இதன் நோக்கம் பொதுநலனுக்கும் தேசக் கட்டமைப்புக்கும் பங்களிப்பதாகும்.

“இது வெறும் உணர்வு சார்ந்த விஷயம் அல்ல. இந்த நிறுவனக் குழுமத்தின் செயல்பாட்டு மாதிரியே இதுதான்,” என்று அவர் கூறினார்.

இந்தச் செயல்பாட்டு முறை ஒரு நூற்றாண்டுக்கும் மேலாக காலத்தின் சோதனையைத் தாண்டி நிலைத்திருப்பதாக நோயல் டாடா சுட்டிக்காட்டினார்.

பங்குச் சந்தையில் பட்டியலிடப்படுவது அக்குழுமத்தின் அடிப்படைத் தன்மையை அழித்துவிடுவதுடன், அதன் வழிகாட்டும் கொள்கையின் வேரையே தகர்த்துவிடும் என்று அவர் வாதிடுகிறார்.

டாடா சன்ஸ் நிறுவனத்தின் முக்கியப் பணி, டாடா குழுமத்தின் நிறுவனங்களில் முதலீடு செய்வதும், அவற்றுக்கு ஆதரவளிப்பதுமாகும்.

தி இந்து நாளிதழின்படி, டாடா சன்ஸ் நிறுவனம் பங்குச் சந்தையில் பட்டியலிடப்பட்டால், பெரும்பான்மை பங்குதாரர்களாக இருக்கும் டாடா டிரஸ்ட்ஸின் உரிமைகளில் குறிப்பிடத்தக்க பாதிப்பு ஏற்படக்கூடும்.

நிறுவனம் பங்குச் சந்தையில் பட்டியலிடப்பட்ட பிறகு, அதற்கு நிறுவன முதலீட்டாளர்கள் மற்றும் வெளிநாட்டு முதலீட்டாளர்களுக்குப் பதிலளிக்கும் பொறுப்பு ஏற்படும். முதலீட்டாளர்களின் முக்கிய நோக்கம் தங்களுக்கு அதிகபட்ச லாபம் கிடைக்க வேண்டும் என்பதாக இருக்கும்.

அத்தகைய முதலீட்டாளர்கள் உடனடி லாபத்தையே எதிர்பார்ப்பார்கள் என்று டிரஸ்ட்கள் கூறுகின்றன.

அத்தகைய பங்குதாரர்கள், நெருக்கடியில் உள்ள ஒரு நிறுவனத்தை குழுமம் மீட்பதற்கோ அல்லது 15 ஆண்டுகளுக்குப் பிறகு வருமானம் ஈட்டும் என எதிர்பார்க்கப்படும் புதிய தொழில் முயற்சிகளுக்கு நிதியளிப்பதற்கோ ஒப்புதல் அளிப்பது மிகவும் கடினமாக இருக்கும்.

பட்டியலிடலை ஆதரிப்பவர்கள், ‘டாடா டிரஸ்ட்ஸ்’ மற்றும் அது பெரும்பான்மைப் பங்குகளைக் கொண்டுள்ள நிறுவனங்களின் பழைய கட்டமைப்பைப் பாதுகாப்பதையே நோயல் டாடா விரும்புவதாகக் கருதுகின்றனர்.

நாட்டின் மிகப்பெரிய வர்த்தகக் குழுமமான டாடா, மேலும் வெளிப்படைத்தன்மையுடன் இயங்க வேண்டும் என்பதே பட்டியலிடுதலை ஆதரிப்பவர்களின் வாதமாக உள்ளது.

டாடா சன்ஸ் நிறுவனத்தில் 18% பங்குகளை வைத்துள்ள ‘ஷாபூர்ஜி பல்லோன்ஜி குழுமத்தின்’ தலைவரான ஷாபூர்ஜி பல்லோன்ஜி மிஸ்திரி, நிறுவனத்தைப் பட்டியலிட வேண்டும் என்ற ரிசர்வ் வங்கியின் முடிவை ஆதரித்துள்ளார்.

வெளிப்படைத்தன்மை, பொறுப்புக்கூறல், நேர்மை மற்றும் பொறுப்புணர்வுடன் கூடிய ஒரு வலுவான நிறுவனத்தைக் கட்டமைக்க பங்குச் சந்தைப் பட்டியலிடுதல் மிக அவசியம் என்று அவர் குறிப்பிட்டுள்ளார்.

