12

கொழும்பு மெகசின் சிறைச்சாலையில் விளக்கமறியலில் வைக்கப்பட்டுள்ள இலங்கையின் முன்னாள் முதல் பெண்மணி ஷிரந்தி ராஜபக்‌ஷவை, ஜனசெத பெரமுன கட்சியின் தலைவர் பத்தரமுல்ல சீலரத்ன தேரர் இன்று (10) நேரில் சென்று பார்வையிட்டுள்ளார்.

முன்னாள் ஜனாதிபதி மகிந்த ராஜபக்‌ஷவின் மனைவியான ஷிரந்தி ராஜபக்‌ஷ, அரச வங்கியிடமிருந்து பெறப்பட்ட 10 மில்லியன் ரூபாய் நிதியைத் தவறாகப் பயன்படுத்தியதாகக் கூறப்படும் குற்றச்சாட்டில் இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவினரால் கடந்த ஒக்டோபர் 7ஆம் திகதி கைது செய்யப்பட்டார்.

குறித்த நிதி, சிறுவர் மருத்துவமனையான லேடி ரிட்ஜ்வே மருத்துவமனைக்கு சி.ரி. ஸ்கேன் இயந்திரமொன்றை வழங்குவதற்காக, அவர் தலைமையிலான ‘சிரிலிய சவிய’ அமைப்பின் ஊடாகப் பெறப்பட்டதாக விசாரணைகளில் தெரிவிக்கப்பட்டுள்ளது. எனினும், அந்த நோக்கத்திற்காக நிதி பயன்படுத்தப்படாமல் தனிப்பட்ட தேவைகளுக்காக முறைகேடாகப் பயன்படுத்தப்பட்டதாக அதிகாரிகள் குற்றஞ்சாட்டியுள்ளனர்.

இந்தக் குற்றச்சாட்டின் அடிப்படையில் கொழும்பு நீதிமன்றத்தில் முன்னிலைப்படுத்தப்பட்ட ஷிரந்தி ராஜபக்‌ஷவை, எதிர்வரும் ஒக்டோபர் 13ஆம் திகதி வரை விளக்கமறியலில் வைக்க நீதிமன்றம் உத்தரவிட்டது. இவ்வழக்குடன் தொடர்புடையதாகக் கைது செய்யப்பட்ட முன்னாள் தேசிய சேமிப்பு வங்கித் தலைவர் பிரதீப் கரியவசம் பிணையில் விடுவிக்கப்பட்டுள்ளார்.

இதற்கிடையில், விளக்கமறியலில் வைக்கப்பட்டிருந்த ஷிரந்தி ராஜபக்‌ஷவின் உடல்நிலை தொடர்பிலும் தகவல்கள் வெளியாகியுள்ளன. கண் பாதிப்பு தொடர்பான மேலதிக மருத்துவப் பரிசோதனைக்காக அவர் கடந்த 9ஆம் திகதி கொழும்பு தேசிய கண் வைத்தியசாலைக்கு அழைத்துச் செல்லப்பட்டார். அங்கு விசேட மருத்துவப் பரிசோதனைக்கு உட்படுத்தப்பட்ட பின்னர் மீண்டும் சிறைச்சாலைக்குக் கொண்டுவரப்பட்டார். சிறைச்சாலை அதிகாரிகளின் தகவல்களின்படி, அவர் ஆரம்பத்தில் பெண்கள் பிரிவிலுள்ள மருத்துவப் பராமரிப்புக்கான பகுதியில் தங்கவைக்கப்பட்டிருந்த நிலையில், பின்னர் பொதுப் பெண் கைதிகள் தங்கும் பகுதிக்கு மாற்றப்பட்டுள்ளார்.

இந்நிலையில், இன்று பத்தரமுல்ல சீலரத்ன தேரர் அவரைச் சிறைச்சாலைக்குச் சென்று சந்தித்துள்ளமை குறிப்பிடத்தக்கது. எனினும், இந்தச் சந்திப்பின்போது இருவருக்கும் இடையில் இடம்பெற்ற உரையாடல்கள், சந்திப்பின் நோக்கம் அல்லது ஷிரந்தி ராஜபக்‌ஷவின் தற்போதைய நிலை குறித்து தேரர் வெளியிட்ட கருத்துகள் தொடர்பில் உறுதிப்படுத்தப்பட்ட மேலதிக தகவல்கள் கிடைக்கவில்லை.

முன்னாள் முதல் பெண்மணிக்கு எதிரான விசாரணைகள் தொடர்ந்து நடைபெற்று வரும் நிலையில், இந்த வழக்கில் முன்வைக்கப்பட்டுள்ள குற்றச்சாட்டுகள் நீதிமன்ற விசாரணைகளின் ஊடாகத் தீர்மானிக்கப்பட வேண்டியவையாகும்.