5

பிரான்ஸ் முழுவதும் உள்ள முன்னணி பல்பொருள் அங்காடிகளின் குளிரூட்டும் அமைப்புகளை இலக்கு வைத்து முன்னெப்போதும் இல்லாத வகையில் பாரிய இணையவழித் தாக்குதல் ஒன்று முன்னெடுக்கப்பட்டுள்ளது.

இந்தத் தாக்குதல் காரணமாக குளிர்சாதனப் பெட்டிகள் மற்றும் Freezerகளின் வெப்பநிலை 50 பாகை செல்சியஸ் (122°F) வரை உயர்ந்ததால், உணவுப் பொருட்கள் பெருமளவில் கெட்டுப்போயுள்ளதுடன், சில பகுதிகளில் தீ விபத்துகளும் ஏற்பட்டுள்ளன.

இணையவழி ஊடுருவல்காரர்கள் தொலைவிலிருந்து குளிர்சாதன அமைப்புகளின் இயங்குநிலையைக் குழப்பி, பனியை வலுக்கட்டாயமாக நீக்கும் நடைமுறையைத் தூண்டியமையே இந்த அசாதாரண வெப்பநிலை உயர்வுக்குக் காரணம் எனத் தெரிவிக்கப்பட்டுள்ளது. இதனால் புதிய மற்றும் உறைந்த உணவுப் பொருட்கள் முற்றாக நாசமாகியுள்ளதுடன், சில கடைகளில் குளிர்சாதனப் பெட்டிகள் உருகி, தீப்பரவலும் பதிவாகியுள்ளது.

நாட்டின் முன்னணி சில்லறை விற்பனை நிறுவனங்களான Intermarché, Coopérative U, E.Leclerc, Carrefour மற்றும் Monoprix உள்ளிட்ட வணிக வலையமைப்புகள் இந்தத் தாக்குதலால் கடுமையாகப் பாதிக்கப்பட்டுள்ளதாக திங்கட்கிழமை உத்தியோகபூர்வமாக உறுதிப்படுத்தியுள்ளன.
குறைந்தது 300 இன்டர்மார்ச் மற்றும் நெட்டோ கடைகளும், 100 இற்கும் மேற்பட்ட கோஆபரேட்டிவ் யூ விற்பனை நிலையங்களும் இலக்கு வைக்கப்பட்டுள்ளன. அத்துடன், கேரஃபோர் நிறுவனத்தின் 80 அங்காடிகளும், மோனோபிரிக்ஸ் நிறுவனத்தின் 5 வீதமான கடைகளும் பாதிக்கப்பட்டுள்ளதாக அறிவிக்கப்பட்டுள்ளது.

நாடு தழுவிய ரீதியில் உணவு சில்லறை விற்பனையாளர்களின் இணையத்துடன் இணைக்கப்பட்ட குளிர்சாதனக் கட்டமைப்புகள் பாரியளவில் பாதிக்கப்பட்டுள்ளதை பாரிஸ் அரச சட்டத்தரணிகள் அலுவலகம் உறுதிப்படுத்தியுள்ளதுடன், இது குறித்த விசாரணைகளும் ஆரம்பிக்கப்பட்டுள்ளன.
இந்த முன்னோடியில்லாத நாசவேலையால் ஒரே நாளில் நாடு முழுவதும் பல கோடி யூரோக்கள் பெறுமதியான இழப்புகள் ஏற்பட்டுள்ளதாக இன்டர்மார்ச் நிறுவனத்தின் தலைமை நிர்வாக அதிகாரி தியரி கோட்டிலார்ட் தெரிவித்துள்ளார்.

சம்பவத்தின் தீவிரத்தைக் கருத்திற்கொண்டு, பிரான்சின் தேசிய இணையப் பாதுகாப்பு முகமைக்கு விசாரணைகளை முன்னெடுக்குமாறு பிரதமர் செபாஸ்டியன் லெகோர்னு உத்தரவிட்டுள்ளார்.

ஏனைய ஐரோப்பிய நாடுகளிலும் இத்தகைய அச்சுறுத்தல்கள் காணப்படலாம் என்பதால் ஐரோப்பிய நாடுகளுடன் ஒருங்கிணைந்து செயற்படுவதுடன், ஏனைய உள்நாட்டு நிறுவனங்களின் பாதுகாப்பு நிலவரங்களையும் அதிகாரிகள் ஆராய்ந்து வருகின்றனர்.