வெளிப்படைத்தன்மையும் பொதுமக்களுக்கு அதிக பொறுப்புக்கூறலும் கொண்ட ஒரு குழுமத்தால் மட்டுமே டிரஸ்ட்டுகளின் விழுமியங்களை இன்னும் தெளிவாக வெளிப்படுத்த முடியும் என்றும் அவர் தெரிவித்தார்.

இது, முதலீட்டாளர்களின் நலன்களைச் சிறந்த முறையில் பாதுகாப்பதோடு, சமத்துவத்தின் அடிப்படையில் பங்காதாயக் கொள்கையைத் தீர்மானிக்க உதவும் என்றும் அவர் சுட்டிக்காட்டினார்.

டாடா டிரஸ்ட்ஸ் என்பது ஒரு அறக்கட்டளை என்பதைச் சுட்டிக்காட்டிய மிஸ்திரி, மற்றொரு முக்கியக் கருத்தையும் வலியுறுத்தினார்; டாடா சன்ஸ் பங்குச் சந்தையில் பட்டியலிடப்பட்டால், அது வரும் பல தலைமுறைகளுக்குத் தனது அறப்பணிகளையும் சமுதாயக் கடமைகளையும் எவ்விதத் தடையுமின்றிச் சிறப்பாக நிறைவேற்ற முடியும் என்பதே அதுவாகும்.

டாடா சன்ஸ் கடன்களே இல்லாத ஒரு நிறுவனமாகும். 2024 மார்ச் மாதத்தில் நடைபெற்ற வாரியக் கூட்டத்தில், நிறுவனத்தைப் பட்டியலிடாமல் தனிப்பட்ட நிறுவனமாகவே வைத்திருக்கும் தனது முடிவில் உறுதியாக இருந்து, ஒரு முக்கிய நடவடிக்கையை அது எடுத்தது.

அது 20,000 கோடி ரூபாய் கடனை அடைத்ததோடு, முன்னுரிமைப் பங்குதாரர்களுக்கும் அவர்களின் பங்குகளுக்குரிய தொகையைத் திருப்பிக் கொடுத்தது. இதற்காக நிறுவனம் தனது சொந்த நிதி ஆதாரங்களையும், குழும நிறுவனங்களின் பங்குகளை விற்பனை செய்து திரட்டிய தொகையையும் பயன்படுத்தியது.

இனிமேல் கடன் வாங்குவதில்லை என்றும் டாடா சன்ஸ் முடிவெடுத்தது. நோயல் டாடாவின் கூற்றுப்படி, 2024 மார்ச் முதல் நிறுவனம் இந்த முடிவில் உறுதியாக கடைப்பிடித்து வருகிறது.

நோயல் டாடா கூறுகையில், “எந்தவொரு நிறுவனமும் வெறுமனே கௌரவத்தைக் காப்பாற்றிக் கொள்வதற்காக மட்டும் 20,000 கோடி ரூபாயைச் செலவிடாது. தனது அடிப்படை அமைப்பைப் பாதுகாப்பதற்காகவே அது அவ்வாறு செய்கிறது” என்றார்.

இந்திய ரிசர்வ் வங்கி, டாடா சன்ஸ் நிறுவனத்தை அளவு அடிப்படையிலான ஒழுங்குமுறையின் கீழ் ஓர் உயர் அடுக்கு வங்கி சாரா நிதி நிறுவனமாக வகைப்படுத்தியுள்ளது.

ரிசர்வ் வங்கியின் இந்த வரைமுறையின்படி, இத்தகைய நிறுவனங்களுக்குக் கூடுதல் கட்டுப்பாட்டு நிபந்தனைகள் பொருந்தும். எனவே, டாடா சன்ஸ், தன்னை ஒரு முக்கிய முதலீட்டு நிறுவனமாகப் பதிவுசெய்ததை ரத்து செய்யக் கோரியிருந்தது.

ஆனால், 2026 செப்டம்பர் 11 அன்று இந்தக் கோரிக்கையை நிராகரித்த ரிசர்வ் வங்கி, தேவையான ஒழுங்குமுறை விதிமுறைகளுக்கு இணங்குவதற்கான நடவடிக்கைகளைத் தொடருமாறு டாடா சன்ஸ் நிறுவனத்தைக் கேட்டுக்கொண்டது.

