சிங்கீதத்தின் முதல் திரைப்படம் 1972ஆம் ஆண்டு வெளியான நீதி தக்ஷா. இந்தப் படத்தின் கதை, திரைக்கதை மற்றும் இயக்கம் சிங்கீதத்தினுடையது. பாடல்களை பிங்களி நாகேந்திர ராவ் எழுதியிருந்தார். 1972ஆம் ஆண்டில் உலகம் இன்னும் வேகமடையவில்லை. நகரமயமாக்கலும் முழுமையாக வேரூன்றவில்லை. ஆனால் நீதி தக்ஷா படத்தின் முதல் வசனமே, “வாழ்க்கை வேகமடைந்துவிட்டது” என்பதுதான்.

இந்தப் படம் நாகபூஷணம் கிராம மக்களிடம், “கிராமங்களில் இனி எதுவும் இல்லை, நகரங்களுக்குச் செல்லுங்கள்” என்று அறிவுரை கூறுவதில் தொடங்குகிறது. படம் தனது நேர்மை மற்றும் உண்மைத்தன்மைக்காக விமர்சகர்களால் பாராட்டப்பட்டது. ஆனால் வசூல்ரீதியாக வெற்றி பெறவில்லை. அதற்குக் காரணம் மௌன கதாநாயகன் (ஹிந்தி நடிகர் சந்தோஷ் அரோரா).

சோதனை முயற்சிகளை மேற்கொள்வது சிங்கீதத்தின் முதல் படத்தில் இருந்தே ஒரு பழக்கமாக இருந்தது.

ஒன்பது ஆண்டுகளுக்குப் பிறகு, கமல் ஹாசன் போன்ற ஒரு பெரிய நட்சத்திரத்தை வைத்து அமாவாஸ்யா சந்த்ருடு (1981) வெளியானது. இதில் தாத்தா கதாபாத்திரத்தில் எல்.வி. பிரசாத் அற்புதமாக நடித்திருந்தார். இருந்தாலும் படம் தோல்வியடைந்தது. அதற்குக் காரணம், கதாநாயகன் பார்வையற்றவராக இருந்தது. அதுவொரு கிளாசிக் திரைப்படமாக நிலைத்தது. பின்னர் கமலுடன் அவர் செய்த சோதனை முயற்சிகளை விவரிக்க வார்த்தைகள் போதாது.

முதல் படம் துஸ்ஸுமானே என அழைக்கப்பட்டது, இரண்டாவது படம் திக்கற்ற பார்வதி (1974) தமிழில் உருவாக்கப்பட்டது. நீதி தக்ஷா மூலம் வருமானம் கிடைக்காத போதிலும், அதே தயாரிப்பாளர்களான எம். லக்ஷ்மி காந்த ரெட்டி மற்றும் சஞ்சீவ ரெட்டி இரண்டாவது படத்தையும் தயாரித்தனர். அவர்கள் சிங்கீதத்தின் மீது நம்பிக்கை வைத்திருந்தனர்.

சி. ராஜகோபாலாச்சாரியின் கதையை அடிப்படையாகக் கொண்டு உருவான திக்கற்ற பார்வதி தேசிய விருதை வென்றது.

மூன்றாவது திரைப்படமான ஜமீந்தாருகாரி அம்மாயி 1975ஆம் ஆண்டு வெளியானது.

படப்பிடிப்பின் ஒரு கட்டம் முடிந்ததும் எஸ்.வி. ரங்காராவ் திடீரென காலமானார். ஜமீன்தாரின் கதாபாத்திரம் ஏற்கெனவே படமாக்கப்பட்டிருந்தது. இந்தப் படத்தில் நல்ல பாடல்கள் இருந்த போதிலும், அவற்றில் எதுவும் பெரிய வரவேற்பைப் பெறவில்லை. ஆனால் மங்கம்மா நுவ்வு உட்டுகுத்தெர்ன்டே என்ற பாடல் சூப்பர் ஹிட் ஆனது. அது பாபி திரைப்படத்தில் இடம்பெற்ற ஹம் தும் ஏக் கமரே மேம் பாடலின் தழுவலாக இருந்தது.

அந்தப் பாடலை எதிர்த்து தொடர்புடைய சாதி அமைப்புகள் வழக்குகள் தொடர்ந்தன. மிரட்டல் கடிதங்களும் வந்தன. அவற்றுடன் வணிக ரீதியான சிக்கல்களும் இருந்தபோதிலும், அந்தப் பாடல் நல்ல பெயரைப் பெற்றது.

