அசாமை சேர்ந்த ஹிமாஸ்ரீ போரா, நடன நிகழ்ச்சிகளில் பங்கேற்பதற்காக ஒரு குழுவினருடன் விசாகப்பட்டினம் வந்திருந்தார்.

மற்ற குழுவினர் அங்கேயே தங்கியிருந்த நிலையில், தேர்வு எழுத வேண்டியிருந்ததால் அவர் மட்டும் தனது சொந்த ஊருக்குத் திரும்ப முடிவு செய்தார்.

அக்டோபர் 5-ஆம் தேதி குவாஹாட்டிக்குச் செல்வதற்காக ரயிலில் முன்பதிவு செய்ய முயன்றும் அவருக்கு இடம் கிடைக்கவில்லை என்று ஸ்ரீகாகுளம் மாவட்டக் காவல் கண்காணிப்பாளர் கே.வி. மகேஸ்வர ரெட்டி தெரிவித்தார்.

இதனால், பொது வகுப்புக்கான பயணச்சீட்டை வாங்கி, கன்னியாகுமரிக்கும் திப்ருகருக்கும் இடையே இயக்கப்படும் விவேக் எக்ஸ்பிரஸ் ரயிலில் அவர் ஏறியதாக அவர் பிபிசியிடம் தெரிவித்தார்.

ரயிலில் ஏற்கெனவே கூட்டம் அதிகமாக இருந்ததால் ஹிமாஸ்ரீக்கு இருக்கை கிடைக்கவில்லை என்றும், இதனால் அவர் பயணித்த பெட்டியின் கதவு அருகே நின்றிருந்ததாகவும் காவல் கண்காணிப்பாளர் விளக்கினார். அந்தப் பெட்டியில் கடும் நெரிசல் நிலவியதாக அவர் கூறினார்.

ஹிமாஸ்ரீ, ரயிலின் எஸ்-2 பெட்டியில் பயணம் செய்துகொண்டிருந்தார். நள்ளிரவு நேரத்தில் அவர் தனது குடும்பத்தினருடன் தொலைபேசியில் பேசினார். அப்போது, அந்தப் பெட்டியில் சில ஆண்கள் மது அருந்திக் கொண்டிருப்பதாகவும், இதனால் தனக்கு அச்சமாக இருப்பதாகவும் அவர் தெரிவித்ததாகக் குடும்பத்தினர் கூறினர்.

அதிகாலை 2.30 மணிக்குப் பிறகு அவரைத் தொடர்புகொள்ள முயன்றும் பதில் கிடைக்கவில்லை என்று குடும்பத்தினர் தெரிவித்தனர்.

இதனால் கவலையடைந்த அவர்கள், ரயில்வே உதவி எண் 139 மற்றும் குவாஹாட்டி ரயில்வே காவல்துறையிடம் தகவல் தெரிவித்ததாகக் கூறினர்.

ஹிமாஸ்ரீ பயணம் செய்த பெட்டியின் நிலைமையைக் காட்டும் காணொளி ஒன்றையும் அவர் தனது நண்பருக்கு அனுப்பியிருந்ததாக ஸ்ரீகாகுளம் மாவட்டக் காவல் கண்காணிப்பாளர் தெரிவித்தார். அந்தக் காணொளியில் மது அருந்திக் கொண்டிருப்பவர்களை அடையாளம் காணும் முயற்சிகள் நடைபெற்று வருவதாகவும் அவர் கூறினார்.

எனினும், அந்தக் காணொளியில் சந்தேகத்துக்குரிய வகையில் எதுவும் தென்படவில்லை என்றும், அதில் காணப்படும் நபர்கள் யார் என்பதைக் கண்டறியத் தொடர்ந்து முயற்சி செய்து வருவதாகவும் காவல்துறையினர் தெரிவித்தனர்.

ஆனால், உதவி எண்ணுக்கு அழைப்பு வந்தபோது, ஹிமாஸ்ரீ எந்தப் பெட்டியில் பயணம் செய்துகொண்டிருந்தார் என்ற விவரம் தெளிவாகத் தெரிவிக்கப்படவில்லை என்று ஸ்ரீகாகுளம் காவல் கண்காணிப்பாளர் கூறினார்.

