பட மூலாதாரம், Elizabeth Wilcox
-
- எழுதியவர், டேவிட் சில்வர்பெர்க்
- பதவி, டொராண்டோ வணிகச் செய்தியாளர்
-
பிரசுரிக்கப்பட்டது
-
வாசிக்கும் நேரம்: 4 நிமிடங்கள்
எலிசபெத்தும், டாம் வில்காக்ஸும், தங்களுக்கும் தங்களது இரண்டு குழந்தைகளுக்கும் விருப்பமான வீட்டை வாங்குவதற்குத் தங்களிடம் ஒருபோதும் போதிய பணம் இருக்காது என்பதை உணர்ந்தபோது, ஒரு துணிச்சலான முடிவை எடுக்கத் தீர்மானித்தனர்.
இளம் குழந்தைகளைக் கொண்ட மற்றொரு தம்பதியைக் கண்டுபிடித்து, தங்களுக்கு முற்றிலும் அறிமுகமில்லாதவர்களாக இருந்தாலும், ஒரு வீட்டை வாங்குவதற்கான செலவைச் சரிசமமாகப் பகிர்ந்துகொண்டு அனைவரும் ஒன்றாகக் குடியேறலாம் என்று அவர்கள் முடிவு செய்தனர்.
கனடாவில் வீட்டு விலைகள் நீண்டகாலமாக மிக அதிகமாக உள்ள நகரங்களில் ஒன்றான வான்கூவரில் வசிக்கும் வில்காக்ஸ் குடும்பத்தினர், தங்கள் குழந்தைகள் விளையாடுவதற்குப் பின்புறம் தோட்டம் கொண்ட ஒரு வீட்டை வாங்க மிகவும் விரும்பினர்.
“நடந்து செல்ல வசதியான ஒரு பகுதியில், டிராம்போலின் வைக்கக்கூடிய அளவுக்குப் பெரிய முற்றத்துடன் கூடிய வீட்டை நாங்கள் விரும்பினோம். ஆனால், எங்களால் அதை வாங்க முடியவில்லை,” என்று சுகாதாரத் துறையில் திட்ட மேலாளராகப் பணிபுரியும் எலிசபெத் கூறுகிறார்.
பத்து லட்சம் கனடிய டாலர் (சுமார் 6.46 கோடி ரூபாய்) மட்டுமே அவர்களது பட்ஜெட்டாக இருந்தது. அந்தத் தொகைக்கு பால்கனியுடன் கூடிய சிறிய அடுக்குமாடிக் குடியிருப்பை மட்டுமே வாங்க முடியும் என்ற நிலை இருந்தது.
அப்போதுதான் மற்றொரு குடும்பத்துடன் இணைந்து வீடு வாங்கும் யோசனை எலிசபெத்துக்கு வந்தது.
‘ஆயிரக்கணக்கான டாலர்களைச் சேமித்துள்ளோம்’
உள்ளூர் ரியல் எஸ்டேட் முகவர் நிறுவனத்தின் மின்னஞ்சல் செய்திமடலில் அவர்கள் ஒரு விளம்பரத்தை வெளியிட்டனர். ஆனால், பொருத்தமான ஒரு குடும்பத்தைச் சந்திக்க இரண்டு ஆண்டுகள் ஆனது. அந்தக் குடும்பம்தான் ஆஷ்லி புல்மேன், அவரது கணவர் மற்றும் அவர்களது இரண்டு குழந்தைகளைக் கொண்ட குடும்பம்.
2023-ஆம் ஆண்டில், வில்காக்ஸ் குடும்பத்தினரும் புல்மேன் குடும்பத்தினரும் இணைந்து ஆறு படுக்கையறைகள் கொண்ட தனி வீட்டை வாங்கினர். பின்புறம் தோட்டத்துடன் கூடிய அந்த வீட்டின் விலை 18 லட்சத்து 50 ஆயிரம் கனடிய டாலர்கள்.
இரு குடும்பங்களும் வீட்டுக்கான முன்பணமாக 2 லட்சத்து 50 ஆயிரம் கனடிய டாலர்களைச் சரிசமமாகப் பகிர்ந்து செலுத்தின. மாதந்தோறும் செலுத்த வேண்டிய 3,900 கனடிய டாலர் வீட்டுக் கடன் தவணையையும் தொடர்ந்து இரு குடும்பங்களும் சரிபாதியாகச் செலுத்தி வருகின்றன. மின் கட்டணம் உள்ளிட்ட வீட்டு பில்கள், தேவைப்படும் பழுதுபார்ப்புச் செலவுகள் போன்ற பிற செலவுகளையும் சமமாகப் பகிர்ந்துகொள்கின்றனர்.
இந்த ஏற்பாட்டின் மூலம் இரு குடும்பங்களும் “பல்லாயிரக்கணக்கான டாலர்களைச் சேமித்துள்ளன” என்கிறார் எலிசபெத்.
