ஐந்து நிறுவனங்களிலும் சேர்த்து வாரத்திற்கு 183 மணி நேரம் வேலை செய்ய அவர் ஒப்பந்தம் செய்யப்பட்டிருந்தார். இது ஏழு நாட்களில் உள்ள மொத்த மணிநேரத்தை விட அதிகம்

இதன் மூலம், மக்கள் வரிப்பணத்தில் இருந்து 2.84 லட்சம் பவுண்டுக்கும் அதிகமான தொகையை அவர் மோசடியாகப் பெற்றார்.

2020 முதல் 2023 வரையிலான காலகட்டத்தில், மொத்தம் 8 பொதுத்துறை நிறுவனங்களில் முழுநேர பணியாற்றியுள்ளார். இதன் மூலம் அவருக்கு 3.5 லட்சம் பவுண்ட் சம்பளமாக வழங்கப்பட்டது.

சௌத்ரியுடன் பேசிய சிறிது நேரத்திலேயே, அவர் சுற்றுச்சூழல், உணவு மற்றும் ஊரக விவகாரங்கள் துறை நிறுவனத்தின் மின்னஞ்சல் முகவரியைப் பயன்படுத்தி காணொளி அழைப்பில் இணைந்திருந்ததை ஆடம்ஸ் கண்டுபிடித்தார்.

இதுகுறித்து அவர் கேள்வி எழுப்பியபோது, தொழில்நுட்பக் கோளாறு காரணமாக அவ்வாறு நிகழ்ந்ததாக சௌத்ரி விளக்கமளித்தார்.

“அவர் பொய் சொல்கிறார் என்று நான் நம்பினேன்” என்று நீதிமன்றத்தில் நடைபெற்ற விசாரணையின்போது ஆடம்ஸ் தெரிவித்தார். தனது சந்தேகங்களை மேலதிகாரிகளிடமும் அவர் கொண்டு சென்றுள்ளார்.

ஆனால் அவரது மோசடியான நடத்தை கண்டறியப்படாமலேயே இருந்தது. சௌத்ரி, செப்டம்பர் 2023-ல் அரசுப் பணியிலிருந்து விலகும் வரை, அவர் பல்வேறு அரசு நிறுவனங்களில் தொடர்ந்து பணியாற்றினார்.

இறுதியாக, 2024-ஆம் ஆண்டு அரசின் தேசிய மோசடி தடுப்பு அமைப்பு நடத்திய ஆய்வில் அவர் சிக்கினார். இந்த அமைப்பு, இரண்டு ஆண்டுகளுக்கு ஒருமுறை அரசுப் பணியாளர்களின் சம்பளப் பட்டியல் உள்ளிட்ட தரவுகளை ஆய்வு செய்து, சந்தேகத்துக்குரிய முரண்பாடுகளைக் கண்டறிகிறது.

திங்கள்கிழமை, ஒன்பது மோசடிக் குற்றச்சாட்டுகளில் சௌத்ரி குற்றவாளி எனத் தீர்ப்பளிக்கப்பட்டார். அவருக்கு “மிக கடுமையான சிறைத்தண்டனை” விதிக்கப்படும் என்று நீதிபதி தெரிவித்தார்.

56 வயதான சவுத்ரி, ஒவ்வொரு நாளும் தனியாகவே நீதிமன்றத்திற்கு வந்தார். அவருக்குத் திருமணமாகி இருந்தாலும், அவருக்கு ஆதரவாக நண்பர்களோ குடும்பத்தினரோ நீதிமன்றத்திற்கு வந்ததாகத் தெரியவில்லை.

அவர் பெரும்பாலும் இரண்டு பிளாஸ்டிக் பைகளுடன், தலையில் கம்பளித் தொப்பி அணிந்தபடி நீதிமன்றத்தின் நடைபாதைகளில் நடந்து செல்வார்.

சாட்சிக் கூண்டில் இருந்தபோது சில நேரங்களில் அவர் குழப்பமடைந்தவரைப் போல காணப்பட்டார்.

