கடப்பா மாவட்டம், லிங்கலா மண்டலம், வேடார்லா கிராமத்தைச் சேர்ந்த வரத ரெட்டி, யூடியூப்பில் புதிய பயிர்கள் குறித்துத் தேடியபோது கர்நாடகாவில் அவகாடோ பயிரிடப்படுவதை அறிந்ததாகத் தெரிவித்தார். அவர் அங்கு நேரில் சென்று அதைப் பார்வையிட்ட பிறகு, தாமும் அவகாடோ பயிரிட முடிவு செய்தார்.

கடப்பா மாவட்டத்தில் உள்ள லிங்கலாவிலிருந்து அனந்தபுரம் மாவட்டம் பட்டலப்பள்ளி செல்லும் சாலையில் வரத ரெட்டியின் அவகாடோ தோட்டம் அமைந்துள்ளது.

வறட்சியால் பாதிக்கப்பட்ட ராயலசீமா பகுதியில் அவர் எவ்வாறு அவகாடோ பயிரிடுகிறார் என்பதைத் தெரிந்துகொள்ள பிபிசி அவரிடம் நேரடியாகப் பேசியது.

வரத ரெட்டி தனது பண்ணையில் டிசம்பர் 2022-ல் அவகாடோ சாகுபடியைத் தொடங்கினார். கர்நாடகாவில் உள்ள ஐ.ஏ.ஹெச்.ஆர் மற்றும் மடிக்கேரி-கூர்க் பகுதிகளில் உள்ள வேளாண் துறையால் உருவாக்கப்பட்ட நாற்றுகளைத் தான் கொண்டுவந்து நட்டதாக அவர் கூறினார்.

வேளாண் துறையின் ஆலோசனையைப் பெற்றுத் தைரியமாகப் பயிரை நட்டதாகவும், தற்போது நல்ல பலனை அடைந்து வருவதாகவும் அவர் தெரிவித்தார்.

“நமது மண்ணுக்கு ஏற்ற செடியை நாம் தேர்ந்தெடுக்க வேண்டும். உலகில் சுமார் 372 வகையான அவகாடோ செடிகள் இருப்பதாக அறியப்படுகிறது. நமது காலநிலைக்கு ஏற்றதைத் நாம் தேர்வு செய்ய வேண்டும். எனவே, நமது பருவநிலைக்குப் பொருந்தும் வகையில் வேளாண் துறை மூலம் தேர்ந்தெடுக்கப்பட்ட செடியைக் கொண்டுவந்து சாகுபடி செய்தோம்” என்று அவர் கூறினார்.

அவகாடோ சாகுபடியில் ஆரம்பத்தில் பல சிரமங்கள் இருந்ததாக வரத ரெட்டி தெரிவித்தார்.

“கடுமையான வெயில், மழை அளவு மாறுபடுதல் மற்றும் கடுமையான காற்று போன்ற பாதகமான வானிலை காரணமாக நாங்கள் பல பிரச்சினைகளைச் சந்தித்தோம். அவகாடோ பயிரைப் பெறுவது அவ்வளவு எளிதானதாக இல்லை. நாங்கள் மிகவும் கடினமாக உழைத்தோம்” என்று அவர் கூறினார்.

“ஒரு கட்டத்தில், இந்தப் பயிர் நமக்குரியது அல்ல போலிருக்கிறது, அதனால் அனைத்து மரங்களையும் வெட்டிவிட்டு மீண்டும் வாழையைச் சாகுபடி செய்ய வேண்டும் என்று தோன்றியது” என வரத ரெட்டி குறிப்பிட்டார்.

“ஆனால் நாம் இன்னும் இரண்டு ஆண்டுகள் காத்திருக்கலாம் என்று நினைத்தேன். அதன் பிறகு எங்களுக்கு நல்ல பலன்கள் கிடைத்தன” என்று அவர் தெரிவித்தார்.

“நான் சுமார் ஆறு மாதம் முதல் ஒரு வருடம் வரை போராடினேன். ஒருமுறை நான் 300 செடிகளைக் கொண்டுவந்தேன், ஆனால் அவற்றில் 100 செடிகள் வாடிவிட்டன. நான் மீண்டும் அங்கு சென்று செடிகளைக் கொண்டுவந்தேன். இம்முறை 100 செடிகளைக் கொண்டுவந்தேன், ஆனால் 20 செடிகள் வாடிவிட்டன. இருப்பினும், நான் மீண்டும் அங்கு சென்று அவற்றைக் கொண்டுவந்தேன். நான் சாகுபடியைத் தொடங்கி இப்போது நான்கு ஆண்டுகள் ஆகின்றன” என விளக்கினார்.

