19

இங்கிலாந்தின் முன்னாள் பிரதமர் கெய்ர் ஸ்டார்மர் பதவி விலகியமையால் வெற்றிடமாகிய நாடாளுமன்றத் தொகுதிக்கான இடைத்தேர்தலில் ஆளும் தொழிற்கட்சி அபார வெற்றியீட்டியுள்ளது. இதன்மூலம் தற்போதைய பிரதமர் ஆண்டி பர்ன்ஹாமின் தலைமைத்துவத்துக்குப் புதிய அரசியல் பலம் கிடைத்துள்ளதாகத் தெரிவிக்கப்படுகின்றது.

மத்திய இலண்டனின் ஹோல்பார்ன் மற்றும் செயிண்ட் பான்க்ராஸ் தொகுதியில் இடம்பெற்ற இத்தேர்தலில், தொழிற்கட்சி சார்பில் போட்டியிட்ட உள்ளூராட்சி மன்றத் தலைவர் சகல் அப்தி-வாலி 12,292 வாக்குகளைப் பெற்று வெற்றி பெற்றுள்ளார். இவரை எதிர்த்துப் போட்டியிட்ட இடதுசாரி பசுமைக் கட்சியின் தலைவர் சாக் போலான்ஸ்கி 8,928 வாக்குகளைப் பெற்றுத் தோல்வியடைந்தார்.

முன்னாள் பிரதமர் கெய்ர் ஸ்டார்மரின் இரண்டு ஆண்டு கால ஆட்சிக் காலத்தில் நாட்டின் பிரதான நகரங்களில் தொழிற்கட்சி பாரிய பின்னடைவுகளைச் சந்தித்திருந்தது. எனினும், தற்போதைய பிரதமர் பர்ன்ஹாம் கட்சியின் செல்வாக்கை மீளக் கட்டியெழுப்பி வரும் சூழலில், இத்தொகுதியைத் தொழிற்கட்சி தக்கவைத்துக் கொள்ளும் என்ற பரவலான எதிர்பார்ப்பை இந்த தேர்தல் முடிவு உறுதிப்படுத்தியுள்ளது.

தேசிய மட்டத்திலான கருத்துக் கணிப்புகளில் தொழிற்கட்சிக்கு முக்கிய சவாலாக ரிபார்ம் கட்சி உருவெடுத்து வருகின்றது. இவ்வாறான பின்னணியில், 2029ஆம் ஆண்டின் நடுப்பகுதியில் நடைபெறவுள்ள பொதுத் தேர்தலுக்கு முன்னதாக, பசுமைக் கட்சியை நோக்கி நகரத் தொடங்கிய இடதுசாரி வாக்காளர்களின் ஆதரவை மீளப் பெறுவதில் ஆளும் தொழிற்கட்சி தீவிர கவனம் செலுத்தி வருகின்றது.