இந்த விவகாரம் தொடர்பாக ஊடகங்களிடம் பேசியிருந்த அகல் விளக்கு மற்றும் ஃபீனிக்ஸ் பதிப்பகங்களின் உரிமையாளர் மோகன், இந்த குற்றச்சாட்டுகளை சட்டரீதியாக எதிர்கொள்ளப்போவதாகத் தெரிவித்திருந்தார். பெரியார் அறிவுலகத்துக்கு ரூ.17 லட்சத்துக்கு மட்டுமே, தான் புத்தகங்களை விற்பனை செய்திருப்பதாகவும், கலைஞர் நூலகம் உள்ளிட்ட பிற நூலகங்களுக்கு 5 லட்ச ரூபாய் என்ற அளவில் புத்தகங்களை விநியோகம் செய்திருப்பதாகவும் தெரிவித்தார். புத்தகங்களை மாற்றித்தருவதாகவும் அவர் அப்போது கூறியிருந்தார்.

தென்னிந்திய புத்தக விற்பனையாளர்கள் மற்றும் பதிப்பாளர்கள் சங்க (The Booksellers and Publishers Association of South India – BAPASI ) நிர்வாகிகள், அமைச்சர் ராஜ்மோகனை சந்தித்து பதிப்பகங்களின் கோரிக்கையை விளக்கினர். அகல் விளக்கு மற்றும் ஃபீனிக்ஸ் பதிப்பகங்கள் குறித்து, சங்கத்திலுள்ள யாருக்குமே தெரியாது என்றும் அவர்கள் தெரிவித்தனர். அதேநாளில், தமிழ்நாட்டைச் சேர்ந்த 160க்கும் மேற்பட்ட எழுத்தாளர்கள் மற்றும் பதிப்பகத்தினர் இணைந்து, முன்னாள் நீதிபதி ஹரிபரந்தாமன் தலைமையில் கூட்டறிக்கை வெளியிட்டனர்.

அதன்பின், இவ்விரு பதிப்பகங்களால் மாநிலம் முழுவதும் நூலகங்களுக்குத் தரப்பட்ட 25 ஆயிரத்துக்கும் அதிகமான புத்தகங்கள் திரும்பப் பெறப்பட்டுள்ளதாக, ஊடகங்கள் சிலவற்றில் தகவல் வெளியானது. லஞ்ச ஒழிப்புத்துறை, பெரியார் அறிவுலகத்திலும், புத்தகங்களை விநியோகித்த அகல் விளக்கு பதிப்பக உரிமையாளரிடமும் விசாரணையை நடத்தியுள்ளது.

இந்நிலையில், பெரியார் அறிவுலகத்திலுள்ள ஆங்கில நூல்கள் பிரிவிலும் போலியான புத்தகங்கள் இடம்பெற்றிருப்பதாக ஆராய்ச்சி மாணவர்கள் பிரேம்குமார் மற்றும் சதீஷ்குமார் ஆகியோர் குற்றம் சாட்டியிருந்தனர். இதுபற்றி பிபிசி தமிழிடம் அவர்கள் இருவரும் விரிவாக விளக்கினர்.

பிபிசியிடம் பேசிய ஆராய்ச்சி மாணவர் பிரேம்குமார், ”பெரியார் அறிவுலகத்தில் தமிழ் நூல்கள் கொள்முதல் முறைகேடு புகார் வந்த பின்பு, நாங்கள் ஆங்கில நூல்கள் பிரிவிலும் ஆய்வு செய்தோம். முக்கியமாக ஐந்தாம் தளத்தில் ஆங்கில நூல்கள் பிரிவில் விண்டேஜ் பதிப்பகத்தின் (Vintage Press Limited) பெயர்களில் 257 புத்தகங்கள் உள்ளன. அவற்றில் சில புத்தகங்களின் முதல் பதிப்பே 2025 மற்றும் 2026 ஆகிய ஆண்டுகளாக இருந்தன. 300 பக்கங்கள் மட்டுமே இருந்த அந்த புத்தகங்கள் ஒவ்வொன்றின் விலையும் சுமார் ரூ.9,000 முதல் ரூ.9,900 வரை என்று இருந்தது. ஆனால் அதற்கேற்ற தரமோ, வடிவமைப்போ அந்த புத்தகங்களில் கொஞ்சமும் இல்லை.” என்றார்.

