7

கிளி மக்கள் அமைப்பின் ஏற்பாட்டில் எதிர்வரும் ஒக்டோபர் 17ஆம் திகதி கிளிநொச்சியில் முத்தமிழ் விழா நடைபெறவுள்ளது. இவ்விழாவில் தமிழ் மொழிச் செயற்பாட்டாளர் திரு. வேலுப்பிள்ளை இறைபிள்ளைக்கு ‘மண்ணின் மைந்தன் 2025’ விருது வழங்கிக் கௌரவிக்கப்படவுள்ளார்.

பரந்தன், குமரபுரத்தில் அமைந்துள்ள சுப்பிரமணியம் இராசம்மா மணிமண்டபத்தில் அன்றைய தினம் காலை 8.30 மணிக்கு இவ்விழா நடைபெறவுள்ளது. தமிழ் மொழி, கலை, பண்பாடு ஆகியவற்றைப் போற்றும் வகையில் ஏற்பாடு செய்யப்பட்டுள்ள இந்நிகழ்வில் இயல், இசை, நாடகம் சார்ந்த கலைப் பண்பாட்டு அம்சங்கள் முன்னிறுத்தப்படவுள்ளன.

தமிழ் மொழிச் செயற்பாட்டாளராகத் திகழும் வேலுப்பிள்ளை இறைபிள்ளைக்கு வழங்கப்படவுள்ள ‘மண்ணின் மைந்தன் 2025’ விருது, தாயக மண்ணுடனும் தமிழ் மொழியுடனும் தொடர்புடைய அவரது பணிகளை அங்கீகரிக்கும் வகையில் அமைந்துள்ளது.

கிளிநொச்சி மக்களின் கலை, இலக்கிய மற்றும் பண்பாட்டு அடையாளங்களை முன்னிறுத்தும் இம்முத்தமிழ் விழாவைச் சிறப்பிக்கும் வகையில் பல்வேறு நிறுவனங்களும் வர்த்தக நிறுவனங்களும் அனுசரணை வழங்கியுள்ளன.

இவ்விழாவில் கலந்துகொண்டு சிறப்பிக்குமாறு கலைஞர்கள், இலக்கிய ஆர்வலர்கள், தமிழ் மொழிப்பற்றாளர்கள் மற்றும் பொதுமக்களுக்கு கிளி மக்கள் அமைப்பு அழைப்பு விடுத்துள்ளது.