பட மூலாதாரம், Getty Images
-
- எழுதியவர், லாரன் பாட்ஸ்
-
பிரசுரிக்கப்பட்டது
-
வாசிக்கும் நேரம்: 4 நிமிடங்கள்
பல்பொருள் அங்காடியில் பற்பசைகள் வைக்கப்பட்டிருக்கும் வரிசையில் நின்று பாருங்கள். அவற்றின் பாக்கெட்டுகளிலும் பெட்டிகளிலும் பற்களை வெண்மையாக்கும் என்று பல்வேறு விளம்பரக் கூற்றுகள் இடம்பெற்றிருப்பதைக் காணலாம்.
முன்பை விட இப்போது நமது பற்களின் வெண்மை குறித்து அதிக அக்கறை காட்டுகிறோம் என்று தெரிகிறது.
வாய்வழி சுகாதார அறக்கட்டளை நடத்திய ஆய்வில், புன்னகையைப் பொறுத்தவரை 42 சதவீதம் பேர் வேறு எதையும் விடத் தங்கள் பற்களின் வெண்மையைத்தான் மாற்ற விரும்புவதாகத் தெரிவித்துள்ளனர்.
ஆனால், பற்களை வெண்மையாக்கும் பொருள்கள்தான் ஒரே வழியா? அல்லது நாம் உண்ணும் உணவுகளும் பற்களின் இயற்கையான வெண்மையைப் பாதுகாக்க உதவுமா?
பற்களில் கறை ஏற்படக் காரணம் என்ன?
பற்களில் கறை ஏற்படுவதில் இரண்டு வகைகள் உள்ளன. அவை உட்புறக் கறைகள் மற்றும் வெளிப்புறக் கறைகள் என்று தனியார் மற்றும் பிரிட்டனின் தேசிய சுகாதார சேவையில் பணியாற்றும் பல் மருத்துவர் டோபி ஹான்காக் கூறுகிறார்.
பல்லின் உட்புறத்திலிருந்து நிறமாற்றம் ஏற்படுவது உட்புறக் கறை எனப்படுகிறது.
பற்களின் எனாமல் நிறத்தைப் பாதிக்கக்கூடிய அமெலோஜெனெசிஸ் இம்பர்ஃபெக்டா போன்ற மரபணு சார்ந்த பாதிப்புகள் அல்லது குறிப்பிட்ட மருந்துகளுக்கு உடல் எதிர்வினையாற்றுவது ஆகியவை இதற்குக் காரணமாக இருக்கலாம்.
வெளிப்புறக் கறைகள் என்பது பெயருக்கு ஏற்றபடி பல்லின் வெளிப்புறத்திலிருந்து ஏற்படுபவை.
புகைப்பிடித்தல், பல் சுகாதாரத்தைப் பராமரிக்கும் முறை, உணவு மற்றும் பானங்கள் போன்றவை இதற்குக் காரணமாகின்றன.
பட மூலாதாரம், Getty Images
பற்களில் கறை படிவதற்குக் காரணமாகும் உணவுகள் எவை?
நம்மில் பலருக்கும் ஏற்கெனவே தெரிந்த சில பானங்கள்தான் பற்களில் கறை ஏற்படுவதற்கு முக்கியக் காரணமாக உள்ளன என்கிறார் ஹான்காக்.
அதாவது, தாவரங்களில் இயற்கையாகக் காணப்படும் டேனின் என்ற வேதிப்பொருள் கொண்ட பானங்கள் இவற்றில் அடங்கும்.
“சிவப்பு ஒயின், காபி, தேநீர் ஆகியவை பற்களில் கறை ஏற்படுத்துவதற்கான வழக்கமான காரணிகள். குறிப்பாக, எஸ்பிரெசோ காபி பற்களில் கறையைப் படியச் செய்வதில் அதிகத் தாக்கம் கொண்டது” என்கிறார் அவர்.
பிற நிறமுள்ள உணவுகள் மற்றும் பானங்களாலும் பற்களில் கறை ஏற்படலாம் என சுகாதார சேவை நிறுவனமான பூபா தெரிவிக்கிறது.