”எங்களுக்கு அதிர்ச்சியும் சந்தேகமும் ஏற்பட்டது. அதில் இருந்த பதிப்புரிமை மற்றும் பதிப்பு விபரங்களை (Imprint Page) ஆய்வு செய்தபோது, சந்தேகம் வலுத்தது. அந்த புத்தகங்களில் இருந்த சர்வதேச தர புத்தக எண்ணை (ISBN) இந்திய அளவிலான ISBN இணையதளத்தில் தேடியபோது உரிய தகவல்கள் கிடைக்கவில்லை. பின்னர் உலக அளவிலான WorldCat இணையதளத்திலும் தேடியபோது அந்தப் புத்தகங்கள் குறித்த பதிவுகள் எதுவும் கிடைக்கவில்லை. அதன்பின் சில தொழில்நுட்பங்களைக் கொண்டு அவற்றை ஆய்வு செய்தோம்.” என்றார்.

இந்த ஆய்வில் ஈடுபட்ட பிரேம்குமார், தமிழில் பதிப்பகங்கள் தொடர்பாக ஆராய்ச்சிப் படிப்பை (பி.ஹெச்.டி.) மேற்கொண்டு வருகிறார். அவருடன் மற்றொரு ஆராய்ச்சி மாணவரான சதீஷ்குமாரும் இந்த ஆங்கில நூல்களின் நம்பகத்தன்மை குறித்த ஆய்வை இணைந்து மேற்கொண்டுள்ளார். இஸ்க்ரா என்ற பெயரில் இணைய பக்கங்களில் இவர் எழுதி வருகிறார்.

அதுபற்றி விளக்கிய ஆராய்ச்சி மாணவர் சதீஷ்குமார், ”நாங்கள் ‘சுற்றுலா: கொள்கைகள், நடைமுறைகள் மற்றும் தத்துவம்’ (Tourism: Principles, Practice and Philosophy) என்ற தலைப்பிலான புத்தகத்தை ஆய்வுக்காக எடுத்துக்கொண்டோம். அந்தப் புத்தகத்தின் முதல் 15 பக்கங்களை ஸ்கேன் செய்து, ஆய்வுத் திருட்டைக் கண்டறியும் Turnitin மென்பொருள் மூலம் பரிசோதித்தோம். அதில் 64 சதவிகிதம் அளவுக்கு ஆய்வுத் திருட்டு இருப்பதாக முடிவு கிடைத்தது. தொடர்ந்து ஏஐ மூலம் உருவாக்கப்பட்ட உள்ளடக்கத்தைக் கண்டறியும் சோதனையை மேற்கொண்டபோது, 70.7 சதவிகிதம் ஏஐ மூலம் உருவாக்கப்பட்ட உள்ளடக்கம் என்பதும் தெரியவந்தது. யாருடைய ஆய்வில் இருந்து எடுத்தனர் என்பதையும் கண்டறிந்தோம்.” என்றார்.

இவர்கள் இருவரும் இணைந்து விண்டேஜ் பதிப்பகத்தின் பெயரில் குறிப்பிடப்பட்டிருந்த இணையதளத்தை ஆய்வு செய்துள்ளனர். அந்த இணையதளம் ஏற்கெனவே ஒரு ஜவுளி நிறுவனத்துடன் தொடர்புடைய இணைய களத்தை (domain) பயன்படுத்தி உருவாக்கப்பட்டிருப்பது போன்று இருப்பதையும் அதில் அவர்கள் கண்டறிந்துள்ளனர். ஏனெனில் அதில் டி ஷர்ட் விற்பது போன்ற பல்வேறு விபரங்களும் இப்போதும் இடம்பெற்றுள்ளன. அத்துடன் பதிப்பகம் வெளியிட்டுள்ள புத்தகங்களை எழுதியதாகக் குறிப்பிடப்படும் ஆசிரியர்களின் விவரங்கள், அவர்களின் முகவரிகள், பதிப்பகத்தின் வங்கிக்கணக்கு விவரங்கள் உள்ளிட்ட எந்த விதமான அடிப்படைத் தகவல்களும் அந்த இணையதளத்தில் இல்லை என்பதைக் கண்டறிந்துள்ளனர். அதை பிபிசியிடம் பகிர்ந்தனர்.

