“நாட்டில் நிலவும் தற்போதைய அரசியல் சூழலில், அரசின் கொள்கைகளைக் கேள்வி கேட்பவர்கள் மீது ஒடுக்குமுறைகள் கட்டவிழ்த்துவிடப்படுகின்றன” என்றும் மாணவர் தெரிவித்தனர்.

“அநீதிக்கு எதிராக மாணவர்கள் தங்களது கருத்துகளைத் துணிச்சலுடன் வெளிப்படுத்துவதே தேசத்தின் எதிர்காலத்தைத் தீர்மானிக்கும்” என்று ராகுல் காந்தி தெரிவித்தார்.

நிகழ்ச்சியில் பேசிய அவர், “கல்வி என்பது மாணவர்களுக்கு மன அழுத்தத்தை ஏற்படுத்தும் சுமையாக இருக்கக்கூடாது. மாணவர்களின் தனித்துவமான திறமைகளைக் கண்டறிந்து, அவற்றை வளர்க்கும் கல்விச் சூழலை உருவாக்குவது அவசியம்” என்றார்.

வினாத்தாள் கசிவு குறித்த மாணவர்களின் கேள்விக்குப் பதிலளித்த ராகுல் காந்தி, “வினாத்தாள் கசிவு என்பது வெறும் நிர்வாகத் தோல்வி மட்டுமல்ல. லட்சக்கணக்கான ஏழை மற்றும் நடுத்தர வர்க்க இளைஞர்களின் உழைப்பையும் நம்பிக்கையையும் சூறையாடும் செயல்” என்றார்.

“தேர்வுகளை நடத்தும் அமைப்புகள் மற்றும் அரசு நிறுவனங்களில் நிலவும் முறைகேடுகளும் வெளிப்படைத்தன்மையின்மையும்தான் இதற்கு முக்கியக் காரணங்கள்” என்று குறிப்பிட்ட அவர், “இந்த விவகாரத்தில் கடுமையான, நேர்மையான சீர்திருத்தங்கள் கொண்டுவரப்பட வேண்டும்” என்றும் தெரிவித்தார்.

மேலும், “நாட்டின் பொருளாதார வளர்ச்சி என்பது அனைத்து இளைஞர்களுக்கும் முறையான வேலைவாய்ப்புகளை உருவாக்குவதிலும், உற்பத்தித் துறையில் புதிய வாய்ப்புகளை ஏற்படுத்துவதிலும்தான் உள்ளது” என்றார்.

“கல்வி நிறுவனங்களும் பொது நிறுவனங்களும் வணிக மையங்களாக மாற்றப்படுவதை எதிர்த்து மாணவர்கள் தங்களது குரல்களை ஒன்றிணைத்து ஒலிக்கச் செய்ய வேண்டும்” என்று கூறிய ராகுல் காந்தி, அனைவருக்கும் தரமான கல்வி கிடைப்பதை அரசு உறுதிசெய்ய வேண்டும் என்றும் வலியுறுத்தினார்.

தமிழ்நாட்டின் தனித்துவமான பண்பாடு, மொழி மற்றும் மாநில உரிமைகள் மீது மத்திய அரசு தொடர்ந்து அழுத்தம் கொடுப்பதாகவும், இதனால் மாநில சுயாட்சி பாதிக்கப்படுவதாகவும் மாணவர் ஒருவர் இந்தச் சந்திப்பின்போது தெரிவித்தனர்.

இதற்குப் பதிலளித்த ராகுல் காந்தி, “தமிழ்நாட்டின் மொழி, கலாசாரம், அரசியல் அடையாளம் ஆகியவை இந்தியாவின் அடித்தளமாக உள்ளன. எந்த ஒரு மாநிலத்தின் மீதும் பிற மொழிகளையோ சித்தாந்தங்களையோ திணிப்பது நாட்டின் பன்முகத்தன்மைக்கு எதிரானது. உண்மையான இந்தியா என்பது அனைத்து மாநிலங்களையும் சமமாக மதிக்கும் கூட்டாட்சி அமைப்பாக இருக்க வேண்டும்” என்றார்.

இந்த உரையாடலின்போது பேசிய மாணவி ஒருவர், “ராகுல் காந்தி வடசென்னைக்கு ஒருநாள் வந்து, எங்களுடன் தங்கி, எங்கள் உணவைச் சாப்பிட்டு, எங்களுடைய வாழ்க்கை முறையை நேரில் பார்த்துப் புரிந்துகொள்ள வேண்டும்” என்று அழைப்பு விடுத்தார்.

அதற்குப் பதிலளித்த ராகுல் காந்தி, “எப்போது வர வேண்டும் என்று சொல்லுங்கள்; வருகிறேன்” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு