12வது ஓவர் வரை ஆடிய கெய்க்வாட், இந்த இன்னிங்ஸில் 1 பவுண்டரி கூட அடிக்கவில்லை. அவர் அடிக்க முற்படவே இல்லை. மறுபக்கம் ஓரளவு அடித்து ஆடிய சஞ்சு சாம்சன், உர்வில் பட்டேல் மற்றும் கார்த்திக் ஷர்மா போன்ற வீரர்களுக்கு சிங்கிள்கள் எடுத்துக் கொடுக்கும் வேலையையே அவர் செய்தார். ஆனால், சன்ரைசர்ஸ் வீரர்கள் வேகத்தைக் குறைத்து பவுண்டரிகளின் எண்ணிக்கையைக் கட்டுப்படுத்திய போது அது ரன் விகிதத்தை மொத்தமாகவே பாதித்தது.

இஎஸ்பிஎன் கிரிக்இன்ஃபோ நிகழ்ச்சியில் இதுபற்றிப் பேசிய மும்பை இந்தியன்ஸ் அணியின் முன்னாள் வீரர்கள் மிட்செல் மெக்லகன் மற்றும் அம்பத்தி ராயுடு இருவரும், பெரிய மைதானத்தைப் பயன்படுத்தி கெய்க்வாட் 2 ரன் எடுக்கக்கூட முற்படவில்லை என்று விமர்சனம் செய்தார்கள். உண்மைதான், இந்த இன்னிங்ஸில் சிஎஸ்கே கேப்டன் அடித்த 15 ரன்களும் 15 சிங்கிள்கள் மூலம் வந்தவை. அவர் ரன்ரேட்டை அதிகப்படுத்துவதற்கான முயற்சியில் ஈடுபடக்கூட இல்லை.

அதேசமயம் சூப்பர் கிங்ஸ் ஓரளவு நல்ல நிலையில் இருந்த போதெல்லாம் தானாக முன்வந்து தன் அணிக்கு விக்கெட் வீழ்த்திக் கொடுத்தார் சன்ரைசர்ஸ் கேப்டன் பேட் கம்மின்ஸ். சஞ்சு சாம்சன் முதல் இரு ஓவர்களில் 5 பவுண்டரிகளும் 1 சிக்ஸரும் விளாச, மூன்றாவது ஓவரில் பந்துவீச வந்து சாம்சனை அவுட்டாக்கினார் கம்மின்ஸ்.

அடுத்ததாக, கார்த்திக் ஷர்மா விக்கெட்: 8வது ஓவரில் பிரஃபுல் ஹிங்கே பந்துவீச்சில் 2 பவுண்டரிகளும், 1 சிக்ஸரும் அடித்தார் கார்த்திக் ஷர்மா. 9வது ஓவரில் ஷிவாங் குமார் பந்துவீச்சிலும் ஒரு சிக்ஸர் அடித்தார். உடனே 10வது ஓவரை தானே பந்துவீச வந்தார். ஸ்வீப்பர் கவரில் ஒரு ஃபீல்டர் வைத்து, ஆஃப் ஸ்டம்புக்கு வெளியே இரண்டு ஸ்லோயர் பவுன்சர்கள் வீசினார். அந்த இரண்டாவது பவுன்சரில் சிக்கினார் கார்த்திக் ஷர்மா.

அந்த ஸ்பெல்லைத் தொடர்ந்த கம்மின்ஸ் 12வது ஓவரில் ருதுராஜ் கெய்க்வாட் விக்கெட்டையும் கைப்பற்றினார். இப்படியாக தன் அணிக்குத் தேவைப்பட்ட போதெல்லாம் தானே முன்வந்து கம்மின்ஸ் விக்கெட் எடுத்துக் கொடுக்க, ஆட்டத்தில் மெல்ல தங்கள் பிடியை இறுக்கியது சன்ரைசர்ஸ். ஆனால், சூப்பர் கிங்ஸுக்கு தங்கள் கேப்டனிடமிருந்து அப்படியொரு செயல்பாடு கிடைக்கவில்லை.

முதல் இன்னிங்ஸில் பந்தின் வேகத்தைக் குறைத்து சிஎஸ்கே அணியின் ரன்ரேட்டை வெகுவாகக் கட்டுப்படுத்தினார்கள் சன்ரைசர்ஸ் வேகப்பந்துவீச்சாளர்கள். இந்த ஆடுகளத்துக்கு அது மிகச் சரியான அணுகுமுறையாக அமைந்தது. அதீத அதிரடி காட்டும் சன்ரைசர்ஸ் பேட்டர்களுக்கு எதிராக அந்த அணுகுமுறை சூப்பர் கிங்ஸ் பௌலர்களுக்கும் கைகொடுக்கும் என்று கருதப்பட்டது. ஆனால், சிஎஸ்கே பௌலர்கள் அதைச் செய்யவே இல்லை.

ஆரம்பத்தில் இருந்தே சூப்பர் கிங்ஸ் பௌலர்கள் தங்களின் வழக்கமான பாணியையே கடைபிடித்தார்கள். பவர்பிளேவில் சரியான லைன் & லென்த்தில் கட்டுக்கோப்பாகப் பந்துவீசியதால் அவர்களால் நெருக்கடி கொடுக்க முடிந்தது. ஆனால், அப்போதும் கூட அவர்கள் ஸ்லோயர் பால்களைப் பயன்படுத்தியிருக்கவில்லை. பவர்பிளேவுக்குப் பின்பும் கூட அவர்கள் அதையேதான் செய்தார்கள்.

யார்க்கர், வைட் யார்க்கர் என்று அவர்கள் வழக்கம்போல் பந்துவீசினார்கள். அதை வேகமாகவும் வீசினார்கள். அது சன்ரைசர்ஸ் பேட்டர்களுக்கு சவால் எதுவும் ஏற்படுத்தவில்லை. அந்தப் பந்துகள் அவ்வப்போது தவறி ஸ்லாட்டில் விழ, அதை இஷான் கிஷன் போன்ற சன்ரைசர்ஸ் பேட்டர்கள் எளிதாகக் கையாண்டார்கள். சில தருணங்களில் நன்றாக பேட்டில் படாத பந்துகள் கூட வெகுதூரம் சென்றன.

இதை விமர்சித்த அம்பத்தி ராயுடு, “சன்ரைசர்ஸ் பௌலர்கள் ஸ்லோயர் பால்களை நன்கு பயன்படுத்தினார்கள். அது அவர்களுக்கு நன்கு உதவியது. அதை சிஎஸ்கே பௌலர்கள் முயற்சி செய்திருக்கவேண்டும். எனக்குத் தெரியும் அது அவர்களின் பலம் இல்லையென்று. ஆனால், அதற்கு பெருமளவு உதவிய ஆடுகளத்தில் முயற்சி செய்திருக் கவேண்டும்” என்று கூறினார்.

அதே நிகழ்ச்சியில் பேசிய மிட்செல் மெக்லனகன், “சன்ரைசர்ஸுக்கு என்ன உதவியது என்று சிஎஸ்கே கவனிக்கவில்லை என்று நினைக்கிறேன். சன்ரைசர்ஸ் பௌலர்களிடமிருந்து அவர்கள் எதையும் கற்றுக்கொள்ளவில்லை அல்லது கற்றுக்கொள்ள விரும்பவில்லை. அவர்கள் கற்றுக்கொள்ள விரும்பவில்லை என்றுதான் நான் நினைக்கிறேன். கடைசி கட்டத்தில் கெய்க்வாட் தன் பௌலர்களிடம் மெதுவாக வீசும்படி சைகை செய்தார். ஆனால், பௌலர்கள் அதை செய்யவில்லை. ஒன்று அவர்களால் அதை செய்ய முடியாது, இல்லை அவர்கள் செய்யக்கூடாது என்று நினைத்திருக்கிறார்கள். இது மிகப் பெரிய பிரச்னை” என்று கூறினார்.