ஆராய்ச்சி மாணவர்கள் சுயாதீனமாக மேற்கொண்ட ஆய்வில், விண்டேஜ் பதிப்பகத்தின் முகவரி, 70/75, ஷெல்டன் வீதி, கான்வென்ட் கார்டன், லண்டன் என்று குறிப்பிடப்பட்டுள்ளது. இந்த முகவரியையும் இணைய வாயிலாக ஆய்வு செய்தபோது, அந்த முகவரியில் Vintage Press Limited என்ற பதிப்பகம் செயல்படுவதற்கான எந்தவொரு தகவலும் கிடைக்கவில்லை என்று பிரேம்குமார் மற்றும் சதீஷ்குமார் தெரிவித்தனர். அந்த இடம் காலியாக இருப்பது தெரியவந்ததாகவும் கூறினர். அவற்றில் சில புத்தகங்களில் எழுத்தாளர் பெயர்களுடன் புகைப்படங்களும் இடம் பெற்றுள்ளன. அந்த புகைப்படங்களும் கூகுளில் இருந்து எடுக்கப்பட்ட வெளிநாட்டினரின் படங்கள் என்று தெரிகிறது என்ற தகவலையும் அவர்கள் பகிர்ந்தனர். ஆனால் இந்த தகவல்களை பிபிசி தமிழால் சுயாதீனமாக ஆய்வு செய்ய இயலவில்லை.

இந்நிலையில், விண்டேஜ் பதிப்பகத்தின் 257 புத்தகங்களும் நூலகத்திலிருந்து இன்று (நவ. 13) அகற்றப்பட்டன.

பிபிசியிடம் பேசிய பிரேம்குமார், ”அகல் விளக்கு, ஃபீனிக்ஸ் பதிப்பகங்களால் பொய்யான எழுத்தாளர்கள் பெயர்களில் ஏஐ உதவியுடன் போலியான நூல்கள் தயாரிக்கப்பட்டது போன்று இந்த புத்தகங்களும் தயார் செய்யப்பட்டிருக்கலாம் என்பதே எங்கள் சந்தேகம். நூலகங்களுக்கு ஆங்கிலப் புத்தகங்களைத் தேடி வருவோர், இலக்கியம், ஆராய்ச்சி, போட்டித்தேர்வு தொடர்பான புத்தகங்களை மட்டுமே தேடுவர். இவை சுற்றுலா, தத்துவம் என்றிருப்பதால் யாரும் எடுத்துப் படிக்க மாட்டார்கள் என்ற எண்ணத்தில் இந்த முறைகேட்டைச் செய்திருக்கலாம்.” என்றார்.

‘இந்த 257 புத்தகங்களின் உண்மைத்தன்மை மற்றும் அவை கொள்முதல் செய்யப்பட்ட விதம் குறித்து உரிய விசாரணை நடத்தப்பட வேண்டும்.” என்றார் சதீஷ்குமார்.