2015-ஆம் ஆண்டு தனக்கு பிடிஎஸ்டி (PTSD) எனப்படும் மன உளைச்சலுக்குப் பிந்தைய மனநலப் பாதிப்பு இருப்பது கண்டறியப்பட்டதாக சௌத்ரி தெரிவித்தார்.

வாழ்வாதாரத்தை இழந்துவிடுவோமோ என்ற அச்சத்தில் பல வேலைகளை ஏற்றுக்கொண்டதாக அவர் கூறினார். 2013-ஆம் ஆண்டு கல்வித் துறையில் பணியாற்றியபோது, அந்த வேலையிலிருந்து தான் வலுக்கட்டாயமாக வெளியேற்றப்பட்டதாகவும் அவர் தெரிவித்தார்.

மன அழுத்தம், மன உளைச்சல், அதிர்ச்சி மற்றும் அந்த நேரத்தில் ஏற்பட்ட பீதி காரணமாக வேலைகளுக்கு விண்ணப்பிக்கும்போது தான் தெளிவாகச் சிந்திக்கவில்லை என்று அவர் கூறினார்.

ஆனால், அவரது செயல்பாடுகள் திட்டமிட்டவை என்றும், வேண்டுமென்றே நேர்மையற்ற முறையில் செயல்பட்டு அரசு நிர்வாகத்தின் நடைமுறைகளைத் தனக்குச் சாதகமாகப் பயன்படுத்திக் கொண்டார் என்றும் அரசுத் தரப்பு வாதிட்டது.

இந்த வழக்கு, அரசுப் பணியாளர் நிர்வாகத்தின் செயல்பாடு குறித்து பல முக்கியமான கேள்விகளை எழுப்பியுள்ளது. இவ்வளவு காலம் அவர் எப்படித் தப்பித்தார்?

இதற்கான முக்கியக் காரணங்களில் ஒன்று, அரசுத் துறைகளின் மனிதவள அமைப்பு மையப்படுத்தப்படாமல் இருப்பதாகும்.

அரசுப் பணிக்கு விண்ணப்பிக்கும் போது, தான் ஏற்கெனவே அரசு ஊழியராகப் பணியாற்றுவதை சௌத்ரி விண்ணப்பப் படிவங்களில் குறிப்பிடவில்லை. இதனால், வெவ்வேறு துறைகளில் ஒரே நபர் பணியாற்றுவதைத் தொடர்புடைய அமைப்புகளால் கண்டறிய முடியவில்லை.

அரசு நிர்வாகம் தொடர்பாக ஆய்வு செய்யும் இன்ஸ்டிடியூட் ஃபார் கவர்ன்மென்ட் என்ற நிறுவனத்தில் பணியாற்றும் ஹன்னா கீனன், இந்த நடைமுறை முழுவதுமாகத் தோல்வியடைந்துள்ளது என்கிறார். “அரசுத் துறைகள் இடையே ஒருங்கிணைப்பு இல்லை. அவை தன்னிச்சையாக ஆள்சேர்ப்பு முடிவுகளை எடுக்கின்றன,” என்று அவர் கூறினார்.

“இந்த நிர்வாக முறையும் அதைச் சுற்றியுள்ள கலாசாரமும் சரியாகச் செயல்படவில்லை என்பது ஆச்சரியமல்ல. மோசமாகப் பணியாற்றுபவர்கள் ஒரு வேலையிலிருந்து மற்றொரு வேலைக்கு மாறுவதன் மூலம் நீண்டகாலமாகக் கண்காணிப்பிலிருந்து தப்பித்து வருவது நமக்கு ஏற்கெனவே தெரிந்ததுதான்” என்றும் அவர் குறிப்பிட்டார்.

பிரிட்டனில் 5.5 லட்சத்துக்கும் அதிகமானோர் அரசுப் பணிகளில் உள்ளனர். இவர்களில் பலர் மத்திய லண்டனில் உள்ள வைட்ஹால் அலுவலகங்களில் பணியாற்றுகின்றனர். அரசின் கொள்கைகளைச் செயல்படுத்துவது முதல் நாட்டின் அன்றாட நிர்வாகப் பணிகள் வரை இவர்களின் பொறுப்பாகும்.

சௌத்ரியின் மோசடி கண்டறியப்படாமல் இருந்ததற்கு மற்றொரு காரணமும் உள்ளது. அவர் கிழக்கு லண்டனில் தனது தாயுடன் வசித்த வீட்டிலிருந்தே அனைத்து வேலைகளையும் செய்துவந்தார். 2023-ஆம் ஆண்டில் அவரது தாயார் டிமென்ஷியா எனப்படும் நினைவாற்றல் பாதிப்பு மற்றும் இறுதிக்கட்டப் புற்றுநோயால் பாதிக்கப்பட்டிருந்தார். அவரைப் பராமரிக்க வீட்டில் இருக்க வேண்டியிருப்பதாகத் தனது முதலாளிகளிடம் சௌத்ரி தெரிவித்திருந்தார்.

ஆனால், தாயைப் பராமரிப்பதில் கவனம் செலுத்துவதற்காக வேலைப்பளுவைக் குறைப்பதற்குப் பதிலாக, மேலும் பல வேலைகளை ஏற்றுக்கொண்டார். தனது தினசரி வேலை அட்டவணையை மறைப்பதற்காகக் குடும்ப மருத்துவரிடம் இருந்து மருத்துவ விடுப்புச் சான்றிதழ்களையும் பெற்றார்.

2023 ஏப்ரல் மாதத்தில், பதற்றம் மற்றும் மனச்சோர்வு கலந்த பாதிப்பு இருப்பதாகக் கூறி டெஃப்ரா, பிரிட்டனின் சுகாதார பாதுகாப்பு முகமை, வர்த்தகம் மற்றும் வணிகத் துறை, உணவு தர நிர்ணய நிறுவனம் ஆகியவற்றில் அவர் மருத்துவ விடுப்பு எடுத்திருந்தார்.

இந்த மருத்துவச் சான்றிதழ்கள் நீதிமன்றத்தில் சமர்ப்பிக்கப்பட்டன. ஆனால், அவருக்கு ஏற்பட்ட மனச்சோர்வுக்கான காரணம் என்ன அல்லது அந்தக் காலகட்டத்தில் அவருக்கு மனநல மருத்துவ மதிப்பீடு மேற்கொள்ளப்பட்டதா என்பது குறித்த ஆதாரங்கள் எதுவும் சமர்ப்பிக்கப்படவில்லை.

உடல்நலப் பிரச்னைகள் இருந்தபோதிலும், அவர் மற்றொரு வேலையைத் தொடங்கினார். இந்த முறை உள்துறை அமைச்சகத்தில் பணிக்குச் சேர்ந்தார். அங்கு தான் உடல்நலமின்றி இருப்பதையோ, வேறு நிறுவனங்களில் பணியாற்றுவதையோ அவர் தெரிவிக்கவில்லை.

எதிர்பார்த்தபடியே, அவருடைய மேலாளர்கள் அவர் தனது வேலையைச் சரியாகச் செய்யவில்லை என்று நீதிமன்றத்தில் தெரிவித்தனர்.

குறிப்பாக, சுற்றுச்சூழல், உணவு மற்றும் ஊரக விவகாரங்கள் துறை (டெஃப்ரா) நிறுவனத்தில் சௌத்ரியை நிர்வகித்த டான் மெக்கார்ட்னி அளித்த சாட்சியம் மிகவும் முக்கியமானதாக இருந்தது. அவர், “எல்லா நேரமும் என்ன செய்ய வேண்டும் என்று நான் அவருக்குச் சொல்ல வேண்டியிருந்தது” என்றும், தொழில்நுட்பக் கோளாறுகளைக் காரணம் காட்டி, சௌத்ரி நான்கு மாதங்களுக்கு வீடியோ அழைப்புகளின் போது தனது கேமராவை அணைத்து வைத்திருந்தார் என்றும் கூறினார்.