“விஜயநகரம் ரயில் நிலையத்தைக் கடந்த பிறகு எங்களுக்கு அழைப்பு வந்தது. அடுத்த ரயில் நிலையம் அமதாலவலசா என்பதால், அங்கிருந்த ரயில்வே பாதுகாப்புப் பணியாளர்கள் ஹிமாஸ்ரீயைத் தேடினர். ஆனால், அவரைக் கண்டுபிடிக்க முடியவில்லை,” என்று காவல் கண்காணிப்பாளர் மகேஸ்வர ரெட்டி பிபிசியிடம் தெரிவித்தார்.

அக்டோபர் 7-ஆம் தேதி, ஆந்திரப் பிரதேசத்தின் ஸ்ரீகாகுளம் மாவட்டத்தில் அமதாலவலசா–போண்டூர் ரயில் வழித்தடத்தில், போடேபள்ளி பேட்டா அருகே தண்டவாளத்தை ஒட்டி ஹிமாஸ்ரீயின் உடலை ரயில்வே காவல்துறையினர் கண்டெடுத்தனர்.

அவர் பயணம் செய்த ரயில் பெட்டியில் அவருக்குச் சொந்தமான இரண்டு பைகளும் கண்டெடுக்கப்பட்டன.

சடலத்துடன் கிடைத்த ஆதார் அட்டையில் இருந்த விவரங்களின் அடிப்படையில் அவரது குடும்பத்தினருக்குத் தகவல் தெரிவிக்கப்பட்டது. பின்னர், உடல் ஸ்ரீகாகுளம் அரசு மருத்துவமனைக்குக் கொண்டு செல்லப்பட்டது. அங்கு வந்த குடும்பத்தினர் ஹிமாஸ்ரீ உடலை அடையாளம் கண்டனர்.

இதையடுத்து, அவர்கள் ஸ்ரீகாகுளம் மாவட்டக் காவல் கண்காணிப்பாளர் கே.வி. மகேஸ்வர ரெட்டியைச் சந்தித்து, தங்களுக்கு எழுந்த சந்தேகங்களைத் தெரிவித்தனர்.

ரயிலில் அச்சமாக இருப்பதாகத் தெரிவித்த தங்கள் மகளுக்கு என்ன நடந்தது என்பதைக் கண்டறிய விரிவான விசாரணை நடத்த வேண்டும் என்று அவர்கள் கோரிக்கை விடுத்தனர்.

ஹிமாஸ்ரீயின் மரணத்துக்கான காரணத்தைக் கண்டறியப் பல்வேறு கோணங்களில் காவல்துறையினர் விசாரணை நடத்தி வருகின்றனர்.

அவர் ரயிலில் இருந்து தற்செயலாகத் தவறி விழுந்தாரா? யாராவது வேண்டுமென்றே அவரைத் தள்ளிவிட்டார்களா? ரயிலில் அவர் ஏதேனும் துன்புறுத்தலுக்கு ஆளானாரா? என்பது குறித்து விசாரணை நடைபெற்று வருகிறது.

பிரேதப் பரிசோதனை அறிக்கையில், ஹிமாஸ்ரீ உடல் ரீதியாகத் தாக்கப்பட்டதற்கான எந்த ஆதாரமும் இல்லை என்று ஸ்ரீகாகுளம் மாவட்டக் காவல் கண்காணிப்பாளர் கே.வி. மகேஸ்வர ரெட்டி தெரிவித்தார்.

இருப்பினும், அவர் தற்செயலாக ரயிலில் இருந்து தவறி விழுந்தாரா அல்லது வேறு ஏதேனும் காரணம் உள்ளதா என்பது குறித்து விசாரணை தொடர்ந்து நடைபெற்று வருவதாக அவர் கூறினார்.

அந்த ரயிலில் பயணம் செய்த சில பயணிகளிடம் காவல்துறையினர் விசாரணை நடத்தியுள்ளனர். இதுவரை விசாரிக்கப்பட்ட பயணிகள் எவரும் ரயிலில் அசம்பாவிதம் ஏதும் நடந்ததாகத் தெரிவிக்கவில்லை என்று காவல் கண்காணிப்பாளர் விளக்கினார்.