பெரியார் அறிவுலகத்துக்கு ரூ.17 லட்சம் மதிப்புக்கு புத்தகங்களை விநியோகித்திருப்பதாக அகல் விளக்கு மற்றும் ஃபீனிக்ஸ் பதிப்பகத்தின் உரிமையாளர் மோகன், ஊடகங்களில் தெரிவித்திருந்தார். தற்போது 257 விண்டேஜ் புத்தகங்களின் விலையைக் கணக்கிட்டால் ரூ.25 லட்சம் தொகை வருவதாகக் கூறிய இவர்கள் இருவரும் இவற்றை 30 சதவிகித தள்ளுபடி விலையில் அரசு கொள்முதல் செய்திருந்தாலும் அகல் விளக்கு, பீனிக்ஸ் புத்தக மதிப்புக்கு கொள்முதல் செய்யப்பட்டிருக்கலாம் என்றனர்.

தமிழ்நாட்டிலுள்ள நூலகங்களுக்கு புத்தகங்களைப் பரிந்துரைக்க 137 வல்லுநர்கள் அடங்கிய 30 குழுக்கள் அமைக்கப்பட்டிருந்தன. வல்லுநர் குழு பரிந்துரைத்து அனுப்பிய அதை தேர்வுக்குழு உறுதி செய்து, கொள்முதல் குழுவுக்கு அனுப்பியுள்ளது. அந்த குழு தரும் பட்டியலை உயர்மட்டக்குழு இறுதி செய்த பின்பே, புத்தகங்களுக்கு கொள்முதல் ஆணை வழங்கப்பட்டுள்ளதாக தமிழக அரசின் தரப்பில் விளக்கப்பட்டுள்ளது.

இதுபற்றி விளக்கிய சதீஷ்குமார், ”ஆங்கில நூல்களைப் பொருத்தவரை, வல்லுநர்கள் குழுக்களிடம் பட்டியல் பெறப்பட்டிருக்கும். அந்த வழிகாட்டுதல் பட்டியல், புகழ் பெற்ற பல்கலைக்கழகங்கள் மற்றும் கல்வி நிலையங்களிலிருந்தும், பிற நூலகங்களிலிருந்தும் பெறப்பட்டிருக்கலாம். அவற்றில் இந்த போலி புத்தகங்கள் இருந்திருந்தால் அவை இங்கே வந்திருக்க வாய்ப்புள்ளது. ஆனால் தமிழ்நாட்டில் ஆங்கில நூல்களைப் பரிந்துரைக்க சிறப்புக்குழு இல்லாதது ஒரு குறைபாடுதான்.” என்றார்.

”மொத்தம் 10 ஆயிரம் புத்தகங்களின் தலைப்புகளைக் கொடுத்து, அவற்றிலிருந்து 2 ஆயிரம் புத்தகங்களைத் தேர்வு செய்வது சாத்தியமற்றது. இந்த போலி ஆங்கிலப் புத்தகங்களில் சுற்றுலா சார்ந்து நிறைய புத்தகங்கள் உள்ளன. வல்லுநர் குழுக்களில் சுற்றுலாத்துறை சார்ந்து யாராவது வல்லுநர்கள் இருந்தார்களா, அவர்கள் இந்த புத்தகங்களைப் பரிந்துரை செய்தார்களா என்பதை விசாரிக்க வேண்டும்.” என்றார் சதீஷ்குமார்.

கோவை பெரியார் அறிவுலகத்தில் மட்டுமின்றி, தமிழ்நாட்டிலுள்ள அனைத்து சிறப்பு நூலகங்கள் மற்றும் பொது நூலகங்களில் உள்ள புத்தகங்களின் உண்மைத்தன்மையை ஆய்வு செய்வதற்கு உள் தணிக்கை மேற்கொள்ள உத்தரவிட்டிருப்பதாக அமைச்சர் ராஜ்மோகன் தெரிவித்துள்ளார். கன்னிமாரா நூலகத்திலிருந்து 523 புத்தகங்கள் உட்பட சென்னை, கோவை, தென்காசி, நாமக்கல் உள்ளிட்ட பல மாவட்டங்களிலிருந்து ரூ.91 லட்சம் மதிப்புள்ள 26 ஆயிரத்துக்கும் அதிகமான புத்தகங்கள் அகற்றப்பட்டிருப்பதாக தமிழக அரசால் தகவல் பகிரப்பட்டுள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு