இலங்கை முன்னாள் ஜனாதிபதி மஹிந்த ராஜபக்ஸவின் மனைவியான ஷிரந்தி ராஜபக்ஸ, கொழும்பு தேசிய மருத்துவமனையில் அனுமதிக்கப்பட்டுள்ளதாக சிறைச்சாலைகள் தலைமையகம் தெரிவித்துள்ளது.
சிறைச்சாலைகள் ஊடகப் பேச்சாளரும் சிறைச்சாலைகள் ஆணையாளருமான சேனக பல்லெதென்ன பிபிசி சிங்கள சேவையிடம் பேசுகையில், விசேட மருத்துவர் ஒருவரின் பரிந்துரையின் பேரில் ஷிரந்தி ராஜபக்ஸ இன்று (அக்டோபர் 12) கொழும்பு தேசிய மருத்துவமனைக்கு அழைத்துச் செல்லப்பட்டதாகத் தெரிவித்தார்.
“சிறைச்சாலை மருத்துவமனையின் விசேட மருத்துவர் ஒருவரின் பரிந்துரையின் பேரில் ஷிரந்தி ராஜபக்ஸ இன்று கொழும்பு தேசிய மருத்துவமனையில் அனுமதிக்கப்பட்டார். அவரைப் பரிசோதித்த இதய நோய் நிபுணர் ஒருவர், அவரை கொழும்பு தேசிய மருத்துவமனையில் அனுமதிக்குமாறு பரிந்துரைத்தார். அதற்கிணங்க, அவர் மருத்துவமனையில் அனுமதிக்கப்பட்டுள்ளார்,” என்று சிறைச்சாலைகள் ஊடகப் பேச்சாளர் கூறினார்.
ஷிரந்தி ராஜபக்ஸ ஏன் விளக்கமறியலில் வைக்கப்பட்டார்?
‘சிறிலியா சவிய’ அறக்கட்டளைக்குச் சொந்தமான வங்கிக் கணக்கு ஒன்றில் தேசிய சேமிப்பு வங்கி 100 லட்ச ரூபாயை வரவு வைத்தது தொடர்பான ஊழல், ஊழலுக்கு உடந்தையாக இருத்தல் மற்றும் குற்றவியல் ரீதியாக நிதியைத் தவறாகப் பயன்படுத்தியமை ஆகிய குற்றச்சாட்டுகளின் பேரில் ஷிரந்தி ராஜபக்ஸ கைது செய்யப்பட்டார். லஞ்ச அல்லது ஊழல் குற்றச்சாட்டுகளை விசாரிக்கும் ஆணைக்குழு ஷிரந்தி ராஜபக்ஸஷ மற்றும் தேசிய சேமிப்பு வங்கியின் அப்போதைய தலைவர் பிரதீப் காரியவசம் ஆகியோரை அக்டோபர் 5-ஆம் தேதி கைது செய்து நீதிமன்றத்தில் முன்னிறுத்தியது.
ஷிரந்தி ராஜபக்ஸவை அக்டோபர் 13-ஆம் தேதி வரை விளக்கமறியலில் வைக்குமாறு கொழும்பு நீதவான் நீதிமன்றம் உத்தரவிட்டது; அதேவேளையில், தேசிய சேமிப்பு வங்கியின் முன்னாள் தலைவர் பிரதீப் காரியவசம் பிணையில் விடுவிக்கப்பட்டார்.
இந்தச் சம்பவம் தொடர்பான வழக்கு நாளை (அக்டோபர் 13) கொழும்பு நீதவான் நீதிமன்றத்தில் மீண்டும் விசாரணைக்கு எடுத்துக்கொள்ளப்படவுள்ளது.
மஹிந்த ராஜபக்ஸவும் மருத்துவமனையில் அனுமதி
முன்னாள் ஜனாதிபதி மஹிந்த ராஜபக்ஸவும் உடல்நலக்குறைவு காரணமாக மருத்துவமனையில் அனுமதிக்கப்பட்டுள்ளார்.
முன்னாள் ஜனாதிபதி இன்று காலை (அக்டோபர் 12) தனியார் மருத்துவமனை ஒன்றில் அனுமதிக்கப்பட்டதாகவும், அவருக்குப் பல மருத்துவப் பரிசோதனைகள் மேற்கொள்ளப்பட்டதாகவும் அவரது ஊடகப் பேச்சாளரான சட்டத்தரணி மனோஜ் கமகே ஊடகங்களிடம் தெரிவித்தார்.