இதன் பிறகு, டாடா சன்ஸ் நிறுவனத்தின் மீது பங்குச் சந்தையில் பட்டியலிடப்பட வேண்டும் என்ற அழுத்தம் அதிகரிக்கத் தொடங்கியது. இருப்பினும், பட்டியலிடப்பட்ட பிறகு இந்தக் கூடுதல் கட்டுப்பாட்டு வரைமுறைக்குக் கீழ் வருவதை டாடா சன்ஸ் விரும்பவில்லை.

நோயல் டாடா இதைக் கருத்தில் கொண்டுதான் பட்டியலிடுதலுக்கு ஆதரவு தெரிவிக்காமல் இருக்கலாம்.

பகுப்பாய்வாளர்களின் கூற்றுப்படி, டாடா சன்ஸ் நிறுவனம் பொதுப் பங்கு வெளியீட்டைத் தவிர்க்க பல வழிகளைக் கையாளலாம்.

இவற்றில், அவர்களின் சொத்துகள் அல்லது பங்குரிமையை மறுசீரமைப்பது முதல் கொள்கை மாற்றங்களுக்கான விலக்குகள் வரையிலான கோரிக்கைகள் அடங்கும். இது தவிர, அவர்கள் ரிசர்வ் வங்கியின் முடிவை எதிர்த்து நீதிமன்றத்தில் மேல்முறையீடு செய்யவும் வாய்ப்புள்ளது.

ஒரு நிறுவனத்தை உயர் அடுக்கு வங்கி சாரா நிதி நிறுவனம்’ என்ற பிரிவில் வகைப்படுத்தப்படுவதற்கு 1 லட்சம் கோடி ரூபாய் சொத்து மதிப்பு என்ற வரம்பு நிர்ணயிக்கப்பட்டுள்ளது. டாடா சன்ஸ் தனது சொத்து மதிப்பை இந்த வரம்பிற்குக் கீழ் கொண்டு வருவது ஒரு சாத்தியமான வழியாக இருக்கும் என்று முன்னாள் ஒழுங்குமுறை அதிகாரி ஒருவர் ‘பிசினஸ் ஸ்டாண்டர்ட்’ நாளிதழிடம் தெரிவித்துள்ளார்.

ரிசர்வ் வங்கியின் விதிகளின்படி, உயர் அடுக்கு வங்கி சாரா நிதி நிறுவனங்கள், இந்தப் பிரிவில் நுழைந்த மூன்று ஆண்டுகளுக்குள் பங்குச் சந்தையில் கட்டாயமாகப் பட்டியலிடப்பட வேண்டும்.

டாடா சன்ஸ் நிறுவனம் இந்தப் பிரிவிலிருந்து வெளியேறிவிட்டால், பங்குச் சந்தைப் பட்டியலிடுதல் கட்டாயமாக இருக்காது என்று அந்த அதிகாரி நாளிதழிடம் கூறினார்.

பிசினஸ் ஸ்டாண்டர்ட் நாளிதழின் படி, டாடா சன்ஸ் தனது பங்குரிமை அமைப்பை மறுசீரமைக்கக் கூடும். அது ஷாபூர்ஜி பல்லோன்ஜி குழுமத்தின் 18% பங்குகளை விலைக்கு வாங்கலாம். இது பங்குரிமை அமைப்பையே மாற்றிவிடும். இது பங்குச்சந்தையில் பட்டியலிட வேண்டும் என்ற கட்டாயத்தை முழுமையாக நீக்காது என்றாலும், ஒழுங்குமுறை அமைப்புடன் டாடா சன்ஸ் பேச்சுவார்த்தை நடத்துவதற்கான நிலையை வலுப்படுத்தும்.

மற்றொரு விருப்பமாக, பட்டியலிடலிருந்து விலக்கு கோருவதற்குப் பதிலாக, பட்டியலிடலுக்கான தயாரிப்புகள் மற்றும் தேவையான விதிமுறைகளைச் செய்வதற்கு கூடுதல் அவகாசம் கேட்கலாம். இருப்பினும், இதன் மூலம் கோரிக்கையை அதிக காலத்திற்குத் தள்ளிப்போட முடியாது.

– இது, பிபிசிக்காக கலெக்டிவ் நியூஸ்ரூம் வெளியீடு