
തിരുവനന്തപുരം: സംസ്ഥാനത്ത് സ്വർണവിലയിൽ തുടർച്ചയായ ഇടിവ്. എട്ട് മാസത്തിന് ശേഷം കേരളത്തിൽ സ്വർണവില പവന് ഒരു ലക്ഷത്തിന് താഴെയെത്തി. ഇന്ന് (ചൊവ്വാഴ്ച) പവന് 560 രൂപ കുറഞ്ഞതോടെ വില 99,760 രൂപയായി. ഗ്രാമിന് 70 രൂപ കുറഞ്ഞ് 12,470 രൂപയിലുമെത്തി. ഇന്നലെ പവന് 600 രൂപയും ഗ്രാമിന് 75 രൂപയുമാണ് കുറഞ്ഞത്.
തുടർച്ചയായ രണ്ട് ദിവസങ്ങളിലായി പവന് 1,160 രൂപയുടെ ഇടിവാണ് രേഖപ്പെടുത്തിയത്. ഇതോടെ സ്വർണം വാങ്ങാൻ കാത്തിരുന്നവർക്ക് ആശ്വാസം പകരുന്ന നിലയിലേക്ക് വിപണിവില എത്തി.
ഇതിനുമുമ്പ് 2026 മാർച്ച് 23നാണ് കേരളത്തിൽ സ്വർണവില പവന് ഒരു ലക്ഷത്തിന് താഴെയെത്തിയത്. അന്ന് രാവിലെ 99,480 രൂപയായിരുന്നു പവന്റെ വില. എന്നാൽ ഉച്ചയ്ക്കുശേഷം വില കുതിച്ചുയർന്ന് 1,05,080 രൂപയിലെത്തി.
2025 ഡിസംബർ അവസാനത്തോടെയാണ് കേരളത്തിൽ സ്വർണവില ചരിത്രത്തിലാദ്യമായി ഒരു ലക്ഷം രൂപ കടന്നത്. പിന്നീട് 2026 ജനുവരി 29ന് പവന് 1,31,160 രൂപയിലെത്തി സർവകാല റെക്കോർഡും സൃഷ്ടിച്ചു.
അന്താരാഷ്ട്ര വിപണിയിലെ മാറ്റങ്ങളാണ് സ്വർണവിലയിലെ ഇപ്പോഴത്തെ ഇടിവിന് പ്രധാന കാരണമായി ചൂണ്ടിക്കാണിക്കപ്പെടുന്നത്. അമേരിക്കൻ കേന്ദ്രബാങ്കായ ഫെഡറൽ റിസർവ് പലിശനിരക്ക് ഉയർത്തിയേക്കുമെന്ന സൂചനകളും ഡോളറിന്റെ മൂല്യം ശക്തിപ്പെട്ടതും സ്വർണവിലയെ സമ്മർദത്തിലാക്കിയിട്ടുണ്ട്.
അന്താരാഷ്ട്ര വിപണിയിലെ വിലമാറ്റങ്ങൾക്കനുസരിച്ചാണ് കേരളത്തിലും സ്വർണവിലയിൽ ഏറ്റക്കുറച്ചിലുകൾ ഉണ്ടാകുന്നത്. വരും ദിവസങ്ങളിൽ രാജ്യാന്തര വിപണിയിലെ പ്രവണതകളും ഡോളറിന്റെ മൂല്യവും സ്വർണവിലയുടെ ഗതി നിർണയിക്കുന്നതിൽ നിർണായകമാകും.