பட மூலாதாரம், Elizabeth Wilcox
முன்பு அறிமுகமில்லாதவர்களுடன் இணைந்து வீடு வாங்குவோரின் எண்ணிக்கை குறித்து அதிகாரபூர்வமான தரவுகள் எதுவும் இல்லை. ஆனால், அதிகரித்துவரும் வீட்டு விலைகளுக்கு எதிர்வினையாக டொராண்டோவில் இத்தகைய ஏற்பாட்டில் ஆர்வம் அதிகரிப்பதைத் தாம் கவனித்துள்ளதாகப் பரிமல் கோசாய் கூறுகிறார்.
கனடாவின் மிகப்பெரிய நகரமான டொராண்டோவில், முன்பின் தெரியாதவர்களுடன் இணைந்து வீடு வாங்க விரும்புவோரை இணைக்கும் செயலி மற்றும் இணையதளமான ஹஸ்மேட்ஸ் நிறுவனத்தின் நிறுவனர் மற்றும் தலைமைச் செயல் அதிகாரி இவர்.
“இதை ஒரு நிதி சார்ந்த உறவாகப் பார்க்கலாம். அப்படிப் பார்க்கும்போது உணர்ச்சிகளை இதில் இருந்து விலக்கிவிட முடியும்” என்கிறார் அவர்.
உலகின் பிற பகுதிகளிலும் இந்த நடைமுறை எவ்வளவு பொதுவானது என்பது தெளிவாகத் தெரியவில்லை. பிரிட்டனில் இத்தகைய ஏற்பாட்டைத் தாம் நேரடியாகச் சந்தித்ததில்லை என்றாலும், அங்கும் இது நடப்பதாகத் தாம் கருதுவதாக அடமானக் கடன் தரகு நிறுவனமான எல் அண்ட் சி நிறுவனத்தைச் சேர்ந்த டேவிட் ஹாலிங்வொர்த் கூறுகிறார்.
எனினும், இது “மிகவும் அரிதான நடைமுறை” என்றும் அவர் குறிப்பிடுகிறார்.
“கோவிட்-19 பெருந்தொற்றுக்கு முன்பு, முன்பின் தெரியாதவர்களுடன் இணைந்து வீடு வாங்க விரும்புவோருக்காக லண்டனில் உள்ள ஒரு மதுக்கூடத்தில், விரைவான அறிமுக நிகழ்ச்சியைப் போன்ற ஒரு சந்திப்பு நடைபெற்றது எனக்கு நினைவிருக்கிறது. அது எவ்வளவு வெற்றிகரமாக அமைந்தது என்பது எனக்குத் தெரியாது” என்கிறார் அவர்.
பட மூலாதாரம், Elizabeth Wilcox
மூன்று ஆண்டுகள் கடந்துள்ள நிலையில், தங்களது இந்தக் குடியிருப்பு ஏற்பாடு தொடர்ந்து நல்ல முறையில் செயல்பட்டு வருவதாக வில்காக்ஸ் மற்றும் புல்மேன் குடும்பத்தினர் கூறுகின்றனர்.
ஒவ்வொரு குடும்பத்துக்கும் தனிப்பட்ட இடங்கள் உள்ளன. உதாரணமாக, அவர்களுக்கெனத் தனித்தனி சமையலறைகள் உள்ளன. அதேநேரத்தில், அடித்தளத்தில் உள்ள பெரிய வரவேற்பறையை இரு குடும்பங்களும் பகிர்ந்துகொள்கின்றன. அந்த அறையின் ஒரு மூலையில் வீட்டு உடற்பயிற்சிக் கூடமும், இரு குடும்பங்களும் பயன்படுத்தும் ஒரு குளிர்பதனப் பெட்டியும் உள்ளன.
“யாராவது உடற்பயிற்சி செய்வதற்காக அடித்தளத்தில் இருப்பதாகச் சொன்னால், சிறிது நேரத்துக்கு அங்கு செல்லாமல் இருக்க வேண்டும் என்பதை நாங்கள் புரிந்துகொள்வோம். இதுவரை அதனால் எந்தப் பிரச்னையும் ஏற்பட்டதில்லை” என்கிறார் எலிசபெத்.
ஆஷ்லியும் தங்களுக்குள் எந்தப் பிரச்னையும் இல்லை என்பதை ஒப்புக்கொள்கிறார். “ஒருவேளை இது எங்களுடைய தற்பெருமையாக இருக்கலாம். ஆனால், முன்பின் தெரியாதவர்களுடன் சேர்ந்து வாழக்கூடியவர்கள் நாங்கள் என்று நானும் என் கணவரும் நினைத்தோம்” என்கிறார் அவர்.
‘நாங்கள் வீட்டுக் கூட்டங்களை நடத்துகிறோம்’
டொராண்டோவைச் சேர்ந்த சுயதொழில் வணிக ஆலோசகரான சப்ரினா போமன், 2018-ஆம் ஆண்டு முதல் வேறு இரண்டு பேருடன் இணைந்து ஒரு வீட்டின் உரிமையாளராக இருந்து வருகிறார்.
