
ന്യൂദൽഹി: അനാവശ്യമായി സ്വർണ്ണം വാങ്ങുന്നത് ഒഴിവാക്കണമെന്ന പ്രധാനമന്ത്രി നരേന്ദ്ര മോദിയുടെ ആഹ്വാനം ലക്ഷക്കണക്കിന് വ്യാപാരികളെയും നിക്ഷേപകരെയും വലിയ നഷ്ടത്തിൽ നിന്നും കടക്കെണിയിൽ നിന്നും രക്ഷിച്ചതായി ചേംബർ ഓഫ് ട്രേഡ് ആൻഡ് ഇൻഡസ്ട്രി. ഇക്കാര്യത്തിൽ നന്ദി രേഖപ്പെടുത്തി സിടിഐ ചെയർമാൻ ബ്രിജേഷ് ഗോയലും മറ്റ് ഭാരവാഹികളും പ്രധാനമന്ത്രിക്ക് കത്തയച്ചു.
താങ്കളുടെ ദീർഘവീക്ഷണം ലക്ഷക്കണക്കിന് സ്വർണ്ണ വ്യാപാരികളെയും നിക്ഷേപകരെയും കടക്കെണിയിൽ വീഴാതെ രക്ഷിച്ചു എന്ന തലക്കെട്ടിലാണ് സിടിഐ കത്ത് അയച്ചത്. സ്വർണ്ണവില കിലോഗ്രാമിന് 1.90 കോടി രൂപയായിരുന്ന സമയത്താണ് പ്രധാനമന്ത്രി മുന്നറിയിപ്പ് നൽകിയതെന്നും, അന്ന് ആ നിർദ്ദേശം അവഗണിച്ച് സ്വർണ്ണം വാങ്ങിയിരുന്നെങ്കിൽ കിലോഗ്രാമിന് 65 ലക്ഷം രൂപ വരെ നഷ്ടമുണ്ടാകുമായിരുന്നുവെന്നും കത്തിൽ വ്യക്തമാക്കുന്നു. ലക്ഷക്കണക്കിന് കുടുംബങ്ങളുടെ അധ്വാനിച്ചുണ്ടാക്കിയ സമ്പാദ്യമാണ് ഇതിലൂടെ സംരക്ഷിക്കപ്പെട്ടതെന്നും സംഘടന ചൂണ്ടിക്കാട്ടി.
വിവാഹ സീസണിലെ ആശ്വാസം
സ്വർണ്ണവിലയിൽ ഉണ്ടായ കുറവ് നിലവിലെ വിവാഹ സീസണിൽ സാധാരണക്കാർക്ക് വലിയ ആശ്വാസമായി മാറിയിട്ടുണ്ടെന്ന് സിടിഐ വിലയിരുത്തി. ഏകദേശം 52 ലക്ഷത്തോളം വിവാഹങ്ങൾ നടക്കുന്ന സീസണിൽ കുറഞ്ഞ വിലയിൽ സ്വർണ്ണം ലഭിക്കുന്നത് കുടുംബങ്ങൾക്ക് സാമ്പത്തികമായി ഗുണം ചെയ്യുമെന്നും സ്വർണ്ണം-വെള്ളി പോലുള്ള വിപണികളിൽ തുടർന്നും മാർഗ്ഗനിർദ്ദേശം നൽകണമെന്നും സംഘടന അഭ്യർത്ഥിച്ചു.
ലഖ്നൗവിൽ നടന്ന ഒരു പരിപാടിയിൽ സ്വർണ്ണം വാങ്ങുന്നത് ഒഴിവാക്കണമെന്ന തന്റെ മുൻ ആഹ്വാനത്തെക്കുറിച്ച് പ്രധാനമന്ത്രി നരേന്ദ്ര മോദി പരാമർശിച്ചതിന് പിന്നാലെയാണ് സിടിഐയുടെ പ്രതികരണം. പശ്ചിമേഷ്യൻ സംഘർഷവും ക്രൂഡ് ഓയിൽ വില വർദ്ധനവും മൂലം വിദേശനാണ്യ ശേഖരം സംരക്ഷിക്കാനും ഇറക്കുമതി കുറയ്ക്കാനുമായി 2026 മെയ് 10-ന് സെക്കന്തരാബാദിൽ വെച്ചാണ് മോദി ഏഴ് നിർദ്ദേശങ്ങൾ മുന്നോട്ടുവെച്ചത്.
സ്വർണ്ണം വാങ്ങുന്നത് കുറയ്ക്കുക, വിദേശ യാത്രകൾ നിയന്ത്രിക്കുക, ഇന്ധനം ലാഭിക്കുക തുടങ്ങിയവയായിരുന്നു അതിൽ പ്രധാനം. ലാൽ ബഹദൂർ ശാസ്ത്രിയുടെ ‘ഒരു നേരത്തെ ഭക്ഷണം ഒഴിവാക്കൂ’ എന്ന ആഹ്വാനത്തോടാണ് മോദി തന്റെ നിർദ്ദേശത്തെ ഉപമിച്ചത്.