மெகாசுனாமி 1950களில் ஏற்பட்டது, அது 500 மீட்டருக்கும் அதிகமான உயரம் கொண்டது.

தற்போது நிகழ்ந்த இந்த மெகாசுனாமி இரண்டாவது பெரிய அலையாகக் கருதப்படுகின்றது.

முனைவர் ஹிக்மன், சுனாமி தாக்கிய சில வாரங்களுக்குப் பிறகு ட்ரேசி ஆர்ம் ஃப்யோர்டு பகுதிக்கு சென்றார். அலாஸ்காவின் இயற்கை அதிசயங்களை காணும் சுற்றுலா கப்பல்களிடையே பிரபலமான இடமாக அது விளங்குகிறது.

மலைச்சரிவுகளில் மரங்கள் முறிந்து கிடப்பதையும், அவை தண்ணீருக்குள் தூக்கி எறியப்பட்டிருப்பதையும் அவர் கண்டார். மேலும், மண் மற்றும் தாவரங்கள் இல்லாமல் பாறைகளாக மாறியிருந்த பரந்த பகுதிகளையும் அவர் கவனித்தார்.

செங்குத்தான மலைகள், குறுகிய கடற்கரை இடுக்குகள் மற்றும் அடிக்கடி ஏற்படும் நிலநடுக்கங்கள் காரணமாக அலாஸ்கா இத்தகைய மெகாசுனாமிகளால் பாதிக்கப்படக்கூடிய நிலையில் உள்ளது.

இப்போது ‘சயின்ஸ்’ இதழில் வெளியிடப்பட்ட புதிய ஆய்வு, காலநிலை மாற்றத்தால் தூண்டப்படும் பனிப்பாறை உருகுதல் மற்றும் பனி உறைந்த நிலம் சிதைவடைதல் ஆகியவை இத்தகைய சரிவுகளை மோசமாக்குகின்றன என்று தெரிவிக்கிறது.

அந்த ஆராய்ச்சிக் குழுவினர் களப்பணி, நில அதிர்வு மற்றும் செயற்கைக்கோள் தரவுகளை ஒருங்கிணைத்து, அடுத்தடுத்து நிகழ்ந்த நிகழ்வுகளின் சங்கிலித் தொடரை மீண்டும் உருவாக்கி, அலையின் உயரத்தைக் கண்டறிந்தனர்.

லண்டன் பல்கலைக்கழகக் கல்லூரியைச் சேர்ந்த முனைவர் ஸ்டீபன் ஹிக்ஸ், முன்னதாக இந்தப் பனிப்பாறை “பாறையின் ஒரு பகுதியைத் தாங்கிப் பிடிக்க உதவியது” என்றும், பனி பின்வாங்கியபோது அது செங்குத்துப் பாறையின் அடிப்பகுதியைத் திறந்துவிட்டதால் “பாறைப் பகுதி திடீரென நீருக்குள் சரிந்து விழுந்தது” என்றும் கூறினார்.

அவரும் அவருடைய சக ஆய்வாளர்களும் பல ஆண்டு காலங்களாக சுனாமிகளைப் பற்றி ஆய்வு செய்து வருகின்றனர், மேலும் அவர்கள் இது குறித்து கவலை கொண்டுள்ளனர்.

“இப்போது அதிகமான மக்கள் தொலைதூரப் பகுதிகளுக்குச் செல்கிறார்கள். பெரும்பாலும் இந்த சுற்றுலா கப்பல்கள் காலநிலை மாற்றத்தைப் பற்றி அறிந்து கொள்ளவே இத்தகைய இயற்கை அழகு நிறைந்த இடங்களுக்குச் செல்கின்றன. ஆனால் அவை அபாயகரமான இடங்களாகும்” என்று முனைவர் ஸ்டீபன் ஹிக்ஸ் குறிப்பிட்டார்.

மெகாசுனாமிகளின் அபாயங்கள் அதிகரித்து வருகின்றன என்பதில் எந்த சந்தேகமும் இல்லை என்று கூறிய முனைவர் ஹிக்மேன்,

“இந்த நேரத்தில், இவை ஒரு சிறிய அளவு மட்டுமல்ல, மிகப்பெரிய அளவில் அதிகரித்து வருகின்றன என்பதில் நான் உறுதியாக இருக்கிறேன்” என்றும் தெரிவித்தார்.

மேலும், “சில ஆண்டு காலங்களுக்கு முன்பு இருந்ததை விட, இவை சுமார் 10 மடங்கு அடிக்கடி நிகழக்கூடும்” என்று அவர் குறிப்பிட்டார்.

மெகாசுனாமிகளால் பாதிக்கப்படக்கூடிய அலாஸ்காவின் பகுதிகளில் உள்ள அபாயங்களை விரிவாகக் கண்காணிக்க வேண்டும் என்று விஞ்ஞானிகள் வலியுறுத்தி உள்ளனர்.

இந்நிலையில், தொடர்பான அச்சத்தின் காரணமாக சில கப்பல் நிறுவனங்கள் ட்ரேசி ஆர்ம் பகுதிக்கு கப்பல்களை அனுப்புவதை நிறுத்துவதாக அறிவித்துள்ளன.

இது, பிபிசிக்காக கலெக்டிவ் நியூஸ்ரூம் வெளியீடு