மூத்த கிரிக்கெட் பகுப்பாய்வாளர் நொமான் நியாஸ், “பாகிஸ்தானின் 19 வயதுக்குட்பட்டோர் அணியில் தற்போது மூன்று அல்லது நான்கு வீரர்கள் உள்ளனர். அவர்கள் 19 வயதுக்குட்பட்டோருக்கான ஆசியக் கோப்பையில் விளையாடியிருக்கக் கூடாது. அதற்குப் பதிலாக இலங்கைக்கு எதிரான டெஸ்ட் தொடரில் இடம்பெற்றிருக்க வேண்டும். அவர்களில் ஃபர்ஹான் யூசுஃப், அலி ரஸா, அப்துல் சுப்ஹான் ஆகியோர் அடங்குவர்” என்றார்.

அவர் மேலும் கூறுகையில், “இந்தியாவைப் பொறுத்தவரை, ராகுல் டிராவிட் ஒரு கொள்கையை உருவாக்கியுள்ளார். அதன்படி, ஒரு வீரர் 19 வயதுக்குட்பட்டோருக்கான உலகக் கோப்பையில் ஒருமுறை மட்டுமே விளையாடுவார். இதன் நோக்கம், இளையோர் பிரிவில் ஒரு வீரரின் திறமையை அடையாளம் கண்டுகொண்ட பிறகு, அவரை இந்தியா ‘ஏ’ அணியில் விளையாடச் செய்து, பின்னர் இந்திய மூத்த அணியை நோக்கி முன்னேற்றுவதுதான்,” என்று கூறினார்.

“வீரர்களை அடுத்தடுத்த நிலைகளுக்கு முன்னேற்றுவதில் இந்தியாவின் கட்டமைப்பு மிகச் சிறப்பாக உள்ளது. திறமையான வீரர்களைச் சரியான முறையில் அடையாளம் கண்டு அவர்களை முன்னேற்றுகிறது. பாகிஸ்தானில் 19 வயதுக்குட்பட்டோர் பிரிவில் விளையாடக் கூடாத சில வீரர்கள் தற்போது அந்தப் பிரிவிலேயே விளையாடிக் கொண்டிருக்கின்றனர்” என்றார் நொமான் நியாஸ்.

முன்னாள் டெஸ்ட் கிரிக்கெட் வீரர் பாஜித் கான் கூறுகையில், “இது ஒரு அற்புதமான இறுதிப் போட்டி. உயர்தரமான கிரிக்கெட் விளையாடப்பட்டது. மிகச் சிறந்த கிரிக்கெட் ஆட்டத்தையும், கடைசிக் கட்டத்தில் இலக்கை எட்டும் ஓர் அணியையும் இதைப்போன்ற 19 வயதுக்குட்பட்டோர் பிரிவின் இறுதிப் போட்டிகளில் பார்ப்பது அரிது,” என கூறினார்.

“வீரர்களின் வளர்ச்சியை பொறுத்தவரை, பாகிஸ்தானின் நிலை மற்ற நாடுகளிலிருந்து வேறுபட்டது. ஒரே அணியுடன் அல்லது பெரும்பாலான அதே வீரர்களுடன் இரண்டு முதல் நான்கு தொடர்களில் விளையாடுவது உலகின் பிற நாடுகளில் அரிதாகவே நடக்கிறது. பொதுவாக, 19 வயதுக்குட்பட்டோர் பிரிவில் இவ்வாறு நடப்பதில்லை. அந்தப் பிரிவில் ஒரு வீரர் விளையாடி, தனது திறனை வளர்த்துக்கொண்ட பிறகு அடுத்த நிலைக்கு அனுப்பப்படுவார். அவர் மீண்டும் 19 வயதுக்குட்பட்டோர் பிரிவுக்குத் திரும்புவதில்லை,” என்று அவர் குறிப்பிட்டார்.

“இந்தியாவின் கொள்கை மிகவும் தெளிவானது. எந்தவொரு வீரரையும் ஒன்றுக்கு மேற்பட்ட முறை 19 வயதுக்குட்பட்டோருக்கான உலகக் கோப்பையில் விளையாட அவர்கள் அனுமதிப்பதில்லை. இந்தியாவின் கட்டமைப்பு மிகச் சிறப்பாக உள்ளது. அங்கு திறமையான இளம் வீரர்கள் உருவாகி வருகின்றனர். வீரர்களைத் தொடர்ந்து அதே வயதுப் பிரிவில் விளையாட வைத்தால், தங்களுக்கான வாய்ப்புக்காகக் காத்திருக்கும் அடுத்த தலைமுறை வீரர்களின் வளர்ச்சி தடைப்படும்,” என கூறுகிறார் பாஜித் கான்.