இருப்பினும், அந்த நிறுவனத்தில் சௌத்ரியின் பணித்திறன் குறித்து முறையான மதிப்பீடுகள் எதுவும் மேற்கொள்ளப்படாததால், அவருக்கு நிரந்தரப் பணி வழங்கப்பட்டது. அங்கு அவர் இரண்டு ஆண்டுகள் பணியாற்றினார்.

2023 செப்டம்பர் மாதத்தில், சவுத்ரியின் வங்கிக் கணக்குகளில் 40,000 பவுண்டுக்கும் அதிகமான தொகை இருந்தது கண்டறியப்பட்டது. 45,000 பவுண்ட் மதிப்பிலான பிரீமியம் பாண்டுகள் உள்ளிட்ட கணிசமான முதலீடுகளும் அவரிடம் இருந்தன.

சுயாதீன சிந்தனைக் குழுவான ரீ: ஸ்டேட், 1,700 அரசு ஊழியர்களிடம் அண்மையில் நடத்திய ஆய்வில், 76 சதவீதம் பேர் மோசமாகப் பணியாற்றுபவர்களைக் கையாள்வதில் அரசுப் பணியாளர் அமைப்பு சிறப்பாகச் செயல்படுவதில்லை என்று தெரிவித்துள்ளனர்.

அரசுப் பணியில் இருந்த முன்னாள் மூத்த அதிகாரி ஒருவர், பிபிசியிடம் பேசுகையில், அரசுத் துறைகளில் பணித்திறனை மதிப்பிடுவதிலும், மோசமாகப் பணியாற்றுபவர்கள் மீது நடவடிக்கை எடுப்பதிலும் தயக்கம் இருப்பதாகக் கூறினார்.

“பிரிட்டன் அரசுப் பணியாளர் அமைப்பு, இடர்களை எதிர்கொள்வதில் தயக்கம் காட்டும் போக்கைக் கைவிட்டு, துணிச்சலுடன் முடிவெடுக்கும் அணுகுமுறையைக் கடைப்பிடிக்க வேண்டும் என்பது நீண்டகாலமாகவே வலியுறுத்தப்பட்டு வருகிறது. அரசுப் பணியாளர்களின் எண்ணிக்கையைக் குறைப்பதும், செயற்கை நுண்ணறிவுத் தொழில்நுட்பத்தைப் பயன்படுத்துவதும் முக்கியம்” என்று அவர் தெரிவித்தார்.

“ஆனால், இதுபோன்ற முடிவுகளை எடுப்பதில் நிலவும் அச்சத்தை நாம் குறைத்து மதிப்பிடக் கூடாது. பெரிய தனியார் நிறுவனங்களைப் போல, சரியாகச் செயல்படாத ஊழியர்களுக்குச் சிறிய தொகையை இழப்பீடாக வழங்கி, சமரச ஒப்பந்தத்தின் அடிப்படையில் அவர்களைப் பணிநீக்கம் செய்ய அரசுத் துறைகள் தயங்குகின்றன. அவ்வாறு செய்தால், நீண்டகாலமாகத் தொடரும் புகார்கள் வெளிப்படக் கூடுமென்றும், வரி செலுத்துவோரின் பணத்தை வீணடித்துவிட்டதாகக் குற்றச்சாட்டுகள் எழலாம் என்றும் அவை அஞ்சுகின்றன” என்கிறார் அவர்.

“காஷிம் சௌத்ரி, ஒரு பொது ஊழியராக அவர் மீது வைக்கப்பட்ட நம்பிக்கையைத் தவறாகப் பயன்படுத்தி, வரிப்பணத்தில் இருந்து கிட்டத்தட்ட 2.85 லட்சம் பவுண்டை மோசடி செய்துள்ளார். இதற்கான விளைவுகளை அவர் இப்போது எதிர்கொள்கிறார்.” என்கிறார் டெஃப்ரா செய்தித்தொடர்பாளர் ஒருவர்.