கோலா, அடர் நிறமுடைய பெர்ரி பழங்கள், பால்சாமிக் வினிகர் மற்றும் பீட்ரூட் ஆகியவை இதில் அடங்கும்.
தக்காளியை அடிப்படையாகக் கொண்ட சாஸ்கள் மற்றும் சோயா சாஸ் ஆகியவற்றில் உள்ள அடர்த்தியான நிறமிகளும் பற்களில் மஞ்சள் நிறக் கறையை ஏற்படுத்தக்கூடும் என்று அந்த நிறுவனம் எச்சரிக்கிறது.
நமது மசாலாப் பொருட்கள் வைக்கும் அலமாரியிலும், உணவகங்களில் வாங்கி உண்ணும் உணவுகளிலும் மற்றொரு காரணியும் இருக்கிறது.
“கறையை ஏற்படுத்துவதில் கறி சாஸ் மிகவும் தீவிரமானது” என்கிறார் ஹான்காக். இதற்குக் காரணம் அதில் சேர்க்கப்படும் மஞ்சள்.
பிரியாணி சாப்பிட்ட பிறகு நமது பாத்திரங்களில் படியும் மஞ்சள் நிறக் கறைகளை நாம் அனைவரும் பார்த்திருப்போம்.
அதேபோன்ற பாதிப்பை நமது பற்களிலும் அது ஏற்படுத்தக்கூடும் என்பதற்கு இதுவே சிறந்த உதாரணம்.
“பீங்கான் பாத்திரங்களின் நுண் கட்டமைப்பும் பற்களின் எனாமல் அமைப்பும் மிகவும் ஒத்தவை. துரதிர்ஷ்டவசமாக, இந்த அமைப்பு கறைகளை ஈர்க்கக்கூடியது. உங்கள் தட்டில் கறையை ஏற்படுத்தக்கூடிய எதுவும் பற்களிலும் கறையை ஏற்படுத்தும்” என்று அவர் விளக்குகிறார்.
இந்த உணவுகள் மற்றும் பானங்கள் அனைத்தையும் தவிர்ப்பது பற்களின் வெண்மையைப் பாதுகாக்க உதவலாம். ஆனால், அவற்றை முழுமையாகத் தவிர்ப்பது நடைமுறையில் சாத்தியமானதாக இருக்காது.
பட மூலாதாரம், BBC Food
பற்களின் நிறமாற்றத்தைத் தடுப்பதற்கான எளிய வழிகள் என்ன?
உணவு சாப்பிட்ட உடனே பல் துலக்குவது கறைகள் ஏற்படுவதைத் தவிர்ப்பதற்கான சிறந்த வழியாக இருந்தாலும், எல்லா நேரங்களிலும் அது சாத்தியமாவதில்லை.
ஆனால், கையில் பல் துலக்கும் பிரஷ் இல்லாத நேரங்களில்கூட பற்களில் கறை ஏற்படுவதைத் தடுக்க உதவும் வழி ஒன்று உள்ளது. மொறுமொறுப்பான உணவைச் சாப்பிடுவது இதற்குத் தீர்வாக இருக்கலாம் என்கிறார் ஹான்காக்.
“கடினமான உணவுகள் எதுவாக இருந்தாலும், அவை இயற்கையான முறையில் பற்களைச் சுத்தம் செய்ய உதவும். பச்சைக் கேரட் போன்றவற்றைக் கடித்துச் சாப்பிடும்போது, அவை மண்வெட்டியைப் போலச் செயல்பட்டு, பற்களில் படிந்திருக்கும் பிளேக் எனப்படும் பாக்டீரியா படலத்தைச் சுரண்டி அகற்றுகின்றன.”
பட மூலாதாரம், BBC Food
பழங்களைச் சாப்பிடும்போது கவனமாக இருக்க வேண்டும். ஏனெனில், அவற்றில் பற்களின் பாதுகாப்பு வெளிப்புற அடுக்கைச் சேதப்படுத்தக்கூடிய அமிலங்கள் உள்ளன. இதனால் பற்களில் எளிதில் கறைகள் படிய வாய்ப்புள்ளது.
ஆனால், சீஸ் சாப்பிடுவதில் எந்தத் தடையும் இல்லை. இருப்பினும், சரியான வகை சீஸைத் தேர்ந்தெடுப்பதை உறுதிப்படுத்திக்கொள்ள வேண்டும்.