இஎஸ்பிஎன் கிரிக்இன்ஃபோ தரவுகளின்படி இந்தப் போட்டியில் சன்ரைசர்ஸ் பௌலர்கள் 43% ஸ்லோயர் பால்கள் வீசினார்கள். அதேசமயம், சென்னை சூப்பர் கிங்ஸ் பௌலர்கள் 19% ஸ்லோயர் பால்களை மட்டுமே வீசியிருக்கிறார்கள்.

தற்போது ராயல் சேலஞ்சர்ஸ் பெங்களூரு, சன்ரைசர்ஸ் ஹைதராபாத், குஜராத் டைட்டன்ஸ் என மூன்று அணிகள் பிளே ஆஃப் சுற்றுக்கு முன்னேறியிருக்கின்றன. மும்பை இந்தியன்ஸ் மற்றும் லக்னௌ சூப்பர் ஜெயின்ட்ஸ் என இரு அணிகள் மட்டுமே அதிகாரப்பூர்வமாக பிளே ஆஃப் வாய்ப்பை இழந்திருக்கின்றன. அதனால் மீதமிருக்கும் அந்த 1 இடத்துக்கு இன்னும் 5 அணிகள் போட்டியிடுகின்றன.

12 புள்ளிகளுடன் ஆறாவது இடத்தில் இருக்கும் சிஎஸ்கே, கடைசி போட்டியில் குஜராத் டைட்டன்ஸை ஆமதாபாத்தில் சந்திக்கிறது. அந்தப் போட்டியில் ஜெயித்தால் சிஎஸ்கே-வால் 14 புள்ளிகள் பெறமுடியும். அதேசமயம், ராயல்ஸ் அணியால் அதிகபட்சம் 16 புள்ளிகளும், பஞ்சாப் மற்றும் கேகேஆர் அணிகளால் அதிகபட்சம் 15 புள்ளிகள் வரையும் பெற முடியும். டெல்லி கேபிட்டல்ஸும் கூட 14 புள்ளிகளில் முடிக்கலாம். இந்த போட்டியில் இருக்கும் மற்ற 4 அணிகளுமே புள்ளிகளை இழந்தால் மட்டுமே சிஎஸ்கே 4வது இடத்தை உறுதி செய்ய முடியும்.

அதற்கு என்ன நடக்கவேண்டும்?

உதாரணமாக, கீழ்க்கண்டவாறு நடந்தால் சிஎஸ்கே பிளே ஆஃப் வாய்ப்பை உறுதி செய்துவிடலாம்.

கொல்கத்தாவுக்கு எதிராக டெல்லி வெற்றி பெற்றாலும் வித்தியாசம் குறைவானதாக இருக்கவேண்டும். ஏனெனில் அவர்களின் நெட் ரன்ரேட் (-0.871) சூப்பர் கிங்ஸின் நெட் ரன்ரேட்டை (-0.016) விட மிகவும் பின்தங்கியிருக்கிறது. இது சூப்பர் கிங்ஸுக்கு சாதகமான விஷயம்.

ஒருவேளை ராஜஸ்தான் ராயல்ஸ் தங்களுக்கு மீதமிருக்கும் 2 போட்டிகளில் ஒரு வெற்றியும், ஒரு தோல்வியும் பெற்றால் நெட் ரன்ரேட் மிகப் பெரிய தாக்கத்தை ஏற்படுத்தும். சூப்பர் கிங்ஸுக்குப் பிறகு தான் ராயல்ஸின் கடைசிப் போட்டி என்பதால், அது ரியான் பராக்கின் அணிக்கு சாதகமான அம்சம். என்ன வித்தியாசத்தில் வெற்றி பெறவேண்டும் என்றோ அல்லது என்ன வித்தியாசத்தில் தோல்வியைத் தவிர்க்கவேண்டும் என்றோ அவர்களுக்கு உறுதியாகத் தெரிந்துவிடும்.

– இது, பிபிசிக்காக கலெக்டிவ் நியூஸ்ரூம் வெளியீடு