தனது சுயசரிதை புத்தகம் வெளியாவதற்கு முன்னதாக, காணொளி மூலம் தனது வாழ்க்கை அனுபவங்களை அவர் பகிர்ந்துள்ளார்.

ராஜீவ் காந்தியை முதன்முதலில் சந்தித்தது குறித்துப் பேசிய சோனியா காந்தி, “அவரை முதன்முதலில் சந்தித்தபோதே, இவருடன் இருக்க வேண்டும் என்று எனக்குத் தோன்றியது. உண்மையில், அவருக்கும் அதேபோன்ற உணர்வு இருந்ததை நான் உணர்ந்தேன்,” என்று கூறியுள்ளார்.

தொடர்ந்து பேசிய அவர், “நான் அவரை முதன்முதலில் சந்தித்தபோது, எங்கள் இருவருக்கும் பொதுவான நண்பர் ஒருவர் எங்களை அறிமுகப்படுத்தி வைத்தது எனக்கு நினைவிருக்கிறது,” என்று தெரிவித்துள்ளார்.

“அதன்பிறகு நாங்கள் நண்பர்களானோம். நண்பர்களின் விருந்துகளுக்குச் செல்லத் தொடங்கினோம். பல்வேறு இடங்களுக்கும் ஒன்றாகச் சென்றோம். ஏராளமான மாணவர்கள் கலந்துகொண்ட காதலர் தின விருந்துக்குக்கூட நாங்கள் சென்றிருக்கிறோம்,” என்று அவர் நினைவுகூர்ந்துள்ளார்.

“அவர் மிகவும் மென்மையான தோற்றம் கொண்டவராக இருந்தார். உண்மையில், அவர் மிகவும் அழகாக இருந்தார். ஆனால், அவரிடம் இருந்த மென்மையான குணம்தான் என்னை மிகவும் கவர்ந்தது.”

“அவரை முதன்முதலில் சந்தித்தபோது எனக்கு ஏற்பட்ட அந்த உணர்வையும், அவர் மீது ஏற்பட்ட ஈர்ப்பையும் என்னால் ஒருபோதும் மறக்க முடியாது,” என்று சோனியா காந்தி தெரிவித்துள்ளார்.

79 வயதான சோனியா காந்தியின் ‘உரிமை உணர்வு: அன்பின் ஒரு பயணம்’ (Belonging: A Journey of Love) என்ற சுயசரிதை புத்தகம் நவம்பர் 10ஆம் தேதி வெளியாகவுள்ளது. இந்தப் புத்தகத்தை அமெரிக்காவில் ஆல்ஃபிரட் ஏ. நாஃப் பதிப்பகமும், பிரிட்டனில் வில்லியம் காலின்ஸ் பதிப்பகமும் வெளியிடுகின்றன.

இந்தியாவில் இந்தப் புத்தகம் வெளியாவதற்கு முன்பே அதுகுறித்து பரவலாக விவாதிக்கப்பட்டு வருகிறது.

ஆல்ஃபிரட் ஏ. நாஃப் பதிப்பகம் வெளியிட்ட அறிக்கையில், வாழ்க்கையின் மகிழ்ச்சிகளையும் ஆழமான ஏமாற்றங்களையும் உள்ளடக்கிய, தனது மனதின் பயணத்துக்குச் சான்றாக இந்த நினைவுக் குறிப்புகள் அமைய வேண்டும் என்று விரும்புவதாக சோனியா காந்தி தெரிவித்துள்ளார்.

வில்லியம் காலின்ஸ் பதிப்பகம் வெளியிட்டுள்ள தகவலின்படி, இந்தப் புத்தகம் 1965ஆம் ஆண்டு கேம்பிரிட்ஜ் நகரில் தொடங்குகிறது.

அப்போது 19 வயது மாணவியாக இருந்த சோனியா மைனோ, ராஜீவ் காந்தியைக் காதலிக்கத் தொடங்கிய தருணங்களில் இருந்து அவரது வாழ்க்கை விவரிக்கப்படுகிறது.

இந்தப் புத்தகத்தில் சோனியா காந்தி தனது வாழ்க்கையை மிகுந்த அன்புடனும் வெளிப்படைத்தன்மையுடனும் திரும்பிப் பார்ப்பதாகப் பதிப்பகத்தினர் தெரிவித்துள்ளனர்.