“முன்னாள் ஜனாதிபதி ஆபத்தான நிலையில் இருப்பதாகப் பரவும் செய்திகள் முற்றிலும் பொய்யானவை. அவர் அத்தகைய ஆபத்தான நிலையில் இல்லை. அவரது வயதைக் கருத்தில் கொண்டு, மருத்துவப் பரிசோதனைகளுக்காக அவர் மருத்துவமனையில் அனுமதிக்கப்பட்டுள்ளார். மருத்துவர்கள் அவரது உடல்நிலையைப் பரிசோதித்துத் தேவையான முடிவுகளை எடுப்பார்கள். அவர் ஆபத்தான நிலையில் இருக்கிறார், மனதளவில் உடைந்து போயிருக்கிறார் என்பன போன்ற செய்திகள் பொய்யானவை. மனதளவில் உடைந்து போகக்கூடியவர் அல்ல அவர். அதுதான் இந்த அரசாங்கத்திற்குத் தேவைப்படும் ஒரு பண்பு. எல்லாவற்றிற்கும் மேலாக, அவர் மஹிந்த ராஜபக்ஸ. இன்று காலையிலும் நான் அவருடன் பேசினேன். இந்த செய்திகள் அனைத்தும் பொய்யானவை,” என்று சட்டத்தரணி மனோஜ் கமகே கூறினார்.
பட மூலாதாரம், Getty Images
நிலுவையில் இருந்த பிணை மனு மீதான நீதிமன்ற உத்தரவு
கொழும்பு லேடி ரிட்ஜ்வே சிறுவர் மருத்துவமனையில் புற்றுநோயால் பாதிக்கப்பட்ட குழந்தைகளுக்காக சிடி ஸ்கேன் இயந்திரம் ஒன்றை வாங்குவதற்கு தேசிய சேமிப்பு வங்கியிலிருந்து 100 லட்ச ரூபா மோசடி செய்யப்பட்டதாகக் கூறப்படும் விவகாரம் மற்றும் ‘சிறிலியா சவிய’ அறக்கட்டளை கணக்கு தொடர்பான விசாரணைகள் குறித்து, தன்னை கைது செய்வதைத் தடுக்குமாறு கோரி முன்னாள் முதல் பெண்மணி ஷிரந்தி ராஜபக்ஸ தாக்கல் செய்திருந்த முன்ஜாமீன் (கைதுக்கு முந்தைய பிணை) மனுவை மாலிகாகந்த நீதவான் நீதிமன்றம் இன்று (அக்டோபர் 12) நிராகரித்து உத்தரவிட்டது.
‘சிறிலியா சவிய’ அறக்கட்டளை கணக்கு தொடர்பான விசாரணைகள் மற்றும் மேற்படி மோசடி விவகாரம் ஆகியவற்றில் தன்னை கைது செய்வதைத் தவிர்க்குமாறு கோரி அவர் இந்த முன்ஜாமீன் மனுவைத் தாக்கல் செய்திருந்தார்.
மாலிகாகந்த நீதவான் ஜனிதா ரோஷினி பெரேரா இந்த மனுவை பரிசீலித்தார். அரசுத் தரப்புக்காக ஆஜரான சட்டமா அதிபர் திணைக்களத்தின் சிரேஷ்ட அரச சட்டத்தரணி சமதரி பியசேன முன்வைத்த ஆரம்பகட்ட ஆட்சேபனைகளை ஏற்றுக்கொண்ட நீதவான், நிலுவையில் இருந்த அந்தப் பிணை மனுவை நிராகரித்தார்.
‘சிறிலியா சவிய’ கணக்கு தொடர்பான விவகாரத்தில் நிதிக்குற்ற விசாரணைப் பிரிவினரால் தான் கைது செய்யப்படுவதைத் தடுப்பதற்காகவே ஷிரந்தி ராஜபக்ஸ, மாலிகாகந்த நீதவான் நீதிமன்றத்தில் இந்த முன்ஜாமீன் மனுவைத் தாக்கல் செய்திருந்தார்.
இந்த மனு கடந்த 6-ஆம் திகதி நீதிமன்றத்தில் விசாரணைக்கு எடுத்துக்கொள்ளப்பட்டது. அப்போது, நிதிக்குற்ற விசாரணைப் பிரிவின் பொறுப்பதிகாரி (OIC) இன்று (அக்டோபர் 12) நீதிமன்றத்தில் ஆஜராகி இது தொடர்பான உண்மைகளைத் தெரிவிக்குமாறு உத்தரவிடப்பட்டு அறிவித்தல் அனுப்பப்பட்டிருந்தது.