ஒப்பந்தத்தில் கையெழுத்திட்டு அந்த வீட்டுக்குக் குடியேறியபோது, மற்ற இரண்டு பேரில் ஒருவரை அவருக்கு முன்பே தெரிந்திருக்கவில்லை.
தங்களது நிதி விவரங்களைத் துல்லியமாகப் பகிர்ந்துகொள்ள சப்ரினா விரும்பவில்லை. ஆனால், ஒவ்வொருவரின் வருமானத்துக்கு ஏற்ப வீட்டுக்கான முன்பணத்தையும் கடன் தவணைகளையும் பிரித்துச் செலுத்த அவர்கள் முடிவு செய்ததாகக் கூறுகிறார்.
வீட்டில் ஏதேனும் கருத்து வேறுபாடுகள் ஏற்பட்டால், அவற்றைத் தொடக்கத்திலேயே வெளிப்படையான பேச்சுவார்த்தைகள் மூலம் தீர்த்துக்கொள்ள முடியும் என்கிறார் அவர். “வீட்டில் நடக்கும் ஒவ்வொரு விஷயத்தையும் பற்றிப் பேசுவதற்கான வழிமுறைகளை உருவாக்கியிருப்பதுதான் எங்களுக்கு முக்கியம்” என்கிறார் சப்ரினா.
வீட்டு வேலைகள், நிதி தொடர்பான பிரச்னைகள், பிறந்தநாள் கொண்டாட்டங்கள், கருத்து வேறுபாடுகள் ஆகியவை குறித்து விவாதிக்க அவர்கள் வழக்கமான வீட்டுக் கூட்டங்களை நடத்துகின்றனர்.
“ஒருவருக்குச் சங்கடமாக இருக்கக்கூடிய ஒரு விஷயத்தை அவர் வெளிப்படையாகப் பேசுவதையும், அந்தப் பிரச்னைக்குத் தீர்வு காண்பதையும் பார்ப்பது மகிழ்ச்சியாக இருக்கிறது” என்கிறார் சப்ரினா.
பட மூலாதாரம், Sabrina Bowman
டொராண்டோவில் சப்ரினா வசிக்கும் வீடு, வான்கூவரில் வில்காக்ஸ் மற்றும் புல்மேன் குடும்பத்தினர் வசிக்கும் வீடு ஆகிய இரண்டிலும், யாராவது வீட்டை விற்றுவிட்டு வெளியேற விரும்பினால் என்ன செய்ய வேண்டும் என்பது குறித்து சட்டப்பூர்வ ஒப்பந்தங்கள் செய்யப்பட்டுள்ளன.
இரு வீடுகளிலும், வெளியேற விரும்புபவர்கள் முன்கூட்டியே நியாயமான கால அவகாசம் அளிக்க வேண்டும் என்று ஒப்பந்தத்தில் குறிப்பிடப்பட்டுள்ளது. சப்ரினாவின் வீட்டைப் பொறுத்தவரை, வெளியேறுபவர் தனது பங்கை விற்க விரும்பினால், அதை வாங்குவதற்கு அங்கே தொடர்ந்து வசிப்பவர்களுக்கே முதலில் வாய்ப்பு அளிக்க வேண்டும்.
“இத்தகைய சட்டப்பூர்வ உத்தரவாதங்கள் மிகவும் அவசியமானவை என்று டொராண்டோ ரியல் எஸ்டேட் வழக்கறிஞர் தானியா வாக்கர் கூறுகிறார்.
”ஏதேனும் சச்சரவு ஏற்பட்டால் சேகரிப்பதற்கு மிகவும் குழப்பமானதாக இருக்கும் பல மின்னஞ்சல்கள் மற்றும் ஃபேஸ்புக் செய்திகளுக்குப் பதிலாக, சட்டப்பூர்வமாகக் கட்டுப்படுத்தக்கூடிய ஓர் ஒப்பந்தம் அவசியம்” என்று வாக்கர் கூறுகிறார்.
வான்கூவரில், இந்த வீட்டில் எவ்வளவு காலம் வசிப்பது என்பது குறித்து இரு குடும்பங்களும் எந்தக் காலக்கெடுவையும் நிர்ணயிக்கவில்லை என்கிறார் எலிசபெத்.
“இந்த ஏற்பாட்டிலும், இந்த இடத்திலும் நாங்கள் அனைவரும் மிகவும் மகிழ்ச்சியாக இருக்கிறோம். எனவே, இங்கிருந்து வெளியேறுவது கடினமாக இருக்கும். குழந்தைகள் முதல்முறையாக டிராம்போலினில் குதித்ததையும், எங்களுக்குச் சொந்தமான பசும்புல் தரையில் வட்டமாக ஓடி விளையாடியதையும் பார்த்தபோது ஏற்பட்ட மகிழ்ச்சிக்கு என்னால் விலை நிர்ணயிக்க முடியாது” என்கிறார் அவர்.
– இது, பிபிசிக்காக கலெக்டிவ் நியூஸ்ரூம் வெளியீடு