இத்தாலியில் உள்ள ஒரு சிறிய நகரத்தில் கழிந்த அவரது குழந்தைப் பருவம் முதல், எதிர்பாராத விதமாக இந்திய அரசியலின் மையத்துக்கு அவர் வந்தது வரையிலான நிகழ்வுகள் இந்தப் புத்தகத்தில் இடம்பெற்றுள்ளன.

அதேநேரத்தில், அவரது தனிப்பட்ட வாழ்க்கை பல்வேறு துயரங்களையும் பெரும் மாற்றங்களையும் சந்தித்தது.

அவரது மாமியாரும் முன்னாள் பிரதமருமான இந்திரா காந்தி, பாதுகாவலர்களால் சுடப்பட்டபோது, அவரை சோனியா காந்தி மருத்துவமனைக்கு அழைத்துச் சென்றார்.

ஏழு ஆண்டுகளுக்குப் பிறகு, தற்கொலைப் படைத் தாக்குதலில் அவரது கணவர் ராஜீவ் காந்தி கொல்லப்பட்டார். அதைத் தொடர்ந்து, ராஜீவ் காந்தியின் உடலை சோனியா காந்தி வீட்டுக்குக் கொண்டு வந்தார்.

இந்தத் துயரமான நிகழ்வுகளும் சோனியா காந்தியின் வாழ்க்கைப் பயணத்தில் முக்கிய இடம் பெற்றுள்ளதாகப் புத்தகம் குறித்த அறிமுகத்தில் தெரிவிக்கப்பட்டுள்ளது.

எக்ஸ் தளத்தில் இணைந்த சில மணி நேரத்திலேயே சோனியா காந்தியைப் பின்தொடர்பவர்களின் எண்ணிக்கை ஏறத்தாழ 22 ஆயிரத்தை எட்டியது.

ராஜீவ் காந்தியுடன் கழித்த நாட்களின் நினைவுகளை அவர் பகிர்ந்துகொண்டதற்கு அரசியல் தலைவர்கள் மற்றும் பத்திரிகையாளர்கள் பலரும் சமூக ஊடகங்களில் கருத்து தெரிவித்துள்ளனர்.

காங்கிரஸ் கட்சியின் மூத்த தலைவர் பவன் கேரா தனது சமூக ஊடகப் பதிவில், “சோனியாவுக்கும் ராஜீவுக்கும் இடையிலான காதல் கதை, அழகானதாகவும் அமைதியானதாகவும், நம்புவதற்கே கடினமாக இருக்கும் அளவுக்கு முழுமையானதாகவும் இருந்தது. ஆனால், பின்னர் ஏற்பட்ட துயரச் சம்பவங்கள் அனைத்தையும் சிதைத்துவிட்டன,” என்று குறிப்பிட்டுள்ளார்.

“இருப்பினும், தாங்க முடியாத துயரத்துக்கு மத்தியிலும் பொறுப்பு, கடமை, விசுவாசம் மற்றும் தியாகம் ஆகியவற்றின் மீதான உறுதிப்பாடு தொடர்ந்தது. தற்போது எக்ஸ் தளத்தில் இணைந்துள்ள சோனியா காந்தி, தனது கணவர் ராஜீவ் காந்தியை முதன்முதலில் சந்தித்த நாட்கள் குறித்த அழகான நினைவுகளைப் பகிர்ந்துள்ளார்,” என்று அவர் தெரிவித்துள்ளார்.

“தனது புத்தகத்தில் காதல், பிரிவின் வலி மற்றும் தளராத மன உறுதி ஆகியவற்றை இன்னும் ஆழமான உணர்வுகளுடன் அவர் விவரித்துள்ளார். எளிதில் மறக்க முடியாத வகையில் அந்தக் கதை சொல்லப்பட்டுள்ளது,” என்று பவன் கேரா குறிப்பிட்டுள்ளார்.

சோனியா காந்தியின் காணொளிப் பதிவுக்கு எதிர்வினையாற்றிய கேரள முதலமைச்சரும் காங்கிரஸ் மூத்த தலைவருமான வி.டி. சதீசன் “அன்பு, கடமை மற்றும் விடாமுயற்சி நிறைந்த உங்கள் வாழ்க்கைப் பயணம் பல தலைமுறைகளுக்கு உத்வேகம் அளித்துள்ளது,” என்று தெரிவித்துள்ளார்.

“நவம்பர் 10ஆம் தேதி நீங்களும் ராஜீவ் காந்தியும் பகிர்ந்துகொண்ட விலைமதிப்பற்ற உலகத்தைப் பற்றி அறிந்துகொள்ளும் வாய்ப்பு எங்கள் அனைவருக்கும் கிடைக்கவுள்ளது,” என்று அவர் பதிவிட்டுள்ளார்.

