തിരുവനന്തപുരം: ശബരിമലയില് കരാറുകാര് സാധനങ്ങള് സന്നിധാനത്ത് എത്തിക്കണമെന്ന വ്യവസ്ഥ ഒഴിവാക്കി ടെണ്ടര് വ്യവസ്ഥ പരിഷ്കരിച്ച് തിരുവിതാംകൂര് ദേവസ്വം ബോര്ഡ്. കരാറുകാര് സാധനങ്ങള് പമ്പയിലെത്തിച്ച് ദേവസ്വം ബോര്ഡിന് കൈമാറണം എന്നാണ് പുതിയ വ്യവസ്ഥയിലുളളത്. സാധനങ്ങള് പമ്പയിലെ ദേവസ്വം ബോര്ഡ് സ്റ്റോറില് സൂക്ഷിച്ച് ഗുണനിലവാര പരിശോധന പൂര്ത്തിയാക്കിയ ശേഷം ബോര്ഡ് നേരിട്ട് സാധനങ്ങള് സന്നിധാനത്തേക്ക് എത്തിക്കും.നിലവാരമുള്ള സാധനങ്ങള് മാത്രം സന്നിധാനത്തേക്ക് കൊണ്ടുപോകും. പൂജാസാധനങ്ങള് കൊണ്ടുപോകുന്നതിനായി രണ്ട് ട്രാക്ടറുകള് ദേവസ്വം ബോര്ഡ് വാങ്ങും.
ശബരിമലയിലേക്ക് മില്മയുടെ വ്യാജ നെയ്യ് എത്തിയെന്ന വിവാദത്തെ തുടര്ന്നാണ് ടെണ്ടര് പരിഷ്കരണം. മില്മയില് നിന്നുമുളള നെയ്യ് ഗുണനിലാര പരിശോധനയ്ക്ക് കഴിഞ്ഞ് സന്നിധാനത്തേക്ക് എത്തും വഴി മാറ്റി ഗുണനിലവാരം കുറഞ്ഞ നെയ്യ് കരാറുകാരന് വച്ചെന്നാണ് ദേവസ്വം വിജിലന്സ് അന്വേഷണത്തിലെ പ്രാഥമിക നിഗമനം. ഇന്നത്തെ തിരുവിതാംകൂര് ദേവസ്വം ബോര്ഡ് യോഗത്തിലാണ് ടെണ്ടര് പരിഷ്കരണത്തിന് അനുമതിയായത്.