கடந்த 1976ஆம் ஆண்டில் சிங்கீதம் மூன்று திரைப்படங்களை இயக்கினார். அவற்றில் ஒன்றான அமெரிக்கன் கேர்ல் சாதாரண வெற்றியே பெற்றது. 1977ஆம் ஆண்டு அவர் அந்தமே ஆனந்தம் திரைப்படத்தை இயக்கினார். பெண்களின் பாலியல் கிளர்ச்சியின்மையை மையமாகக் கொண்ட முதல் திரைப்படம் அது. ஆனால் அதே காலகட்டத்தில் தாசரி மற்றும் ஸ்ரீதேவி கூட்டணியில் மா பங்காரக்கா வெளியாகியது. இரு படங்களும் ஒரே கதையைக் கொண்டிருந்ததால், ஒரு கட்டத்தில் இந்த விவகாரம் நீதிமன்றம் வரை சென்றது.

கடந்த 1978ஆம் ஆண்டு வெளியான சொம்மொக்கடிடி சொகொக்கடிடி மிகப்பெரிய வெற்றியைப் பெற்றது.

அதன் பின்னர் கமல் ஹாசனுடன் இணைந்து புஷ்பக விமானம், மைக்கேல் மதன காமராஜன், அபூர்வ சகோதரர்கள் போன்ற படங்களில் தொடர்ந்து பல சோதனை முயற்சிகளை மேற்கொண்டார். அவை அனைத்தும் காலத்தால் அழியாத கிளாசிக் திரைப்படங்களாக அமைந்தன.

பாலகிருஷ்ணாவுடன் அவர் இயக்கிய மூன்று திரைப்படங்களில் இரண்டு மிகப்பெரிய வெற்றிப் படங்களாக அமைந்தன. அவை பைரவ தீபம், ஆதித்யா 369. சிங்கீதம் அனைத்து மொழிகளிலும் சேர்த்து சுமார் 60 திரைப்படங்களை இயக்கியுள்ளார். எந்தக் கதையும் மற்றொரு கதையைப் போல் இருக்காது என்பதே அவரது சிறப்பம்சம். சிங்கீதம் ஒரே மாதிரியான பாணிக்குள் சிக்கிக் கொண்டவரல்ல.

அக்கினேனியுடன் உருவாக்கிய பில்லா ஜமீந்தார் திரைப்படமும் தனித்துவமானதே. என்.டி.ஆருடன் மிகவும் நெருக்கமாக இருந்தபோதிலும், அவருடன் ஒரு திரைப்படம்கூட இயக்க முடியவில்லை. அந்த விருப்பத்தை அவர் பாலகிருஷ்ணாவை வைத்து நிறைவேற்றிக் கொண்டார்.

மயூரி திரைப்படத்தில் சுதா சந்திரனை அவருடைய சொந்த வாழ்க்கைக் கதையிலேயே நடிக்க வைத்தார். மேடம் திரைப்படத்தில் ராஜேந்திர பிரசாத்தை பெண் வேடத்தில் நடிக்க வைத்தார். கிராபிக்ஸ் வசதிகள் இல்லாத காலத்தில் விசித்திர சோதருலு திரைப்படத்தில் குறைந்த உயரமுடைய கமல் ஹாசனை எப்படிக் காட்சிப்படுத்தினார் என்பது இன்றும் ஆச்சரியமாகவே உள்ளது. இந்த மாயாஜாலம் சாத்தியமானது ‘ஜப்பான்’ என்ற பெயருடைய செட் உதவியாளரின் காரணமாகத்தான் என்று கமல் வெளிப்படையாகக் கூறியுள்ளார். சிறிய பங்களிப்புகளையும் மதிக்கும் விதம் அதுவே.

ஒரு காலத்தில் கமலும் சிங்கீதமும் கருத்து வேறுபாடு காரணமாகப் பிரிந்துவிட்டார்கள் என்ற வதந்தி பரவலாகக் கூறப்பட்டது. ஆனால் அதன் பிறகும் இருவரும் பல திரைப்படங்களில் இணைந்து பணியாற்றினர். அதற்குக் காரணம், இருவருக்கும் இருந்த ஒத்த நகைச்சுவை உணர்வுதான்.

தனது நகைச்சுவை உணர்வைத் தந்தையிடம் இருந்தே பெற்றதாக சிங்கீதம் கூறியுள்ளார். அவரது திரைப்படங்களில் உணர்ச்சியைவிட நகைச்சுவைக்கே அதிக இடமுண்டு. அவரது பேச்சிலும் அதைக் காணலாம்.

நான்கு ஆண்டுகளுக்கு முன் அவரது மனைவி மறைந்தபோது அவர் மனவேதனை அடைந்தார். இருப்பினும் சமீபத்தில் சிங் கீதம் என்ற திரைப்படத்தை உருவாக்கி, இசையின் மீதான தனது காதலை வெளிப்படுத்தினார். அந்தப் படத்தில் பாடல்கள் உள்ளன, ஆனால் பாடலையே திரைப்படமாக மாற்றியிருப்பது, அவரது படைப்பாற்றலின் வெளிப்பாடு.

– இது, பிபிசிக்காக கலெக்டிவ் நியூஸ்ரூம் வெளியீடு