“கடினமான சீஸ் பற்களைச் சுத்தம் செய்வதற்கு மிகவும் நல்லது. அதைக் கடித்துச் சாப்பிடும்போது, அதில் பற்களின் தெளிவான தடங்கள் பதிய வேண்டும். ஆனால், மென்மையான, ஒட்டும் தன்மையுள்ள சீஸுக்கு அதே நன்மை கிடையாது. அது பற்களில் ஒட்டிக்கொள்ளும்” என்கிறார் ஹான்காக்.
பட மூலாதாரம், Getty Images
பல் மருத்துவர் அங்கீகரித்த பற்களை வெண்மையாக்கும் குறிப்புகள் என்ன?
பற்களை வெண்மையாக வைத்திருப்பதற்கான மிகச் சிறந்த வழி, முதலில் அவற்றைச் சுத்தமாகப் பராமரிப்பதுதான் என்கிறார் ஹான்காக்.
ஒரு நாளைக்கு இரண்டு முறை பல் துலக்குவது குறைந்தபட்சம் நாம் பின்பற்ற வேண்டிய நடைமுறையாகும். அதேவேளையில், உணவு சாப்பிட்ட பிறகும் பல் துலக்குவது உதவக்கூடும்.
“உங்கள் பற்களின் எனாமல் பளபளப்பாகவும் மென்மையாகவும் இருந்தால், அதில் கறைகள் படிவது கடினம்” என்று விளக்கும் அவர்,”உதாரணமாக, நன்றாகப் பளபளப்பாக்கப்பட்ட தேநீர்க் கோப்பையின் உட்புறத்தில் கறைகள் படிவது கடினம். ஆனால், அது அழுக்காகவும் கரடுமுரடாகவும் இருந்தால், கறைகள் மிக எளிதாகப் படிந்துவிடும்”என்கிறார்.
பற்களில் கறை படிவதைத் தடுப்பதே சிறந்த வழி. குறிப்பாக, பற்களை வெண்மையாக்கும் சிகிச்சைகளுக்குச் செலவிட வேண்டிய தொகையைக் கருத்தில் கொள்ளும்போது, தடுப்பதே சிகிச்சையைவிடச் சிறந்தது.
கறைகள் படிவதைத் தடுக்க வேறு சில ஆச்சரியமளிக்கும் வகையில் எளிமையான வழிகளும் உள்ளன. குறிப்பாக, டேனின் அதிகம் உள்ள பானங்களை விரும்பி அருந்துபவர்களுக்கு இவை உதவக்கூடும்.
“காபியின் கடைசிச் சொட்டையும் குடித்து முடித்ததும், உடனடியாகக் கோப்பையைக் கழுவுங்கள். பின்னர், அதில் சிறிது தண்ணீர் ஊற்றி ஒரு மிடறு குடியுங்கள். அந்தத் தண்ணீரைக் கொப்பளித்துவிட்டு துப்பிவிடுங்கள். இதன் மூலம் டேனின் வேதிப்பொருளில் ஒரு பகுதியை அகற்றிவிடலாம்” என்று ஹான்காக் பரிந்துரைக்கிறார்.
வாழ்க்கை முறை மாற்றங்களும் உதவக்கூடும் என்கிறது பூபா நிறுவனம்.
தேநீர் மற்றும் காபியில் பால் சேர்ப்பது கறைகள் படிவதைக் குறைக்கும். அதேபோல், அடர் நிறமுள்ள குளிர்பானங்களைக் குடிக்கும்போது ஸ்ட்ரா பயன்படுத்தலாம். இதன் மூலம் பானம் பற்களைத் தொடாமல் நேரடியாகத் தொண்டைக்குச் சென்றுவிடும்.
எனவே, வெண்மையான புன்னகையைப் பெற விரும்பினால், பற்களை வெண்மையாக்கும் சிகிச்சைகளுக்குப் பணம் செலவிடுவதற்கு முன்பாக முயற்சி செய்து பார்க்க ஏராளமான வழிகள் உள்ளன.
– இது, பிபிசிக்காக கலெக்டிவ் நியூஸ்ரூம் வெளியீடு