2025-ல் பூக்கள் பூத்தன. அங்கும் இங்குமாக 150 செடிகளில் பூக்கள் பூத்தன. நான் கவனிக்காமல் இருந்தபோதே அனைத்துப் பூக்களும் உதிர்ந்துவிட்டன. நான் அவற்றுக்குத் தண்ணீர் ஊற்றினேன், பூச்சிக்கொல்லி மருந்துகளைத் தெளித்தேன். ஆனால் எந்தப் பலனும் கிடைக்கவில்லை.

“இது நமது காலநிலைக்குப் பொருந்தாமல் இருக்கலாம் என்று கூறி நான் அதை விட்டுவிட்டேன். மரங்களை வெட்டிவிட்டு வாழை நடுவதைப் பற்றி யோசித்தேன். ஆனால் இன்னும் சில மாதங்கள் காத்திருக்க விரும்பினேன். ஆனால் நான்காவது ஆண்டுக்குப் பிறகு, பூக்கள் வந்தபோது, பிரச்னை தீர்ந்தது போல் தோன்றியது. பயிர் மீது எந்தவிதமான மருந்துத் தெளிப்பும் செய்யப்படவில்லை. நல்ல பலன்கள் கிடைத்தன. எனக்கு நான்கு டன் மகசூல் கிடைத்தது.” என்று அவர் விளக்கினார்.

சந்தை விலையைக் காட்டிலும் மிகக் குறைந்த விலையில் என் தோட்டத்தில் அவகாடோ பழங்களை விற்றதால் பழங்களை நேரடியாக வாங்க பலரும் வந்ததாக அவர் கூறினார். எந்தவிதமான கூலி ஆள் செலவுமின்றி தாமே பழங்களை அறுவடை செய்து, எடைபோட்டு விற்றதாக அவர் தெரிவித்தார்.

“விவசாயிகளுக்கு ஆறுதல் அளிக்கும் விஷயம் என்னவென்றால், பழம் கனிந்த பிறகும் கூட அதனை இரண்டு மாதங்களுக்கு மரத்திலேயே வைத்திருக்க முடியும், அது கெட்டுப்போகாது. நாம் எப்போதும் செய்துவரும் அதே விவசாய முறைகளைக் கொண்டு வாழ்க்கையில் முன்னேற முடியாது. அதனால்தான் புதிதாக ஏதாவது முயற்சிக்க விரும்புகிறோம்” என்று வரத ரெட்டி கூறினார்.

“‘நீ என்ன பைத்தியக்காரத்தனமாக அவகாடோ பயிரிட்டிருக்கிறாய், பலரும் வாழை மரங்களை நட்டு பணம் சம்பாதிக்கிறார்கள், உனக்கு ஏன் இந்த அவகாடோ?’ என்று சிலபேர் கேலி பேசினார்கள். அப்படிப் பேசியவர்களெல்லாம் இன்று பெரிதாகப் பேசுகிறார்கள். என் வெற்றியை அவர்கள் கண்கூடாகப் பார்க்கிறார்கள்” என்று அவர் மகிழ்ச்சியுடன் தெரிவித்தார்.

வரத ரெட்டியின் மனைவி பிரமிளா கூறுகையில், அவகாடோ பயிர் சாகுபடியில் தாங்கள் எந்தவொரு இரசாயனப் பொருட்களையும் பயன்படுத்தவில்லை என்றும், அது இயற்கையான முறையில் வளர்க்கப்பட்டதாகவும் தெரிவித்தார்.

“மழைக்காலத்தில் மரம் நன்றாக வளர்கிறது. நாங்கள் குறைவான பூச்சிக்கொல்லி மருந்துகளைப் பயன்படுத்தினோம். அதிகப்படியான இரசாயனங்களைப் பயன்படுத்தவில்லை. எல்லாவற்றையும் இயற்கையான முறையில் சாகுபடி செய்தோம். முதல் பயிர் மிகச் சிறப்பாக வந்துள்ளது. அடுத்த பயிர் இன்னும் நன்றாக வரும். நாங்கள் சாண உரம் மற்றும் டி.ஏ.பி பயன்படுத்தினோம். அதிகப்படியான பூச்சிக்கொல்லி மருந்துகளை நாங்கள் பயன்படுத்தவில்லை” என்று அவர் கூறினார்.

உள்ளூர் விவசாயி சந்திரசேகர் நாயுடு கூறுகையில், “அவகாடோ பயிரிட வேண்டாம் என்று பல விவசாயிகள் வரத ரெட்டியை மனச்சோர்வடையச் செய்தனர் , ஆனால் அவர் மிகுந்த பொறுமையுடன் வெற்றி பெற்றுள்ளார், இப்போது மற்றவர்களும் ஆர்வம் காட்டி வருகின்றனர்” என்றார்.

“தோட்டக்கலைத் துறை சார்பில் அவகாடோ பயிருக்கு மானியம் வழங்கப்படும். புதிய பயிர்களைச் சாகுபடி செய்ய ஊக்குவிக்கப்படும்” என்று கடப்பா மாவட்ட தோட்டக்கலை உதவி இயக்குநர் ரவிச்சந்திர பாபு பிபிசியிடம் தெரிவித்தார்.

“நாங்கள் அவரை ஊக்கப்படுத்தினோம். கடப்பா மாவட்டத்தில் நான்கு அவகாடோ விவசாயிகள் இருந்தாலும், வெற்றிகரமாக பயிரை சாகுபடி செய்து விளைச்சல் எடுத்தவர் வரத ரெட்டிதான்” என்று அவர் கூறினார்.

அவகாடோ பயிர் மேலாண்மை முறைகள் குறித்து வரத ரெட்டி கூறுகையில், அவகாடோ சாகுபடிக்குச் செடிகள் மிகவும் இளமையாக இருக்கக்கூடாது என்றும், ஓராண்டு வயதுடைய நாற்றுகளையே பயன்படுத்த வேண்டும் என்றும் கூறினார். வேர்கள் நன்றாகப் பிடித்து வளர்ந்தால்தான், செடிகள் மேலெழுவதை எளிதில் தாங்க முடியும்.

“அவர்கள் முதலில் எங்களுக்கு ஆறு மாத வயதுடைய செடிகளைக் கொடுத்தார்கள். அவற்றின் தண்டுப்பகுதி மிகவும் சிறிதாக இருந்தது. அப்போது நான் மிகவும் கவலைப்பட்டேன். சிறிய செடிகள் என்பதால், அவற்றால் காற்றையும் வெப்பத்தையும் தாங்க முடியவில்லை. பிறகுதான் பிரச்னை என்னவென்பதை நான் உணர்ந்தேன். செடிகள் சற்று முதிர்ச்சியாக இருந்தால் நன்றாக இருக்கும் என்று நினைத்து, அவற்றை கவரில் வைத்து வளர்த்து, அதன் பிறகு நட்டேன்.”

பயிருக்குத் தொடர்ச்சியாகத் தண்ணீரும் புதிய மண்ணும் வழங்கப்பட்டால், எந்தப் பிரச்னையும் இல்லாமல் அது உயிர்வாழும். இது ஒரு புதிய பயிர் மற்றும் புதிய மண் என்பதால், நோய் தாக்குதல் அல்லது பூச்சித் தொல்லை போன்ற பிரச்னைகள் இதுவரை காணப்படவில்லை. செடியின் வளர்ச்சி என்பது அதன் வகையைப் பொறுத்தது. எந்த ரகம் நமது மண்ணுக்கு ஏற்றது என்பதை நாம் முதலில் தெரிந்துகொள்ள வேண்டும்” என்று வரத ரெட்டி அறிவுறுத்தினார்.

“இங்குள்ள முக்கியப் பிரச்னை பழ ஈ (fruit fly) ஆகும். பழ ஈ ஆனது ஒரு மாதத்தில் பழ அறுவடையைப் பாதிக்கிறது. இந்தச் பிரச்னை ஒவ்வொரு பயிரிலும் இருப்பதால், முன்னெச்சரிக்கை நடவடிக்கைகளை எடுப்பது நல்லது” என்று அவர் விளக்கினார்.

“இது ஆண்டிற்கு ஒருமுறை மட்டுமே பலன் தரும். நவம்பர் மற்றும் பிப்ரவரி மாதங்களுக்கு இடையில் எப்போது வேண்டுமானாலும் பூக்கள் பூக்கலாம். அதற்கு முன்கூட்டியே தயாராக இருக்க வேண்டும். உரமும் தண்ணீரும் சேர்த்து விவசாயிகள் அதைக் கவனித்துக் கொள்ள வேண்டும்” என்று அவர் கூறினார்.

– இது, பிபிசிக்காக கலெக்டிவ் நியூஸ்ரூம் வெளியீடு