இத்தகைய தயாரிப்புகளைப் பயன்படுத்தினாலும், அவற்றை ஒரு முழுமையான பாதுகாப்பு நடவடிக்கையாகவோ அல்லது அணுகுமுறையாகவோ நம்பக்கூடாது என்றும் ஆய்வில் எச்சரிக்கப்பட்டுள்ளது.

இது பாம்பு விரட்டி என்ற பெயரில் விற்கப்படும் பொருட்களைப் பற்றி எழக்கூடிய முக்கியமான கேள்வி, இயற்கையான புறச்சூழலில் அவை வேலை செய்யுமா என்பதுதான்.

கடந்த 2008ஆம் ஆண்டு அப்லைட் ஹெர்பெடாலஜி என்ற ஊர்வனவியல் துறை சார்ந்த ஆய்விதழில் வெளியான ஓர் ஆய்வில், நாப்தலீன், கந்தகம் அடங்கிய கலவை பாம்புகளுக்கு எதிராகப் பரிசோதிக்கப்பட்டது.

இயற்கையான வெளிப்புறச் சூழலை ஒத்த அமைப்பில் நடத்தப்பட்ட இந்த ஆய்வில், மிகச் சில பாம்புகளே ரசாயனம் பயன்படுத்தப்பட்ட பகுதியைத் தவிர்த்தன. அதேவேளையில், பல பாம்புகள் அந்தப் பகுதியைக் கடந்து சென்று வழக்கம் போலச் செயல்பட்டன.

இந்த ஆய்வின் இறுதியில், இப்படியான பாம்பு விரட்டி கலவைகள் பாம்புகளை முழுமையாக விரட்டி, நமக்கு ஆபத்துக்கு எதிரான பாதுகாப்பை வழங்குவதில்லை என்ற முடிவுக்கு ஆய்வாளர்கள் வந்தனர்.

இணையத்தில் விற்கப்படும் பல புதிய தயாரிப்புகள் “இயற்கை முறை தயாரிப்பு” என்று விளம்பரம் செய்யப்படுகின்றன. இலவங்கப்பட்டை, புதினா, கிராம்பு, தேவதாரு போன்ற எண்ணெய்கள் இதில் இடம்பெறுகின்றன.

ஆனால் “இயற்கையானது” என்பதும் “பாம்புகளை விரட்டும்” என்பதும் ஒன்றல்ல.

சமீபத்தில், ஃபிரான்டியர்ஸ் இன் பப்ளிக் ஹெல்த் என்ற ஆய்விதழில் வெளியிடப்பட்ட ஓர் ஆய்வு, ஆப்பிரிக்காவில் விற்கப்படும் பாம்பு விரட்டி கலவை தயாரிப்புகளை ஆராய்ந்தது.

அவற்றில் பல தயாரிப்புகளில் அத்தியாவசிய எண்ணெய்கள் உள்ளிட்ட பல்வேறு வேதிப்பொருட்கள் இருப்பதையும், அவற்றின் செயல்திறனுக்கான அறிவியல் ஆதாரங்கள் குறைவாக இருப்பதையும் ஆய்வாளர்கள் சுட்டிக்காட்டினர்.

வெளிப்புறச் சூழலில் நடத்தப்பட்ட சில பரிசோதனைகளில், சோதிக்கப்பட்ட எந்தத் தயாரிப்பும் தண்ணீரைக் காட்டிலும் சிறப்பாகப் பாம்புகளை விரட்டவில்லை என்றும் அந்த ஆய்வு குறிப்பிட்டது.

அமெரிக்காவின் மேரிலாண்ட் பல்கலைக்கழக விரிவாக்க சேவையின் நிபுணர் வழிகாட்டுதலில், பல்வேறு பாம்பு விரட்டிகள் பரிசோதிக்கப்பட்டு இருந்தாலும், “எதுவும் தொடர்ந்து ஒரே மாதிரியான செயல்திறனைக் காட்டவில்லை” என்று குறிப்பிடப்பட்டுள்ளது.

அதை வலியுறுத்திப் பேசிய விஸ்வநாதன், “ஸ்நேக் பிளான்ட், சிறியா நங்கை, பெரியா நங்கை, சர்ப்பகந்தி, சோற்றுக் கற்றாழை போன்ற தாவரங்கள் பாம்பு விரட்டிச் செடிகளாக நம் ஊர்களில் நம்பப்படுகின்றன. ஆனால் அதற்கான எவ்வித அறிவியல்பூர்வ ஆதாரத்தையும் இதுவரை காணவில்லை என்பதுடன் நடைமுறையிலும் இந்தத் தாவரங்களின் மத்தியிலேயே பாம்புகள் நடமாடுவதைப் பார்த்துள்ளோம்,” என்று தெரிவித்தார்.

