7

இங்கிலாந்தின் குளோஸ்டர்ஷயர் பகுதியில் அமைந்துள்ள ஃபேர்போர்ட் ரோயல் விமானப்படை தளத்துக்குகு அருகே பயங்கரவாத சதித்திட்டம் மற்றும் வெடிபொருட்களை வைத்திருந்த குற்றச்சாட்டில் கைது செய்யப்பட்ட ஐந்து சந்தேக நபர்களும் கடுமையான நிபந்தனைகளுடன் பொலிஸ் பிணையில் விடுவிக்கப்பட்டுள்ளனர்.

இலண்டனைச் சேர்ந்த 20 முதல் 29 வயதுக்குட்பட்ட இங்கிலாந்து பிரஜைகளான இவர்கள், மூன்று சந்தேகத்துக்கிடமான வாகனங்களில் பயணித்த வேளையில் உள்ளூர்வாசி ஒருவரின் அவசர முறைப்பாட்டையடுத்து ஆயுதம் தாங்கிய பொலிஸாரால் ஞாயிற்றுக்கிழமை அதிகாலை கைது செய்யப்பட்டனர். வெடிபொருட்கள் சட்டத்தின் கீழும், பின்னர் பயங்கரவாதச் சட்டம் பிரிவு ஐந்தின் கீழ் பயங்கரவாத தாக்குதலுக்கான தயாரிப்புகளில் ஈடுபட்ட குற்றச்சாட்டின் கீழும் இவர்கள் தடுத்து வைக்கப்பட்டு விரிவான விசாரணைகளுக்கு உட்படுத்தப்பட்டனர்.

இலண்டன் நியூ ஸ்கொட்லாண்ட் யார்ட் தலைமையகத்தின் முன்பாக ஊடகங்களுக்கு கருத்து வெளியிட்ட பயங்கரவாத எதிர்ப்புப் பிரிவின் தலைவர் லோரன்ஸ் டெய்லர், சந்தேகநபர்கள் பிணையில் விடுவிக்கப்பட்ட போதிலும் விசாரணைகள் தீவிரமாக முன்னெடுக்கப்பட்டு வருவதாக உறுதிப்படுத்தினார். அவர்கள் எங்கு செல்ல வேண்டும், யாரை தொடர்புகொள்ள வேண்டும் என்பன தொடர்பில் கடுமையான கட்டுப்பாடுகள் விதிக்கப்பட்டுள்ளதாகவும் அவர் தெரிவித்தார்.

தொடர்புடைய செய்தி – விமானப்படை தளத்திற்கு அருகில் வெடிபொருட்கள் மீட்பு: பலர் கைது, மக்கள் அவசரமாக வெளியேற்றம்

அமெரிக்க வான்படையின் குண்டுவீச்சு விமானங்கள் பயன்படுத்தும் இந்த முக்கிய இராணுவ தளத்தை இலக்கு வைத்து முன்னெடுக்கப்படவிருந்த தாக்குதல் முயற்சியானது வெளிநாட்டு சக்தியொன்றின் தூண்டுதலின் பேரில் முன்னெடுக்கப்பட்டதா என்ற கோணத்திலும், நிதி ஆதாயத்திற்காக கூலிப்படையினர் ஊடாக திட்டமிடப்பட்டதா என்ற அடிப்படையிலும் பாதுகாப்பு புலனாய்வு அமைப்பான எம்ஐ5 உடன் இணைந்து விசாரணைகள் துரிதப்படுத்தப்பட்டுள்ளன.

சந்தேகநபர்கள் பயணித்த மூன்று வாகனங்களும் முழுமையாக பரிசோதிக்கப்பட்டுள்ளதாகவும், சம்பவம் நிகழ்ந்த பகுதியைச் சூழ பொலிஸ் பாதுகாப்பு பலப்படுத்தப்பட்டு பொதுமக்களின் பாதுகாப்பை உறுதிப்படுத்துவதற்கான தொடர் நடவடிக்கைகள் முன்னெடுக்கப்பட்டுள்ளதாகவும் இங்கிலாந்து உள்நாட்டலுவல்கள் அமைச்சு தெரிவித்துள்ளது.