2026-ലെ ഏഷ്യൻ ഗെയിംസ് സെമിഫൈനലിൽ ഇന്ത്യയ്‌ക്കെതിരായ മത്സരത്തിൽ അതുല്യമായ റെക്കോർഡുമായി ശ്രീലങ്കയുടെ സ്പിന്നർ തരിന്ദു രത്നായകെ. അന്താരാഷ്ട്ര ടി20 മത്സരത്തിൽ ഇരുകൈകളും ഉപയോഗിച്ച് വിക്കറ്റ് വീഴ്ത്തുന്ന ആദ്യ ബൗളറെന്ന ചരിത്രനേട്ടമാണ് താരം സ്വന്തമാക്കിയത്.

മത്സരത്തിൽ ശ്രീലങ്ക പരാജയപ്പെട്ടെങ്കിലും രത്നായകെയുടെ ഈ അപൂർവ്വ നേട്ടം ക്രിക്കറ്റ് ലോകത്ത് വലിയ ചർച്ചയായിരിക്കുകയാണ്.

ഇരു കൈകളിലും വിക്കറ്റ് വീഴ്ത്തി ചരിത്രനേട്ടം

മത്സരത്തിൽ ഇടംകൈയ്യൻ ഓർത്തഡോക്സ് സ്പിൻ എറിഞ്ഞ് സഞ്ജു സാംസണെ പുറത്താക്കിയ രത്നായകെ, പിന്നീട് വലംകൈയ്യൻ ഓഫ് സ്പിൻ പന്തെറിഞ്ഞാണ് ശിവം ദുബെയെ വീഴ്ത്തിയത്.4 ഓവറിൽ 32 റൺസ് വഴങ്ങി 2 വിക്കറ്റാണ് താരം സ്വന്തമാക്കിയത്.

മുൻപും ഇത്തരം നേട്ടങ്ങൾ സ്വന്തമാക്കിയിട്ടുള്ള താരമാണ് രത്നായകെ. 2025 ജൂണിൽ ഗാലെയിൽ ബംഗ്ലാദേശിനെതിരെ നടന്ന ടെസ്റ്റ് മത്സരത്തിലും ഇരുകൈകൾ കൊണ്ട് പന്തെറിഞ്ഞ് വിക്കറ്റ് വീഴ്ത്തുന്ന ആദ്യ ബൗളറെന്ന റെക്കോർഡ് അദ്ദേഹം കുറിച്ചിരുന്നു.

ഇന്ത്യയുടെ റെക്കോർഡ് വിജയം

ഏഷ്യൻ ഗെയിംസ് സെമിഫൈനലിൽ ഇന്ത്യയോട് 124 റൺസിന്റെ വമ്പൻ തോൽവിയാണ് ശ്രീലങ്ക നേരിട്ടത്.

ആദ്യം ബാറ്റ് ചെയ്ത ഇന്ത്യ, ഇഷാൻ കിഷന്റെ തകർപ്പൻ പ്രകടനത്തിന്റെ (46 പന്തിൽ പുറത്താകാതെ 80 റൺസ്) മികവിൽ 20 ഓവറിൽ 7 വിക്കറ്റ് നഷ്ടത്തിൽ 169 റൺസ് എടുത്തു.

മറുപടി ബാറ്റിംഗിനിറങ്ങിയ ശ്രീലങ്കയെ ജസ്പ്രീത് ബുംറ, അക്സർ പട്ടേൽ, അഭിഷേക് ശർമ്മ എന്നിവരുടെ നേതൃത്വത്തിലുള്ള ഇന്ത്യൻ ബൗളിംഗ് നിര വെറും 45 റൺസിന് എറിഞ്ഞിടുകയായിരുന്നു.

ടെസ്റ്റ് പദവിയുള്ള രാജ്യങ്ങളിൽ ടി20 ക്രിക്കറ്റിൽ ശ്രീലങ്കയുടെ ഏറ്റവും കുറഞ്ഞ സ്കോറാണിത്. ഈ വിജയത്തോടെ ഇന്ത്യ ഏഷ്യൻ ഗെയിംസ് ഫൈനലിലേക്ക് മുന്നേറി.

ശ്രീലങ്കൻ നിരയിൽ സഹാൻ അരച്ചിഗെയും (2/28) തരിന്ദു രത്നായകെയും (2/32) മാത്രമാണ് ബൗളിംഗിൽ ഭേദപ്പെട്ട പ്രകടനം കാഴ്ചവെച്ചത്.