“டெஃப்ராவின் மோசடி தடுப்பு மற்றும் விசாரணைக் குழு நடத்திய முழுமையான, விரிவான விசாரணையின் விளைவாக இந்தத் தீர்ப்பு கிடைத்துள்ளது. பொதுப் பணத்திற்கு எதிரான மோசடி பொறுத்துக் கொள்ளப்படாது என்பதையும், அதற்குப் பொறுப்பானவர்கள் தண்டிக்கப்படுவார்கள் என்பதையும் இது தெளிவுபடுத்துகிறது” என்றும் அவர் தெரிவித்தார்.

வரிப்பணத்தை மீட்பதற்காக, சௌத்ரியின் குற்றச் செயல்கள் மூலம் கிடைத்த பணத்தை மீட்டெடுக்க அனைத்து வழிகளையும் பயன்படுத்தப்போவதாகவும் அந்தச் செய்தித் தொடர்பாளர் கூறினார்.

சௌத்ரியின் வழக்கு இதைவிடப் பரந்த ஒரு பிரச்னையையும் வெளிப்படுத்துகிறது.

தங்களது பல்வேறு வேலைகள் குறித்து முதலாளிகளுக்குத் தெரியாமல் எப்படிச் செயல்படுவது என்பது தொடர்பான ஆலோசனைகளை வழங்கும் இணையதளங்கள்கூட உருவாகியுள்ளன.

வீட்டிலிருந்து வேலை செய்வோரின் எண்ணிக்கை அதிகரித்திருப்பதே இந்தப் போக்கு வளர்வதற்கான காரணமாகக் கூறப்படுகிறது.

அரசின் தேசிய மோசடி தடுப்பு அமைப்பு வெளியிட்ட சமீபத்திய அறிக்கையின்படி, லண்டன் முழுவதும் இதுபோன்ற 23 சம்பவங்கள் கண்டறியப்பட்டுள்ளன. குறுகிய இடைவெளியில் 5 லட்சம் பவுண்ட் மதிப்பிலான கூடுதல் சம்பளம் வழங்கப்பட்டதும் இதன் மூலம் வெளிச்சத்துக்கு வந்துள்ளது.

இதற்கிடையே, சௌத்ரி மற்றொரு சட்டப் பிரச்னையிலும் சிக்கியுள்ளார். அவர் மீது அவரது சகோதரர்கள் புகாரளித்துள்ளனர்.

தங்களது தாயாருடைய இறுதிக் காலத்தில், அவரை மிரட்டி அவரது 21 லட்சம் பவுண்ட் மதிப்புள்ள வீட்டில் பாதியைத் தனது பெயருக்கு மாற்றிக்கொள்ள சௌத்ரி கையெழுத்துப் பெற்றதாக அவரது சகோதரர்கள் குற்றம்சாட்டுகின்றனர். இந்தக் குற்றச்சாட்டை சௌத்ரி மறுக்கிறார்.

குற்றவியல் விசாரணையின்போது சில நேரங்களில் சௌத்ரி தான் கேட்பதைப் புரிந்துகொள்ள முடியாமல் குழப்பமடைந்தவரைப் போலத் தோன்றினார். தான் பின்னிய பொய்வலைக்குக் காரணம் மன உளைச்சல்தான் என்றும் அவர் கூறினார்.

ஆனால், நடுவர் குழு ஏழு மணி நேரத்தில் தனது தீர்ப்பை வழங்கியது. தனிப்பட்ட ஆதாயமே அவரது நோக்கமாக இருந்தது என்றும், வரிப்பணத்தில் இருந்து பல்லாயிரக்கணக்கான பவுண்டுகளை அவர் திருடியுள்ளார் என்றும் முடிவு செய்தது.

சௌத்ரி இப்போது நீண்டகால சிறைத்தண்டனையை எதிர்கொண்டுவருகிறார்.

– இது, பிபிசிக்காக கலெக்டிவ் நியூஸ்ரூம் வெளியீடு