முன்பதிவு இல்லாமல் பயணம் செய்தவர்களை அடையாளம் காண்பது கடினமாக இருப்பதாகவும், அவர்களைக் கண்டறியும் முயற்சிகள் தொடர்ந்து நடைபெற்று வருவதாகவும் அவர் கூறினார்.

இந்தச் சம்பவம் குறித்து விசாரணை நடத்த அசாம் அரசு சிறப்பு விசாரணை அதிகாரி ஒருவரை நியமித்துள்ளது.

அசாம் காவல்துறையின் ஐஜி ஜி.வி. சிவபிரசாத் ஸ்ரீகாகுளம் சென்று, உள்ளூர் காவல்துறையினர் மற்றும் ரயில்வே காவல்துறையினருடன் பேசி, சம்பவம் தொடர்பான விவரங்களைச் சேகரித்தார்.

“பல்வேறு கோணங்களில் விசாரணை நடைபெற்று வருகிறது. அந்தப் பெட்டியில் பயணம் செய்த அனைத்து பயணிகளையும் தொடர்புகொண்டுள்ளோம். இதுவரை சந்தேகத்துக்குரிய எதுவும் தெரியவரவில்லை. பெட்டியில் அதிகமான ஆண்கள் இருந்ததால் அவர் அச்சமடைந்திருக்கலாம். இது விபத்தா அல்லது யாராவது திட்டமிட்டு செய்த செயலா என்பது விசாரணையின் முடிவில் தெரியவரும்,” என்று ஜி.வி. சிவபிரசாத் தெரிவித்தார்.

ஹிமாஸ்ரீயின் கைப்பேசியில் இருந்த காணொளியையும் தாம் ஆய்வு செய்ததாக அவர் கூறினார்.

அந்தக் காணொளியில் இடம்பெற்றுள்ள விவரங்கள் தொடர்பான விசாரணை முடிவடையும் வரை, ஹிமாஸ்ரீயின் மரணத்துக்கான காரணம் குறித்து இறுதி முடிவுக்கு வர முடியாது என்று தெரிவித்தார்.

ஹிமாஸ்ரீயின் மரணத்துக்கு முன்பு, நடனக் குழுவில் ஊதியம் வழங்குவது தொடர்பாகப் பிரச்னை ஏற்பட்டதாக அசாமின் திமோரியா சட்டமன்றத் தொகுதி உறுப்பினர் தபன் தாஸ் தெரிவித்துள்ளார்.

விசாகப்பட்டினத்தில் நிகழ்ச்சி ஏற்பாட்டாளர்களிடம் தங்களுக்குச் சேர வேண்டிய ஊதியத்தைக் கேட்டதால், அந்தக் குழுவைச் சேர்ந்த இரண்டு இளைஞர்கள் தாக்கப்பட்டதாக தி இந்தியன் எக்ஸ்பிரஸ் செய்தி வெளியிட்டுள்ளது.

இந்தச் சம்பவத்துக்குப் பிறகு, நடனக் குழுவினர் தங்கியிருந்த விடுதியிலிருந்து வெளியேறி ரயில் நிலையத்துக்குச் சென்றதாக தபன் தாஸ் கூறினார்.

தாக்கப்பட்ட இளைஞர்களில் ஒருவர், ஹிமாஸ்ரீ விவேக் எக்ஸ்பிரஸ் ரயிலில் ஏற உதவியதாகவும், இந்தச் சம்பவம் ரயில் நிலையத்தின் கண்காணிப்பு கேமரா காட்சிகளில் பதிவாகியுள்ளதாகவும் அவர் தெரிவித்தார்.

இருப்பினும், ஊதியம் தொடர்பான பிரச்னைக்கும் ஹிமாஸ்ரீயின் மரணத்துக்கும் ஏதேனும் தொடர்பு உள்ளதா என்பது இன்னும் தெளிவாகவில்லை.

இந்தக் குற்றச்சாட்டுகள் குறித்து நிகழ்ச்சி ஏற்பாட்டாளர்களின் பதில் என்ன என்பதும், காவல்துறை விசாரணையில் தெரியவந்துள்ள விவரங்களும் இன்னும் வெளியாகவில்லை.

ஹிமாஸ்ரீ போரா, அசாமின் திமோரியா சட்டமன்றத் தொகுதியைச் சேர்ந்தவர்.

இந்த வழக்கில் விசாரணை நடத்த ஸ்ரீகாகுளம் மாவட்டக் காவல்துறை சிறப்பு விசாரணைக் குழுவை அமைத்துள்ளது.

ரயில்வே பாதுகாப்புப் படையைச் சேர்ந்த நான்கு பேரும் விசாரணையில் பங்கேற்று வருகின்றனர்.

சம்பவம் நடந்த இடத்தில் பிராந்திய தடய அறிவியல் ஆய்வக நிபுணர்கள், தடயங்களைச் சேகரிக்கும் குழுவினர், மோப்ப நாய்ப் படையினர் மற்றும் ஆளில்லா விமானக் குழுவினர் ஆய்வு மேற்கொண்டனர்.

விசாகப்பட்டினம் ரயில் நிலையத்தின் கண்காணிப்பு கேமரா காட்சிகள், ஹிமாஸ்ரீயின் தொலைபேசி அழைப்பு விவரங்கள், பயண விவரங்கள் மற்றும் அவர் தனது நண்பருக்கு அனுப்பிய காணொளி ஆகியவற்றைக் காவல்துறையினர் ஆய்வு செய்து வருகின்றனர்.

ரயிலில் சிலர் மது அருந்திக் கொண்டிருந்ததாக ஹிமாஸ்ரீ தெரிவித்திருந்த நிலையில், அவர்களை அடையாளம் கண்டு விசாரிக்கும் முயற்சிகளும் நடைபெற்று வருகின்றன.

ஹிமாஸ்ரீயின் குடும்பத்தினர் அளித்த புகாரும் விசாரணையின் ஒரு பகுதியாக எடுத்துக்கொள்ளப்பட்டுள்ளது. ஆந்திரப் பிரதேசம் மற்றும் அசாம் மாநிலக் காவல்துறையினர் ஒருங்கிணைந்து விசாரணை நடத்தி வருகின்றனர்.

ஹிமாஸ்ரீயின் மரணம் விபத்தா அல்லது இதற்குப் பின்னால் யாருக்கேனும் தொடர்பு உள்ளதா என்ற கேள்விகளுக்கு இன்னும் தெளிவான பதில் கிடைக்காததால் விசாரணை தொடர்ந்து நடைபெற்று வருவதாக அசாம் காவல்துறை ஐஜி சிவபிரசாத் தெரிவித்தார்.

ஹிமாஸ்ரீ போராவின் மரணம் தொடர்பாக விரிவான, பாரபட்சமற்ற மற்றும் குறிப்பிட்ட காலக்கெடுவுக்குள் முடிக்கப்படும் வகையில் விசாரணை நடத்த வேண்டும் என்று கோரி, அசாம் முதலமைச்சர் ஹிமந்தா பிஸ்வ சர்மா அக்டோபர் 9-ஆம் தேதி ஆந்திரப் பிரதேச முதலமைச்சர் சந்திரபாபு நாயுடு மற்றும் மத்திய ரயில்வே அமைச்சர் அஸ்வினி வைஷ்ணவ் ஆகியோருக்குத் தனித்தனியாகக் கடிதங்கள் எழுதினார்.

ஹிமாஸ்ரீ ரயிலில் பயணம் செய்த சூழல், அவர் காணாமல் போனது மற்றும் பின்னர் அவரது சடலம் கண்டெடுக்கப்பட்டது ஆகியவை தொடர்பான அனைத்து அம்சங்களையும் முழுமையாக விசாரிக்க வேண்டும் என்றும் அவர் கோரிக்கை விடுத்தார்.

– இது, பிபிசிக்காக கலெக்டிவ் நியூஸ்ரூம் வெளியீடு