ஜம்மு காஷ்மீரின் முன்னாள் முதல்வரும் மக்கள் ஜனநாயகக் கட்சியின் தலைவருமான மெகபூபா முஃப்தி, சோனியா காந்தியின் பதிவுக்கு எதிர்வினையாற்றியுள்ளார்.

“சோனியா காந்தியைப் பலமுறை சந்திக்கும் வாய்ப்பு எனக்குக் கிடைத்துள்ளது. ஒவ்வொரு சந்திப்புக்குப் பிறகும் அவரது அன்பான அணுகுமுறையும் கண்ணியமும் என்னைக் கவர்ந்துள்ளன,” என்று அவர் தெரிவித்துள்ளார்.

“கடினமான சூழ்நிலைகளை அவர் எதிர்கொண்ட விதமும், வெற்றியையும் தோல்வியையும் ஒரே அளவிலான கண்ணியத்துடனும் நிதானத்துடனும் ஏற்றுக்கொண்ட விதமும் மிகவும் உத்வேகம் அளிக்கின்றன,” என்று மெகபூபா முஃப்தி குறிப்பிட்டுள்ளார்.

“தொடர்ச்சியான வெறுப்பையும் எதிர்ப்பையும் எதிர்கொண்ட போதிலும், தனது வாழ்க்கைப் பயணத்தை நேர்மை, மென்மை, அன்பு மற்றும் பெருந்தன்மையுடன் சோனியா காந்தி பகிர்ந்துகொண்டிருப்பது அவரது ஆளுமையின் ஆழத்தை வெளிப்படுத்துகிறது,” என்று அவர் பதிவிட்டுள்ளார்.

ஊடகவியலாளர் அஜய் குமாரும் சோனியா காந்தியின் காணொளி பற்றி கருத்து தெரிவித்துள்ளார்.

“தேசிய அளவில் அறியப்பட்ட இந்திய அரசியல் தலைவர் ஒருவர் தனது தனிப்பட்ட வாழ்க்கை, உறவுகள், காதல் மற்றும் குடும்பம் குறித்த விவரங்களைப் பொதுவெளியில் பகிர்ந்துகொள்வது வரவேற்கத்தக்க மாற்றம்,” என்று அவர் குறிப்பிட்டுள்ளார்.

“சில காரணங்களால் இந்திய அரசியலில் தனிப்பட்ட உணர்வுகளையும் அன்பையும் பொதுவெளியில் வெளிப்படுத்துவதோ, அவற்றை வெளிப்படையாக ஒப்புக்கொள்வதோ அரிதாகவே உள்ளது,” என்று அஜய் குமார் தெரிவித்துள்ளார்

கேம்பிரிட்ஜ் பல்கலைக்கழகத்தில் ராஜீவ் காந்தியும் சோனியா காந்தியும் சந்தித்துக்கொண்ட நிகழ்வுகளை, பிரபல பத்திரிகையாளர் ரஷீத் கிட்வாய், சோனியா காந்தி குறித்து எழுதிய வாழ்க்கை வரலாற்றுப் புத்தகத்திலும் குறிப்பிட்டுள்ளார்.

பிபிசி வெளியிட்டுள்ள கட்டுரையின்படி, ரஷீத் கிட்வாய் அந்தச் சந்திப்பைப் பின்வருமாறு விவரிக்கிறார்.

“கேம்பிரிட்ஜ் பல்கலைக்கழக மாணவர்கள் தினமும் யுனிவர்சிட்டி உணவகத்தில் கூடுவது வழக்கம். அவர்கள் அனைவரும் பீர் அருந்துவார்கள். ஆனால், அவர்களில் ராஜீவ் காந்தி மட்டுமே பீரைத் தொடக்கூட மாட்டார். அப்போதுதான் கறுப்பு நிறக் கண்கள், வசீகரமான புன்னகையுடன் உயரமாகவும் அப்பாவித்தனமான தோற்றத்துடனும் இருந்த அந்த இளைஞரை சோனியா கவனித்தார்.”

“இருவருக்கும் ஒருவர் மீது மற்றொருவருக்கு ஈர்ப்பு இருந்தது. சோனியாவின் அழகைப் புகழ்ந்து ராஜீவ் காந்தி முதன்முதலில் ஒரு காகிதத்தில் கவிதை எழுதி, அதை உணவகப் பணியாளர் மூலம் அவருக்கு அனுப்பினார்.”

“அதைப் பெற்றுக்கொண்ட சோனியா சற்றுச் சங்கடமாக உணர்ந்தார். ஆனால், சோனியாவுக்கும் அறிமுகமான ராஜீவ் காந்தியின் ஜெர்மானிய நண்பர் ஒருவர், இருவருக்கும் இடையே தகவல்களைப் பரிமாறும் பணியைச் சிறப்பாகச் செய்தார்.”

ரஷீத் கிட்வாய் ஒரு சுவாரஸ்யமான தகவலையும் பகிர்ந்துள்ளார்.

“ராஜீவ் காந்தி, தான் இந்தியப் பிரதமரின் மகன் என்பதை நீண்ட காலமாக சோனியாவிடம் தெரிவிக்கவில்லை என்பதுதான் இதில் சுவாரஸ்யமான விஷயம்.”

“நீண்ட நாட்களுக்குப் பிறகு, ஒரு செய்தித்தாளில் இந்திரா காந்தியின் புகைப்படம் வெளியானது. அப்போது அந்தப் புகைப்படத்தில் இருப்பவர் தனது தாய் என்று சோனியாவிடம் ராஜீவ் காந்தி கூறினார்.”

“அதன்பிறகு, கேம்பிரிட்ஜில் படித்துக்கொண்டிருந்த இந்திய மாணவர் ஒருவர், இந்திரா காந்திதான் இந்தியாவின் பிரதமர் என்று சோனியாவிடம் தெரிவித்தார்.”

“அப்போதுதான் தான் காதலித்துக் கொண்டிருந்த நபர் எவ்வளவு முக்கியமான குடும்பத்தைச் சேர்ந்தவர் என்பதை சோனியா முதன்முறையாக உணர்ந்தார்,” என்று ரஷீத் கிட்வாய் கூறியுள்ளார்.

ராஜீவ் காந்தியின் வாழ்க்கை வரலாற்றைப் புத்தகமாக எழுதிய அஷ்வனி பட்நாகர், பிபிசியிடம் பேசுகையில், 1965ஆம் ஆண்டு பொறியியல் படிப்புக்காக கேம்பிரிட்ஜ் சென்ற ராஜீவ் காந்தி, அங்கு இத்தாலியில் பிறந்த சோனியா காந்தியைச் சந்தித்ததாகத் தெரிவித்துள்ளார்.

இருவரும் கிரேக்க உணவகம் ஒன்றுக்குச் செல்வது வழக்கம்.

இதுகுறித்து அஷ்வனி பட்நாகர் கூறுகையில், “சோனியா அமர்ந்திருக்கும் மேசைக்கு அடுத்துள்ள மேசையில் தன்னை அமர அனுமதிக்குமாறு உணவக உரிமையாளர் சார்லஸ் ஆண்டனியிடம் ராஜீவ் காந்தி கேட்டுக்கொண்டார். அதற்கு அவரைச் சம்மதிக்கவும் வைத்தார். ஒரு நல்ல கிரேக்க வணிகரைப் போல, சார்லஸ் இதற்காக ராஜீவிடம் இரட்டிப்புக் கட்டணம் வசூலித்தார்,” என்று தெரிவித்துள்ளார்.

“பின்னர், ராஜீவ் காந்தி குறித்த சிமி கரேவாலின் திரைப்படத்தில் பேசிய சார்லஸ் ஆண்டனி, ‘இவ்வளவு ஆழமாகக் காதலிக்கும் ஒருவரை நான் இதற்கு முன்பு பார்த்ததே இல்லை’ என்று கூறினார்,” எனவும் அஷ்வனி பட்நாகர் குறிப்பிட்டுள்ளார்.

கேம்பிரிட்ஜில் படித்துக் கொண்டிருந்த போது, தனது செலவுகளைச் சமாளிப்பதற்காக ராஜீவ் காந்தி ஐஸ்கிரீம் விற்பனை செய்ததாகவும், சோனியாவைச் சந்திக்க சைக்கிளில் செல்வது வழக்கம் என்றும் கூறப்படுகிறது.

அதேநேரத்தில், ராஜீவ் காந்தியிடம் பழைய ஃபோக்ஸ்வேகன் கார் ஒன்றும் இருந்தது. அந்தக் காருக்கான பெட்ரோல் செலவை அவரது நண்பர்கள் பகிர்ந்துகொண்டனர்.

– இது, பிபிசிக்காக கலெக்டிவ் நியூஸ்ரூம் வெளியீடு