அவரது கூற்றுப்படி, “எலி, பெருச்சாளி போன்ற அவை விரும்பி வேட்டையாடும் இரை உயிரினங்கள் அதிகம் தென்பட்டால் பாம்பு விரட்டிச் செடிகளோ அல்லது பாம்பு விரட்டி ஸ்பிரே போன்ற வேதிம தயாரிப்புகளோ எதுவாக இருந்தாலும், பாம்புகளின் நடமாட்டத்தைத் தடுக்கப் போவதில்லை.”

அதோடு, “வீடுகளைச் சுற்றி குழந்தைகள் விளையாடுவதும் நடமாடுவதும் தினசரி அதிகமாக இருக்கும். எங்கேனும் கீழே விழும் பந்தை அவர்கள் எடுக்கும்போது அல்லது அவர்களாகவே ஏதேனும் பகுதிகளில் கைகளை வைப்பது போன்ற நடவடிக்கைகளால் இந்த வேதிமங்கள் அவர்களுடைய கைகளில் தங்கலாம்.”

“குழந்தைகள் அனைத்து நேரங்களிலும் கைகளைச் சுத்தமாகக் கழுவிய பிறகே வாயில் வைக்கிறார்கள் என்பதை நம்மால் நூறு சதவிகிதம் உறுதி செய்யவே முடியாது. எனவே, இத்தகைய பொருட்கள் பாம்புகளிடம் இருந்து பாதுகாப்பு வழங்குவதைவிட குழந்தைகளுக்கு அச்சுறுத்தலாகும் வாய்ப்புகளே அதிகம்” என்று எச்சரிக்கிறார் விஸ்வநாதன்.

உலக சுகாதார அமைப்பும் பாம்பு கடியைத் தடுப்பதற்கான நடவடிக்கைகளில், ரசாயன விரட்டிகளை நம்புவதற்குப் பதிலாக சுற்றுப் புறத்தை முறையாகப் பராமரிப்பதன் முக்கியத்துவத்தை வலியுறுத்துகிறது.

அதுகுறித்து விளக்கிய விஸ்வநாதன், “வீட்டைச் சுற்றியுள்ள புல் மற்றும் புதர்களை அதிகமாக வளரவிடாமல் இருப்பது, குப்பைகள் மற்றும் பாம்புகள் மறைந்துகொள்ள ஏதுவான இடங்களை அகற்றுவது, வீடுகளுக்குள் பாம்புகள் நுழையக்கூடிய இடங்களை அடைப்பது போன்ற நடவடிக்கைகள்” ஆகியவற்றைப் பரிந்துரைக்கிறார்.

வீட்டைச் சுற்றி எலிகள் போன்ற பாம்புகளுக்கு மிக விருப்பமான இரை விலங்குகள் அதிகமாகக் காணப்படாமல் பார்த்துக் கொள்வதும் மிக முக்கியம் என்று அவர் தெரிவித்தார்.

வீடுகளைச் சுற்றி இப்படியான ஸ்பிரே தெளிக்கப்படுவதால் பாம்புகள் நிச்சயமாக வராது என்று அறுதியிட்டுக் கூறுவதற்குப் போதுமான ஆதாரங்கள் இதுவரை இல்லை என்பதே நிபுணர்களின் பதிலாக உள்ளது.

எனவே, இணையத்தில் விற்கப்படும் பாம்பு விரட்டி ஸ்பிரேக்களை பாம்புகளுக்கு எதிரான உறுதியான பாதுகாப்பு அரணாகக் கருதுவது தவறான அணுகுமுறை என்பதை ஊர்வனம் அமைப்பின் நிறுவனர் விஸ்வநாதன் வலியுறுத்துகிறார்.

முன்னதாக, பிபிசி தமிழிடம் குடியிருப்புகளில் பாம்புகளால் ஏற்படும் அபாயங்களைத் தவிர்க்க, “அவை நுழையக் கூடிய இடங்களை அடைப்பது, வீட்டைச் சுற்றியுள்ள புதர் மற்றும் குப்பைகளை அகற்றுவது, எலிகள் போன்ற இரை விலங்குகளைக் கட்டுப்படுத்துவது போன்ற நடைமுறை நடவடிக்கைகளே அதிக நம்பகமான தடுப்பு முறைகளாக இருப்பதாக” பாம்பு மீட்பு நிபுணரும் காட்டுயிர் ஆர்வலருமான சாம்சன் கிருபாகரன் விளக்கியிருந்தார்.

நிபுணர்களின் கூற்றுப்படி, ஒரு பொருள் “பாம்புகளை 100% விரட்டும்” என விளம்பரம் செய்யப்படுவதற்கும், அது இயற்கைச் சூழலில் அறிவியல்ரீதியாக நிரூபணமாவதற்கும் இடையே பெரிய வித்தியாசம் உள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு