കൊൽക്കത്ത: സാൾട്ട് ലേക്ക് സ്റ്റേഡിയത്തിൽ നടക്കുന്ന സ്വപ്നസമാനമായ അന്താരാഷ്ട്ര ഫുട്ബോൾ സൗഹൃദ മത്സരത്തിന്റെ ആദ്യ പകുതി പിരിയുമ്പോൾ ഇന്ത്യയ്‌ക്കെതിരെ ബ്രസീൽ 2-0 ന് മുന്നിൽ. കളി തുടങ്ങി ആദ്യ മിനിറ്റുകളിൽ ശക്തമായ പ്രതിരോധം തീർക്കാൻ ഖാലിദ് ജമീലിന്റെ ഇന്ത്യൻ നിരയ്ക്കായെങ്കിലും, അഞ്ച് തവണ ലോക ചാമ്പ്യന്മാരായ ബ്രസീലിന്റെ ആക്രമണ വീര്യത്തിന് മുന്നിൽ രണ്ടd ​ഗോൾ വഴങ്ങേണ്ടി വന്നു.

ആദ്യ പകുതിയിലെ പോരാട്ട നിമിഷങ്ങൾ:

ശക്തമായ തുടക്കം: മത്സരത്തിന്റെ ആദ്യ 27 മിനിറ്റുകളിൽ തികഞ്ഞ അച്ചടക്കത്തോടെയാണ് ഇന്ത്യ പ്രതിരോധം കാത്തത്. വമ്പൻമാരായ ബ്രസീലിനെ ബോക്സിലേക്ക് അടുപ്പിക്കാതെ പ്രതിരോധ നിര പൊരുതിനിന്നു.

28-ാം മിനിറ്റ് (0-1): ബോക്സിന്റെ അതിർത്തിയിൽ നിന്ന് എസ്റ്റെവോ (Estêvão) തൊടുത്ത തകർപ്പൻ സ്ട്രൈക്കിലൂടെ ബ്രസീൽ മത്സരത്തിലെ ആദ്യ ഗോൾ സ്വന്തമാക്കി.

36-ാം മിനിറ്റ്: മാത്യൂസിഞ്ഞോ നൽകിയ മനോഹരമായ ക്രോസിൽ നിന്ന് പെഡ്രോ ഉതിർത്ത അപകടകാരിയായ ഹെഡ്ഡർ ഇന്ത്യൻ പോസ്റ്റിൽ തട്ടി തെറിച്ചു.

42-ാം മിനിറ്റ് (0-2): ആദ്യ ഗോളിന് വഴിമരുന്നിട്ട എസ്റ്റെവോയുടെ കൃത്യതയാർന്ന പാസിൽ നിന്ന് ഇന്ത്യൻ പ്രതിരോധ താരം അൻവർ അലിയെ മറികടന്ന് പെഡ്രോ പന്ത് വലയിലെത്തിച്ചു.

45+3-ാം മിനിറ്റ്: ബ്രസീലിയൻ സൂപ്പർ താരം വിനീഷ്യസ് ജൂനിയറിന്റെ അപകടകരമായ മുന്നേറ്റം അഭിഷേക് ക്ലിയർ ചെയ്തു. മറുഭാഗത്ത് വില്യംസ് നൽകിയ ചില മികച്ച ക്രോസുകളിലൂടെ ഇന്ത്യയും തിരിച്ചടിക്കാൻ ശ്രമിച്ചതോടെ ആദ്യ പകുതിക്ക് വിസിൽ വീണു.

പന്തിന്റെ 64 ശതമാനം കൺട്രോളും കൈവശം വച്ച് ബ്രസീൽ കളത്തിൽ ആധിപത്യം പുലർത്തിയെങ്കിലും, ആദ്യ മിനിറ്റുകളിൽ ഇന്ത്യ കാഴ്ചവെച്ച വീറുറ്റ പ്രതിരോധം ആരാധകരുടെ കയ്യടി നേടി.