“இந்தத் தொடரில் பாகிஸ்தான் அணிதான் வெற்றி பெறும் என்று எதிர்பார்க்கப்பட்டது. அந்த அணி அனுபவம் வாய்ந்ததாகக் கருதப்பட்டது. 19 வயதுக்குட்பட்டோர் பிரிவில் இதுபோன்ற நிலை ஏற்படுவது அரிது. மறுபுறம், இந்திய அணி புதிய வீரர்களைக் கொண்டிருந்தது. எனவே, இந்தியாவின் இந்த வெற்றி கூடுதல் முக்கியத்துவம் பெறுகிறது.”

“பாகிஸ்தானை பொறுத்தவரை அணியின் ஃபீல்டிங்தான் எனக்கு மிகவும் சிறப்பாகத் தெரிந்தது. இந்தத் தொடர் முழுவதும் அதன் தரம் மிக உயர்வாக இருந்தது” என்றார்.

விளையாட்டு பத்திரிகையாளர் ஷாஹித் ஹாஷ்மி, “இது மிகவும் சுவாரசியமான இறுதிப் போட்டி. ஆனால், வெற்றி பெறுவதற்கான நல்ல வாய்ப்பை பாகிஸ்தான் தவறவிட்டது. இரு அணிகளின் இன்னிங்ஸிலும் கடைசி ஆறு ஓவர்களில் நடந்த ஆட்டமே போட்டியின் முடிவில் தாக்கத்தை ஏற்படுத்தியது” என்றார்.

“பாகிஸ்தான் கடைசி ஆறு ஓவர்களில் 38 ரன்கள் மட்டுமே எடுத்து, 6 விக்கெட்டுகளை இழந்தது. இல்லையெனில் அந்த அணியின் ஸ்கோர் 370 ரன்களை எட்டியிருக்கக்கூடும். இதற்கு மாறாக, இந்திய அணியின் கடைசி ஆறு ஓவர்களில் அதன் பேட்ஸ்மேன்கள் சிறப்பாக விளையாடி போட்டியின் முடிவையே மாற்றினர்.” என்கிறார் ஷாஹித் ஹாஷ்மி

“252 ரன்களுக்கு 8 விக்கெட்டுகளை இழந்திருந்த நிலையில், ஃபர்ஹான் யூசுஃப் ஒரு தவறு செய்தார். அந்த நேரத்தில் வழக்கமாகப் பந்துவீசாத வேறு ஒரு வீரரைக் கொண்டு ஓர் ஓவரை வீசியிருக்க வேண்டும். கேப்டனின் இந்த உத்தி சார்ந்த தவறால், கடைசி ஓவரைச் சுழற்பந்து வீச்சாளரைக் கொண்டு வீச வேண்டிய நிலை ஏற்பட்டது. இதற்கான முழுப் பாராட்டும் இந்தியாவின் கடைநிலை பேட்ஸ்மேன்களையே சேரும். குறிப்பாக, உல்வா அபாரமாக பேட்டிங் செய்தார்” என்றார்.

ஷாஹித் ஹாஷ்மி மேலும் கூறுகையில், “இரு அணிகளையும் ஒப்பிட்டுப் பார்த்தால், வீரர்களை வளர்ப்பதற்கான வாய்ப்பை பாகிஸ்தான் தவறவிட்டுள்ளது. இந்தியா தனது 19 வயதுக்குட்பட்டோர் அணியை மிகச் சிறந்த முறையில் தயார்படுத்தியுள்ளது. இதற்குச் சான்று, 2025-ஆம் ஆண்டு 19 வயதுக்குட்பட்டோருக்கான ஆசியக் கோப்பையில் விளையாடிய ஒரு வீரர்கூட இந்த இந்திய அணியில் இடம்பெறவில்லை. ஆனால், மறுபுறம் பாகிஸ்தான் அணியில் 2025-ஆம் ஆண்டு ஆசியக் கோப்பையில் விளையாடிய ஆறு அல்லது ஏழு வீரர்கள் இருந்தனர்.

“ஃபர்ஹான் யூசுஃப், அலி ரஸா, உஸ்மான் கான், முகமது ஹுஜைஃபா ஆகியோர் 2024-ஆம் ஆண்டிலும் 19 வயதுக்குட்பட்டோருக்கான ஆசியக் கோப்பையில் விளையாடியிருந்தனர். இளம் கிரிக்கெட் வீரர்களின் வளர்ச்சியை நீங்கள் தடுத்து நிறுத்துகிறீர்கள் என்பதையே இது காட்டுகிறது. அதற்குப் பிறகும் உங்களுக்கு எந்தப் பலனும் கிடைக்கவில்லை. இது இந்தியாவின் கட்டமைப்புக்குக் கிடைத்த வெற்றி; பாகிஸ்தானின் கட்டமைப்புக்குக் கிடைத்த தோல்வி” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு